Şimali Koreya "Müsahibə" ("The Interview”) filminin nümayişinin ləğvinə səbəb olmuş Sony Pictures şirkətinə kiberhücumun ABŞ-la birgə araşdırılmasına səsləyib.
ABŞ Federal Təhqiqtlar Bürosu hücum arxasında Pxenyanın olduğunu bildirib. Şimali Koreya insidentdə əli olduğu barədə ittihamları rədd edərək Vaşinqtonu "əsassız iddialar yaymaqa” günahlandırır.
Haker hücumu və onun ardınca baş verən hadisələrdən sonra Sony Pictures Şimali Koreya liderinə sui-qəsd barədə kinokomediyanı yayımlamaq niyyətindən vaz keçib.
"Müsahibə” filmi kinoteatr ekranlarına Milad bayramı günündə çıxmalı idi. Lakin hazırda Sony filmin "başqa platformada” yayımlanmasının nəzərdən keçirildiyini bildirir.
Çox güman ki, Pxenyandan gələn təkziblər çoxlarını əmin etməyəcək. Şimali Koreya qaçqınları xarici internet səhifələrə hücum edən Büro 121 adlı hərbi bölümünün fəaliyyət göstərdiyini bildirirlər, Seuldan BBC müxbiri Steve Evans xəbər verir.
Steve Evans yazır ki, ötən ilin mart ayında özlərini "Dark Seoul Gang” adlandıran hakerlər Cənubi Koreya bank və Televiziya sistemini hədəfləyiblər.
Ekspertlər həmin hücumla Sony Pictures şirkətinə həmlə vaxtı oxşar metodlardan istifadə olunduğunu deyirlər.
ABŞ Federal Təhqiqtlar Bürosu (FBI) filmin ssenarisi və şirkət əməkdaşları emaillarının internetə sızması ilə nəticələnən hücum arxasında Pxenyanın olduğunu bildirib. Şimali Koreya iddiaları rədd edir.
"Birləşmiş Ştatların əsassız iddia və böhtanlar atdığı bir məqamda biz insidentin müştərək araşdırılmasını təklif edirik”, - şənbə günü Şimali Koreyanın XİN-i bəyan edib.
Şimali Koreya açıqlamasına əsasən təklifin rədd edilməsinin "ağır nəticələri” olacaq.
Bəziləri hakerlərin təhdidlərindən sonra filmi göstərməmək qərarını ifadə azadlığına hücum kimi dəyərləndiriblər.
Cümə günü ABŞ prezidenti filmi göstərməmək barədə Sony Pictures qərarının təəssüf doğurduğunu deyib. Barak Obama hücuma cavab veriləcəyini vəd edib.
Sony şirkətinin bəynatında deyilir ki, filmi göstərməmək qərarı kinoteatrların əksəriyyətinin filmin nümayişindən imtina etməsindən sonra qəbul olunub.
