Cihadçıların zorakılığına görə noyabrda 5000-dən çox adam ölüb, BBC-nin araşdırması aşkar edib. Bunun ən çox təsir göstərdiyi ölkələr İraq, Nigeriya, Əfqanıstan və Suriyadır: ölümlərin 80 faizi bu ölkələrdə baş verir.
Radikallaşma Tədqiqatı üçün Beynəlxalq Mərkəz (International Centre for the Study of Radicalisation, ICSR) ilə birlikdə aparılan araşdırmada 14 ölkədə 664 hücum qeydə alınıb. Araşdırmanın məqsədi, bir ay ərzində cihadçıların zorakılığı nəticəsində baş verən insan itkisini müəyyən etmək və mürəkkəb hərəkatın illüstrasiyasını göstərməkdir. Araşdırma göstərib ki, noyabrda əl-Qaidənin, onun filiallarının və ideologiyası oxşar olan qrupların zorakılığı nəticəsində hər saat az qala yeddi adam ölüb. Nəticələrə görə orta hesabla gündə 22 belə hücum baş verib və 168 adam həlak olub.
İraq və Suriyada fəaliyyət göstərən İslam Dövləti (İD) silahlıları 2000-dən çox adamın ölümünə səbəb olub. Ölən 5042 adamın əksəriyyəti, yəni 2079 nəfər mülki şəxs olub. Ölən hərbçilərin sayı 1723-dür. Məlumata görə, hücumlarda 1000-ə yaxın cihadçı da öldürülüb. Ən çox ölümün qeydə alındığı ölkə, İraqdır. Ölümlərin üçdə bir hissəsi və ən çoxsaylı hücumlar burada baş verib. İkinci ən ölümcül ölkə Nigeriyadır. Ölümlərə görə Boko Haram qrupunun məsuliyyət daşıdığı deyilir. Talibanların zorakılığına görə üçüncü yerdə Əfqanıstandır.
Hesabatı BBC Dünya Xidməti və Londonun King's College universitetində yerləşən QHT, ICSR hazırlayıb. "Rəqəmlər onu göstərir ki, cihadçılar və əl-Qaidə daha eyni şey deyil", ICSR direktoru Peter Neumann deyib. "Cihad [nəticəsində] ölümlərin altmış faizi əl-Qaidə ilə rəsmi əlaqəsi olmayan qruplar tərəfindən törədilib, və onlar hərəkatın rəhbərliyi üçün rəqabət edəcəklər", deyə Neumann əlavə edib.
Noyabr ayında ən ölümcül hadisə, Nigeriyanın Kano şəhərindəki Böyük Məsciddə baş verən bomba hücumu olub. Nəticədə 120 adam həlak olmuşdu. Ölümlərin əksəriyyəti bombalamalar nəticəsində baş verib. Odlu silah hücumları, artilleriya atəşi və başkəsmələrə görə də çox adam ölüb.
