Ölkəmizdə elektronika və məişət avadanlıqları satışı ilə məşğul olan bir çox şirkət var. Lakin bu şirkətlərin bir çoxunun fəaliyyətindən insanlar şikayətlənirlər. Son zamanlar ən çox şikayət olunan isə “Kontakt Home” mağazalar şəbəkəsidir.
“Kontakt Home”un alıcılarının, demək olar ki, əksəriyyəti narazılıq edir və yenidən bu mağazaya müraciət etməyəcəklərini bildirirlər. Onların fikrincə, “Kontakt Home”dan mal alan müştərilərin çoxu yolunu mütləq servisdən salmalı olur.
“Kontakt Home”dan mal alan müştərilərdən biri aldığı telefonda problem olduğundan “Servis Link” texniki servis mərkəzinə üz tutub. “Kontakt Home”dən və “Servis Link”dən növbəti şikayəti bu yaxınlarda sosial şəbəkədə Tuna Musaeva adlı istifadəçi yayıb. Həmin şikayəti olduğu kimi təqdim edirik: “Şikayətim “Kontakt Home” və “Servis Link”dəndir. Qızıl zəmanətlə alınmış “Hoffman” telefonu 4 ay əvvəl öz-özünə ekranın sönüb açılmaması şikayətilə “Servis Link”ə apardım. Orada telefona baxdılar və 14 iş günü ərzində düzəldilib təhvil veriləcəyini dedilər. Bir müdət sonra zəng etdilər ki, telefon hazırdır. Gedib götürdum, yoxladım, işləyirdi. Evdə gördüm ki, gələn zənglərə ancaq “nauşnik”lə cavab vermək olur. Bundan başqa, telefonun ekranı söndü və açılmadı. Yenidən apardım həmin yerə, hər iki problemi dedim, qəbul etdilər. Gördüm verdikləri vaxt bitib, özüm əlaqə saxlayaraq soruşdum ki, niyə hazır deyil? Dedilər bəs “elə indicə hazır olub, gəlin götürün”. Getdim, telefonu qoşub verə bilmədilər, dedilər ki, üzürlü sayın, “nəsə problem var, biz sizə xəbər edərik”. 4-5 gün sonra yenidən zəng etdilər, getdim. Ondan sonra 1 dəfə yenə də apardım, çünki telefon 10 gündən artıq isləmirdi. Sonuncu dəfə dedim ki, qızıl zəmanətin vaxtı bitsə də, mənim hüquqi yolum qalmasa da, mən hər yerdə, hər kəsə deyəcəm sizin fırıldaqlarınızı, keyfiyyətsizliyinizi. Sonuncu defə isə dedilər ki, bu sondur, artıq həmin hissəni dəyişmisik. Nəticədə bu dəfə telefon 17 gün işlədi və dünən yenidən söndü”.
“İstifadəçidən lazımi məlumatları aldıqdan sonra şikayəti araşdırılacaq və nəticələri ilə bağlı redaksiyanıza məlumat bildiriləcək”
Məsələni dəqiqləşdirmək üçün “Kontakt Home” mağazalar şəbəkəsilə əlaqə saxladıq. “Kontakt Home”un ictimaiyyətlə əlaqələr şöbəsinin rəhbəri Vəfa Rüstəmova “Bakı-Xəbər”ə açıqlamasında qeyd etdi ki, Tuna Musayeva adlı “Facebook” istifadəçisinin iradı ilə bağlı “Facebook” qruplarının birində yazdığı şikayətdən xəbərdardırlar: “Sözügedən məsələnin araşdırılması və aydınlıq gətirilməsi məqsədilə istifadəçinin “Facebook” qruplarının birində yazdığı irad mətninə rəsmi səhifəmiz adından dərhal münasibət bildirilmiş və xanımın ad, soyad, ata adı və əlaqə nömrəsi istənilmişdir. Çünki xanımın “Facebook” profili bizə məsələni araşdırmaq üçün kifayət qədər məlumat vermir. Lakin Tuna xanımdan hələlik geridönüş ala bilməmişik. İstifadəçi bizə tələb olunan məlumatı təqdim etdikdən sonra məsələnin araşdırılması və həlli ilə bağlı işlərə başlanacaq. Müştərilərimiz bizim gücümüzdür və onların bizdən məmnun qalması şirkətimiz üçün ən önəmli faktorlardan biridir. Bilməyinizi istərdik ki, baş vermiş hal bizi məmnun etmir və məsələnin həll olunmasında şirkət olaraq maraqlıyıq. İstifadəçidən lazımi məlumatları aldıqdan sonra şikayəti araşdırılacaq və nəticələri ilə bağlı redaksiyanıza məlumat bildiriləcək. İndi bununla bağlı mövqeyimizi almadan məlumatı dərc edən digər saytlara da açıqlamamızda qeyd edəcəyik ki, xəbərdə gedən bəzi məlumatlar subyektiv xarakter daşıyır və sübutu yoxdur. Məsələn, xəbərdə yazılır ki, “Kontakt Home”un alıcılarının, demək olar ki, əksəriyyəti narazılıq edir və yenidən bu mağazaya müraciət etməyəcəklərini bildirirlər. Onların fikrincə, “Kontakt Home”dan mal alan müştərilərin çoxu yolunu mütləq servisdən salmalı olur”. Müştərilərlə birbaşa işləyən şirkətlərdə iradların olması təbiidir. Hər bir halda, bu, xoşagələn hal deyil. Lakin "alıcıların əksəriyyəti" demək üçün müəllifin əlində əsas və müqayisə üçün statistika olmalıdır. İndiki halda, istifadə olunan bu ifadə həqiqəti əks etdirmir və şirkətimizin nüfuzuna ziyan vurur”.
Günel CƏLİLOVA
