“Yazılışı mübahisəli olan bu cür sözlər çoxdur”
Uzun müddətdir cəmiyyətin müxtəlif təbəqələri tərəfindən müzakirə edilən Azərbaycan dilinin yeni orfoqrafiya lüğəti hələ də nəşr edilməyib. Orfoqrafiya lüğətinin artıq çapa hazır olduğu bildirilsə də, yayılan məlumata görə, lüğətlə bağlı xeyli problem var. Məlum olduğu kimi, bir sıra mütəxəssislər çapa hazırlanan Azərbaycan dilinin orfoqrafiya lüğətində bir sıra sözlərin yazılışında mövcud olan qüsurların aradan qaldırılmadığını qeyd edirlər. Onlar bildirirlər ki, yeni lüğətdə bəzi sözlər var ki, onların yazılışı düzgün qeyd edilməyib.
Azərbaycan Milli Elmlər Akademiyasının (AMEA) Nəsimi adına Dilçilik İnstitutunun direktoru akademik Möhsün Nağısoylu mətbuata açıqlamasında bildirib ki, Azərbaycan dilinin yeni orfoqrafiya lüğətinə daxil edilməsi nəzərdə tutulan bəzi sözlərlə bağlı mübahisəli məqamlar ortaya çıxdığı üçün, kitabın çapa verilməsi ləngiyəcək. O, həmçinin, qeyd edib ki, hazırda həmin mübahisəli sözlərlə bağlı müzakirələr aparılır.
“Bəzi sözlər var ki, onları müzakirə edib yazılışı ilə bağlı ortaq məxrəcə gələcəyik”
Akademik Möhsün Nağısoylu “Bakı-Xəbər”ə açıqlamasında bildirdi ki, bir sıra mürəkkəb sözlərin yazılışı ilə bağlı müəyyən problemlər yaranıb. O qeyd etdi ki, bəzi sözlərin yazılışı mübahisəlidir və həmin sözlərə yenidən baxılır.
M.Nağısoylunun sözlərinə görə, mübahisəli sözlərin arasında həm lüğətə yeni daxil olan, həm də lüğətin 2013-cü il nəşrində olan və tənqidə səbəb olan sözlər var ki, onlara dair qüsurların aradan qaldırılması vacibdir. Bu səbəbdən bəzi sözlərlə bağlı dəqiqləşdirmələrin aparılmasına ehtiyac duyulduğunu deyən M.Nağısoylunun bildirdiyinə görə, hazırda kitabın üzərində iş gedir və sentyabrda nəşr ediləcək.
“Biz hazırda o mübahisəli sözləri müzakirə edirik. Konkret olaraq o sözlərdən birini demək istəyirəm. Məsələn, əməkhaqqı sözü, “Azərbaycan dilinin orfoqrafiya lüğəti”nin 2004-cü və 2013-cü illərdəki buraxılışlarında da bitişik yazılıb. Bu, əvvəlki lüğətlərdə yoxdur. Bizə təkliflər gəlir ki, “əməkhaqqı” bitişik yazılırsa, onda “gedişhaqqı”, “təhsilhaqqı” sözləri də bitişik yazılsın. Biz belə məsələlərə fərdi baxacayıq. Yazılışı mübahisəli olan bu cür sözlər çoxdur. Biz də dedik ki, bir az gec olsun, amma ortaya keyfiyyətli iş çıxsın ki, nöqsan olmasın. Ona görə də kitabı sentyabrda təhvil verəcəyik” - deyə M.Nağısoylu qeyd etdi ki, ictimai müzakirəyə Azərbaycan dilinin qaydaları çıxarılsa da, sözlərin yazılışı çıxarılmamışdı. “Bu qəbildən olan bəzi sözlər var ki, onları müzakirə edib yazılışı ilə bağlı ortaq məxrəcə gələcəyik” - deyə M.Nağısoylu bildirdi.
Qeyd edək ki, Azərbaycan dilinin son orfoqrafiya lüğəti 2013-cü ildə çap edilib. Həmin dövrdən keçən 6 il ərzində dilimizə daxil olan 4000 yeni söz cəmlənərək yeni lüğətə daxil edilib. Ümumilikdə, yeni lüğətdə 112 minə yaxın söz var.
Bu il Nazirlər Kabineti tərəfindən Azərbaycan dilinin yeni orfoqrafiya normaları təsdiqləndikdən sonra yeni lüğətin hazırlanması və çap edilməsi zərurəti yaranıb.
İradə SARIYEVA
