Aydın Əzimov: “Himnin musiqisindən başqa əsərlərdə istifadə edilməsi düzgün deyil və mən həmişə bu hala qarşı olmuşam”
Hər bir ölkədə dövlətin əsas atributlarından biri olan himnin toxunulmaz olduğu məlumdur. Azərbaycanda isə bəzi musiqiçi və bəstəkarların himnimizə münasibəti ürəkaçan deyil. Onlar himnin musiqisindən öz musiqi əsərlərində istifadə etməklə himnimizi parçalayırlar. Himnimizin musuqisindən istifadə hallarına dəfələrlə yol verilib. Bu da, sözün həqiqi mənasında, cəmiyyətdə böyük narazılıqla qarşılanıb.
Bu hadisəni müsbət qarşılamayan mütəxəssislər, sadə vətəndaşlar bildirirdilər ki, bunun qarşısının alınması üçün müxtəlif tədbirlər görülməlidir.
Azərbaycan Dövlət Himninin musiqisinin musiqi əsərlərində istifadəsi qadağan edilir.
Yeni hazırlanan “Azərbaycan Respublikasının Dövlət Himni haqqında" qanun layihəsində əks olunan məsələlərdən biri məhz budur.
Məlumatlara görə, qanun layihəsinin 7-ci (Dövlət Himni ilə əlaqədar məhdudiyyətlər) maddəsinə əsasən, Dövlət Himninin musiqisinin musiqi əsərlərində istifadəsi qadağan edilir. Qaydalara görə, himn nəzərdə tutulan qaydada ifa edilməli, dinlənilməli və oxunmalıdır.
Bu yaxınlarda Milli Məclisdə müzakirəyə çıxarılacaq qanun layihəsinə münasibət bildirən Əməkdar incəsənət xadimi, tanınmış bəstəkar, himnimizin musiqisini bərpa edən Aydın Əzimov “Bakı-Xəbər”ə açıqlamasında bildirdi ki, Azərbaycan Dövlət Himninin musiqisinin musiqi əsərlərində istifadəsinin qanunla qadağan edilməsi tamamilə doğru qərardır. A.Əzimov hesab edir ki, bu, himnə qarşı əl uzadanların yolunu kəsəcək. “Bu məsələ ilə bağlı qanun layihəsinin hazırlanması tam doğru qərardır. Bilirsiniz ki, himn dövlət atributudur və ona toxunmaq olmaz. Məsələn, necə ki, bayraqdan geyim kimi istifadə edilmir, eləcə də himnin musiqisindən istifadə etmək olmaz. Himn müəyyən yerlərdə, vaxtlarda ənənəvi olaraq istifadə olunur. Himnin musiqisindən başqa əsərlərdə istifadə edilməsi düzgün deyil və mən həmişə bu hala qarşı olmuşam. Onun musiqisindən opera, balet və digər janrda olan musiqilərdə istifadə olunmamalıdır. Təəssüf ki, bizdə himnin musiqisindən istifadə edənlər tapılır. Bunu o adamlar edirlər ki, onlarda dövlətçilik sevgisi, dövlətçilik anlayışı olmur. Bu qanun layihəsinin qəbul edilməsi ilə əlaqədar olaraq bütün mənfi hallar tədricən yox olacaq. Himnə hər kəs böyük sayğı bəsləməlidir. O hörmətdən də irəli gələrək ondan istifadə olunmalıdır. Bəzən himnimizi oranjeman edənlər də tapılır. Qətiyyətlə onlara “bunu etmək olmaz” deyirəm. Çünki himnimizi ilk dəfə mən işləmişəm, bərpa etmişəm, meydana gətirmişəm. Klavir də mənə məxsusdur, yəni əvvəllər himnin ancaq melodiyası vardı. Oranjeman edirlər, amma mənim klavirimi edirlər. Eşitiyimə görə, bu oranjeman yuxarılarda da bəyənilmir. Belə də olmalıdır. Himnimiz ilk dəfə 1989-cu ildə meydanda səslənib. Sonra 1992-ci il mayın 27-də Milli Məclis tərəfindən “Azərbaycan Respublikasının Dövlət Himni haqqında” Qanun qəbul edildi”.
Himnin ilkin variantının indiyə qədər televizya və radiolarda səsləndirildiyini deyən A.Əzimovun sözlərinə görə, bu belə də davam edəcək. “Bu qanun layihəsinin müsbət tərəfi həm də ondadır ki, bəzilərinin himnimiz haqqında səsləndirdiyi fikirlərə son qoyulacaq” - deyə A.Əzimov bildirdi.
İradə SARIYEVA
