Vaqif Abışov: “Dövlət atributlarımızdan biri olan gerbə münasibətimizdə çox prinsipial olmalıyıq”
Dövlət atributları hər bir vətəndaş üçün böyük dəyərə, xüsusi əhəmiyyətə malik olmalıdır. Cəmiyyətdə daşıdığı statusdan asılı olamayaraq, hər bir Azərbaycan vətəndaşı, azərbaycanlı gerbimizə, himnimizə, bayrağımıza xələl gətirən hərəkətlərə yol verməməlidir.
Bəzi vətəndaşlar, eləcə də tikinti işləri ilə məşğul olan qurumlar inşa etdikləri məkanlarda hara gəldi gerbimizin təsvirlərini həkk edirdilər. Hətta ayaq altına da gerb təsvirlərinin vurulduğu halları vardı. Artıq bu məsələyə birdəfəlik son qoyulur. Belə ki, Azərbaycanın Dövlət Gerbinin istifadəsinə dair yeni məhdudiyyətlər müəyyənləşib. “Azərbaycan Respublikasının Dövlət Gerbi haqqında” yeni hazırlanan qanunda göstərlir ki, Dövlət Gerbi Konstitusiya qanununa uyğun təsvir edilməli və nəzərdə tutulan qaydada istifadə edilməlidir. Sənəddə, həmçinin, göstərilir ki, Dövlət Gerbinin oturulan, ayaq basılan və natəmiz yerlərə vurulması və ya həmin yerlərdə təsvir edilməsi qadağandır.
Qanunun tələblərini pozan şəxslər İnzibati Xətalar Məcəlləsinə, Dövlət Gerbi barədə təhqiredici hərəkətlər edən şəxslər isə Cinayət Məcəlləsinə uyğun olaraq məsuliyyət daşıyırlar. Yaxın günlərdə müzakirəyə çıxarılacaq sənəddə əks olunan tələblərə hər bir vətəndaşın əməl etməli olduğunu bildirən Azərbaycan Milli Elmlər Akademiyasının A.Bakıxanov adına Tarix İnstitutunun əməkdaşı, tarix üzrə fəlsəfə doktoru Vaqif Abışov “Bakı-Xəbər”ə bildirdi ki, gerbdən istifadə qaydalarının müəyyən edilməsi müsbət haldır. Tarixçi hesab edir ki, bu, gerb təsvirlərindən sui-istifadə edilməsinin qarşısının alınmasında faydalı olacaq. “Gerbimiz Azərbaycan Respublikasının müstəqilliyinin əsas simvollarından biridir. Ona görə də dövlət atributlarımızdan biri olan gerbə münasibətimizdə çox prinsipial olmalıyıq. Bəzən görürdün ki, gerb təsvirləri hara gəldi çəkilirdi, lakin indi bu, qanunla mümkün olmayacaq. Hətta ayaq altında da o təsvirləri görürdük. Bu da hər birimizdə acı təəssüf hissi doğurmaqla yanaşı, həm də bu əməli törədənlərin cəzalandırılmasını istəyirdik. Dövlətin müstəqillik simvollarından biri olan gerbin ayaq altına, natəmiz yerlərə həkk olunmasına artıq yol verilməyəcək. Hazırlanan və Milli Məclisdə müzakirə edilərək qəbul ediləcək sənəddə gerbdən istifadə ilə bağlı sərt tədbirlərin yer alması təqdirəlayiq haldır. Bu sənəd qəbul edildikdən sonra hesab edirəm ki, gerbimizə qarşı hər hansı bir hörmətsizliyə yol verilməyəcək. Ümumiyyətlə, biz xalq olaraq, vətəndaş olaraq, öz dövlət atributlarımıza elə münasibət göstərməliyik ki, onunla bağlı hər hansı bir sənədin qəbul edilməsinə zərurət olmasın. Ancaq göründüyü kimi, bəzi vətəndaşlar dövlət atributlarına sayğılı davrana bilmədiyi üçün, belə sənədlər hazırlanıb qəbul edilir”. V.Abışovun sözlərinə görə, dövlətçilik atributlarına hörmət, sayğı göstərmək hər bir azərbaycanlının borcudur və sayğı göstərə bilməyən insanların isə bu əməllərinə görə məsuliyyətə cəlb edilməsi müsbət hal olacaq.
İradə SARIYEVA
