Nadir İsrafilov: “Bu əsasən də oğlan uşaqlarının mənəvi-psixoloji tərbiyəsində əhəmiyyətli rol oynayar” “Bir nəfər müəllim vardı, ona dedim ki, səni filan bağçaya müdir təyin edirəm, əvvəlcə tərəddüd etsə də, sonradan razılıq verdi. Təəssüf ki...”
Yalnız Azərbaycanda deyil, bir sıra ölkələrin məktəbəqədər təhsil sistemində, bir qayda olaraq, qadınlar işləyirlər. İlk baxışdan bu normal görsənsə də, oğlan uşaqlarının mənəvi-psixoloji cəhətdən formalaşmasında mənfi rol oynayır. Bu amilə əvvəlki dövrlərdə elə də əhəmiyyət verilməsə də, bugünkü araşdırmalar, təhlillər göstərir ki, ümumiyyətlə, təlim-tərbiyə məsələsində kişi və qadınların iştirakı eyni dərəcədə təmin olunmalıdır. Məktəbəqədər təhsil sistemində də qadınlarla yanaşı, kişilərin təmsil olunması məsələsi aktuallaşmaqdadır.
Məktəbəqədər təhsil müəssisələrində qadın müəllim-tərbiyəçiləri ilə yanaşı, kişi müəllim-tərbiyəçilərin də olması hansı nəticələr verər?
Tanınmış təhsil eksperti Nadir İsrafilov “Bakı-Xəbər”ə bildirdi ki, bu gün Azərbaycanda məktəbəqədər müəssisələrdə, ümumiyyətlə, kişi müəllim və tərbiyəçilərin işləməməsi, orta təhsil müəssisələrində isə müəllim heyətinin əsasən qadınlardan ibarət olması müsbət hal deyil. Ümumiyyətlə, bu tərkibin mövcud olduğu bütün ölkələrdə bunun ciddi fəsadlar törətdiyini deyən N.İsrafilov hesab edir ki, uşaq bağçalarında da kişi müəllim və tərbiyəçilər işləməlidirlər. “Bu gün inkişaf etmiş Avropa ölkələrindən çoxunda, eləcə də Norveçdə, Finlandiyada məktəbəqədər təhsil müəssisələrində daha çox kişilər çalışırlar. Mən bunu həmin ölkələrdə ezamiyyətdə olarkən yaxından müşahidə etmişəm. Düzdür, əvvəlcə buna çox təəccüblə yanaşdım. Orada mənə dedilər ki, bu müəssisələrdə kişilərin işləməsinin müsbət tərəfləri çoxdur. Əvvəla kişilər qadınlara nisbətən uşaqlara münasibətdə daha diqqətlidirlər. Onlar uşaqlara daha böyük qayğı ilə yanaşa bilirlər. Özüm də gördüm ki, həmin kişi müəllimlər uşaqlara daha ciddi qayğı ilə yanaşırdılar. Həmin dövrdə mən Nəsimi Rayon Təhsil Şöbəsinin müdiri vəzifəsində işləyirdim. Oradan qayıtdıqdan sonra Azərbaycanda da belə bir təcrübəni sınaqdan keçirmək qərarına gəldim. Düşünürdüm ki, görəsən hansı kişi müəllim uşaq bağçasında işləməyə razı olacaq? Bir nəfər müəllim vardı, ona dedim ki, səni filan bağçaya müdir təyin edirəm, əvvəlcə tərəddüd etsə də, sonradan razılıq verdi. Təəssüf ki, o, müəllim həmkarlarının lağlağısına, qınağına tuş gələrək bu vəzifədən imtina etdi. Lakin bu təcrübənin hazırda həyata keçirilməsinə ehtiyac var. Məktəbəqədər təhsil müəssisələrində qadınlarla yanaşı, kişi müəllim-tərbiyəçilərin işləməsi çox müsbət nəticələr verə bilər. Bu əsasən də oğlan uşaqlarının mənəvi-psixoloji tərbiyəsində əhəmiyyətli rol oynayar. Bilirsiniz, bizdə uşaq evdə əsasən ana ilə ünsiyyətdə olur, bağçada qadın müəllimə-tərbiyəçini görür, məktəbdə də müəlliməsi qadın olur. Bu da oğlan uşaqlarının formalaşmasına mənfi təsir göstərir. Hesab edirəm ki, Azərbaycanda da məktəbəqədər təhsil müəssisələrində qadınlarla yanaşı, kişi müəllim-tərbiyəçilər də işləməlidirlər” - deyə N.İsrafilov bildirdi.
İradə SARIYEVA
