İlqar Orucov: “… rəhbərlik etdiyi universiteti hansı səviyyədən hansı səviyyəyə gətirib çıxarıb sualına…”
Xəbər verildiyi kimi, rektorlar 5 il müddətinə təyin ediləcək. Bu barədə Prezident İlham Əliyev “Təhsil haqqında” Qanunun tətbiq edilməsi barədə” Fərmana dəyişiklik edilməsinə dair Fərman imzalayıb. Fərmanda qeyd olunub ki, dövlət ali təhsil müəssisəsinə rektor 5 il müddətinə təyin ediləcək.
Bu fərmanın 1-ci hissəsində təsbit edilən müddəa bu fərman qüvvəyə mindikdən sonra həyata keçirilən təyinatlara şamil olunur.
Ekspertlərin fikrincə, rektorların 5 il müddətinə təyin olunması universitetlərin fəaliyyətinə ciddi şəkildə müsbət təsir göstərəcək.
Azərbaycan Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, "Təhsil haqqında” Qanunun tətbiq edilməsi barədə Azərbaycan Respublikası Prezidentinin müvafiq fərmanında edilən dəyişikliklərə görə, rektorların beş il müddətinə təyin edilməsi rektorların məsuliyyətini artıracaq: “Məlumdur ki, Azərbaycanda rektorlar administrativ yolla təyin edilirlər və rektorların təyinatı bilavasitə ölkə başçısının səlahiyyətində olan məsələdir. Dövlət başçısının lazım bildiyi məqamda rektor vəzifəyə təyin və vəzifədən azad oluna bilər. Mütləq deyil ki, rektor beş il müddətinə təyin edilibsə, həmin müddətə qədər vəzifədə qalmalıdır və ya növbəti beş il müddətində yenidən rektor təyin edilməməlidir. Yəni belə bir məhdudiyyət və ya məcburiyyət yoxdur. Rektor ona tapşırılan işin, həvalə edilən vəzifənin öhdəsindən gəlmirsə, vaxtından əvvəl vəzifədən kənar edilə bilər və ya əksinə, özünü doğruldursa, növbəti beş ildə yenidən həmin posta təyin olunması mümkündür. Amma burada bir məqam var. Rektor biləndə ki, onun özünü doğrultmaq üçün yalnız beş ili var və özünü doğrultmasa, növbəti dəfə təyinatdan uzaq qala bilər, bu onun məsuliyyətini daha da artıracaq. Bizim reallıq ondan ibarətdir ki, Azərbaycanda on illərlə rektor vəzifəsini tutan və oliqarxlaşmış, bürokratik düşüncəyə hakim olan, faktiki olaraq, rəhbərlik etdiyi ali təhsil müəssisəsində heç bir yenilik edə bilməyən rektorlar var. Onlar, faktiki olaraq, məsuliyyət hisslərini də o dərəcədə hiss etmirlər, köhnə üsullarla idarəçiliyə öyrəşiblər və yaxud yenilikləri dərk edə bilmirlər. Fikrimcə, onları əvəz edə biləcək yeni düşüncəli kadrlar rektor təyin olunsalar, bu daha effektli ola bilər. İmzalanan fərman bu prosesi sürətləndirə bilər. Təbii ki, elə rektorlar var ki, onların idarəçiliyi bundan sonra da işlərini davam etməyə imkan verir”.
Həmsöhbətimiz onu da vurğuladı ki, Azərbaycanda ali təhsilin səviyyəsi dünya universitetləri ilə müqayisədə xeyli geri qalır və bu onu sübut edir ki, bizim təhsilimiz zəifdir. Burada, əlbəttə ki, rektorların da böyük günahı var: “Arzu edirəm ki, fərmana edilən dəyişiklik təyin ediləcək rektorların beş ildən sonra rəhbərlik etdiyi universiteti hansı səviyyədən hansı səviyyəyə gətirib çıxarıb sualına cavabında öz müsbət təsirini büruzə versin”.
Günel CƏLİLOVA
