Tahir Əmiraslanov: “Azərbaycana məxsus olan “lavaş” çörək brendinin yaradılmasına böyük ehtiyac var” Eyyub Hüseynov: “Bölgələrə məxsus olan çörəklərin ayrı-ayrılıqda brendi yaradıla bilər”
Azərbaycanda minillik tarixi olduğu hesab edilən çörək əsrlərdən bəri bolluq və bərəkət rəmzi sayılır. Azərbaycanda çörək hər şeydən üstün tutulur, müqəddəs hesab edilir. Çörək bütün xalqların süfrəsində qəbul edilmiş ənənəvi qida məhsuludur. Azərbaycan əhalisinin qida rasionu bol olsa da, ən çox istifadə etdiyi ərzaq məhsulları sırasında çörək və çörək məmulatları üstünlük təşkil edir. Elə bir yemək yoxdur ki, orada çörəkdən istifadə olunmasın. Yəni bu məhsul qida rasionumuzda geniş yer tutur.
Azərbaycanda çörəyin müxtəlif növləri bişirilir: yuxa, yayma, fətir, lavaş, səngək, xamralı, qalın, nazik, fəsəli, kətə, təndir çörəyi, xörəkli çörəyi, bəyim çörəyi, qoz çörəyi, badam çörəyi və sairə. Azərbaycanın hər bölgəsinin özünəməxsus çörək növü və bişirilmə üsulu mövcuddur. Bu çörəklərin dadları da bir-birindən fərqlənir. Məsələn, Naxçıvan, Qubadlı və Zəngilan regionlarında daha çox lavaş çörəyindən istifadə edilir.
Bu günlərdə Azərbaycan istehsalı olan çörəklərin brendləşməsi təklif olunub. Belə bir təkliflə ekspert Hikmət Abdullayev çıxış edib. O qeyd edib ki, Azərbaycanda yeni çörək və pendir brendinin yaradılması nəzərdə tutulur: “Dünyada 40-dan çox çeşiddə çörək var, Azərbaycanda isə yalnız 4 növ çörək var, eyni vəziyyət pendir istehsalında da müşahidə olunur, belə ki, inək, qoyun və keçi pendirindən başqa, ölkədə digər pendir növləri yoxdur”.
Azərbaycan çörəyinin brendləşməsi təklifini ekspertlər müsbət qarşıladılar. Onların fikrincə, hər bir ölkənin özünəməxsus çörəyi var. Azərbaycan mətbəxinə xas olan çörək çeşidləri çox olduğu üçün, onların brendləşməsinə ehtiyac var.
Azərbaycan Milli Kulinariya Mərkəzinin (AMKM) baş direktoru Tahir Əmiraslanov “Bakı-Xəbər”ə açıqlamasında qeyd etdi ki, Azərbaycana məxsus olan bir çox çörəyin brendi yaradılmalıdır: “Bunlardan lavaş, ləzgi, kəpək çörəyi, fətir, xamralı, təndir və digərlərini misal göstərmək olar. Elə çörək növləri var ki, onlar hansısa bölgəyə məxsusdur. Onların da brendini yaratmaq olar”.
Həmsöhbətimizin sözlərinə görə, bir sıra ərzaq növlərinin, o cümlədən, çörək brendinin yaradılması dövlətin nəzarətindədir: “Məlumdur ki, aparılan işlər sayəsində lavaş UNESCO səviyyəsində qəbul olundu. Bu səbəbdən də Azərbaycana məxsus olan “lavaş” çörək brendinin yaradılmasına böyük ehtiyac var.
Azad İstehlakçılar Birliyinin sədri Eyyub Hüseynov bizimlə söhbətində bildirdi ki, Azərbaycana məxsus olan çörək növləri çoxdur. Hər bölgənin özünə aid çörəyi var. Danılmaz faktdır ki, o çörəklərə nəinki bölgələrdə, istənilən ərazidə böyük tələbat var. Bu səbəbdən də ekspert hesab edir ki, bölgələrə məxsus olan çörəklərin ayrı-ayrılıqda brendi yaradıla bilər.
Birlik sədri onu da vurğuladı ki, azad bazar iqtisadiyyatı olan ölkədə yeni çörək növləri yarana bilər. Həmin çörəklərin də brendi yaradıla bilər.
Günel CƏLİLOVA
