Kəmalə Ağazadə: “Övladlığagötürmə sahəsində idarəetmənin təkmilləşdirilməsi uşaq evlərində valideyn himayəsindən məhrum olmuş körpələrin sayının azalmasına səbəb olacaq”
Prezident İlham Əliyev övladlığagötürmə sahəsində idarəetmənin təkmilləşdirilməsi ilə bağlı tədbirlər haqqında Fərman imzalayıb. Fərman övladlığagötürmə sahəsində idarəetmə mexanizminin, valideyn himayəsindən məhrum olmuş və övladlığa götürülən uşaqların, habelə onları övladlığa götürməyi arzu edən şəxslərin uçotunun təkmilləşdirilməsi, eləcə də övladlığagötürmə prosesində şəffaflığın təmin edilməsi, övladlığa götürülmüş uşaqların yeni ailələrdə yaşaması və inkişafı prosesinə nəzarətin gücləndirilməsi məqsədilə imzalanıb.
Fərmana əsasən, övladlığagötürmə sahəsində dövlət siyasətini və tənzimləməni, o cümlədən valideyn himayəsindən məhrum olmuş və övladlığa götürülən uşaqların və onları övladlığa götürməyi arzu edən şəxslərin (Azərbaycan Respublikası vətəndaşlarının, əcnəbilərin və vətəndaşlığı olmayan şəxslərin) vahid uçotunun elektron qaydada aparılmasını, övladlığagötürmənin əsaslandırılmasını və övladlığa götürülən uşağın mənafeyinə uyğunluğu haqqında rəy verilməsini, Azərbaycan Respublikasının vətəndaşı olan uşaqları əcnəbilərin və ya vətəndaşlığı olmayan şəxslərin övladlığa götürməsinə razılıq verilməsini və həmin şəxslərə hüquqi yardım göstərən akkreditə edilmiş orqanın müəyyənləşdirilməsini, habelə övladlığagötürmənin ləğvinin tələb edilməsini, övladlığagötürmə sahəsində vahid nəzarəti, eləcə də əcnəbilər və vətəndaşlığı olmayan şəxslər tərəfindən övladlığa götürülmüş Azərbaycan Respublikası vətəndaşı olan uşaqların həyat şəraiti ilə bağlı nəzarət tədbirlərini Əmək və Əhalinin Sosial Müdafiəsi Nazirliyi həyata keçirəcək.
Övladlığagötürmə sahəsində idarəetmənin təkmilləşdirilməsi və bu sahədə nələrin dəyişməsini öyrənmək məqsədilə mütəxəssislərə müraciət etdik.
Azərbaycan Uşaqlar Birliyinin sədri Kəmalə Ağazadə “Bakı-Xəbər”ə açıqlamasında qeyd etdi ki, ölkədə vahid uçot bazasının olmaması övladlığa uşaq götürmək istəyən ailələrdə müəyyən çaşqınlıq yaradırdı. Çünki həmin ailələr hansı quruma müraciət edəcəklərini dəqiq bilmirlər: “Elektron müraciətlərin olmasına böyük ehtiyac var. Məlumdur ki, 3 yaşa qədər uşaqların övladlığa götürülməsi prosesini Səhiyyə Nazirliyi həyata keçirirdi, 3 yaşdan yuxarı isə Təhsil Nazirliyi tərəfindən icra olunurdu. Əcnəbilər tərəfindən azərbaycanlı uşaqların övladlığa götürülməsi Ailə, Qadın və Uşaq Problemləri üzrə Dövlət Komitəsi tərəfindən həyata keçirilirdi. Bu hal uşaqların övladlığa verilməsində müəyyən problemlər yaradırdı. Ancaq indi vəziyyət müsbətə doğru dəyişəcək. Övladlığa verilmə ilə bağlı vahid baza tərtib olunacaq. Vahid bazanın olması insanların müraciət formasını asanlaşdıracaq”.
Həmsöhbətimizin sözlərinə görə, övladlığa uşaq götürmə olduqca həssas məsələdir. Ailələrə uşaq verilməsi düzgün istiqamətdə aparılarsa, valideynlər bu sahədə çətinlik çəkməzlər.
K.Ağazadə hesab edir ki, övladlığagötürmə sahəsində idarəetmənin təkmilləşdirilməsi uşaq evlərində valideyn himayəsindən məhrum olmuş körpələrin sayının azalmasına səbəb olacaq.
Birlik sədri onu da vurğaladı ki, övladlığagötürmə sahəsində vahid nəzarətin Əmək və Əhalinin Sosial Müdafiəsi Nazirliyinə verilməsi olduqca müsbət qərardır.
Günel CƏLİLOVA
