İlqar Orucov: “Bu onların fəaliyyətlərinin stimullaşdırılması məsələsində olduqca vacib addımlardan biri olacaq”
Son zamanlar gənc alimlərin, elmi işçilərin sosial vəziyyətinin yaxşılaşdırılması üçün aidiyyəti qurumlar tərəfindən müxtəlif addımlar atılır. Hazırda gənc alimlərin sosial vəziyyətini yaxşılaşdırmaq məqsədilə onlara güzəştli kreditlərin verilməsi məsələsi gündəmdədir.
Azərbaycan Milli Elmlər Akademiyasının (AMEA) prezidenti, akademik Akif Əlizadənin verdiyi məlumata görə, Azərbaycan Respublikasının Nazirlər Kabinetində gənc alimlərin sosial vəziyyətini yaxşılaşdırmaq məqsədilə onlara güzəştli kreditlərin verilməsi məsələsinə baxılır.
A.Əlizadə bildirib ki, 2019-cu ilin yanvar-mart aylarından başlayaraq, gənc alimlərə güzəştli kreditlərin verilməsi nəzərdə tutulur.
Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov bizimlə söhbətində bildirdi ki, gənc alimlərin sosial vəziyyətlərinin yaxşılaşdırılması ilə bağlı çalışırlar. Bu barədə həm dövlət qurumlarına, həm də digər təşkilatlara müraciətlər etdiklərini deyən İ.Orucovun sözlərinə görə, gənc alimlərin sosial müdafiəsinin gücləndirilməsi, onların problemlərinin həll olunması ilə bağlı görülməli olan işlər çoxdur. “Hesab edirəm ki, bu sahədə müvafiq dövlətlərin təcrübəsini öyrənmək çox vacibdir. Məsələn, biz bu sahədə vaxtilə Qazaxıstan, Rusiya təcrübəsini öyrənmişdik. Prezidentin ehtiyat fondundan vəsaitlər ayrılır və vəsait hesabına gənc alimlərə mənzillər tikilir və s. Akademiyanın yataqxanası vardı və bərbad vəziyyətdə olan həmin o yataqxananın yerində bir müddət əvvəl bir neçə çoxmərtəbəli binanın tikilməsi məsələsini qaldırdıq. Onda Akademiyanın prezidenti Mahmud Kərimov idi. Təklifimiz əsasında orada 3 bina tikildi və bildirildi ki, buradakı mənzillər həmin yataqxanada yaşayan adamlara və ehtiyacı olan gənc alimlərə verilsin. Biz o vaxt araşdırıb üzə çıxardıq ki, 161 nəfər gənc alimin mənzilə ehtiyacı var və bu evlərin onlara pulsuz paylanması məsələsi qaldırıldı. Ancaq reallıq bu oldu ki, həmin mənzillər yaşlı alimlərə verildi. Halbuki, onların hər birinin bir neçə evi vardı. Alimlərin sosial problemlərinin həll edilməsi üçün kreditlərin verilməsi məsələsi reallaşarsa, bu müsbətdir, lakin gərək burada şəffaflıq təmin olunsun. Gənc alimlər mənzil məsələsində yaşadıqları problemləri burada yaşamasınlar. Gənc alimlərlə bağlı görüləcək istənilən işi, qəbul edilən proqramı təqdir edirik. Burada əsas məsələ obyektivliyin, şəffaflığın təmin olunması ilə əlaqədardır. Kredit və alimlərin sosial vəziyyətinin düzəlməsinə yönələn digər işlərdə şəffaflıq təmin olunmasa, biz yüksək nəticədən danışa bilmərik” - deyə bildirən İ.Orucovun sözlərinə görə, bu gün gənc alimlərin əməyinin stimullaşdırılmasına, yeni elmi məktəblərin yaradılmasına ciddi ehtiyac var. Bu istiqamətdə nə qədər çox addım atılsa, bir o qədər yaxşıdır. “Fikrimcə, kreditlər də verilərkən kimlərə verilməsi əvvəlcədən müəyyənləşməlidir ki, bundan yalnız ehtiyacı olanlar yararlansınlar. Bilirsiniz ki, Azərbaycanda kreditlərin verilməsi, maaş, tələbə-kredit kartının hazırlanması buna hesablanır ki, ölkəmizdə yeni savadlı kadrlar yetişsin və onların daha yüksək səviyyədə inkişaf etməsi üçün dövlət sərmayə qoysun. Bütövlükdə götürdükdə gənc alimlərə kreditlərin verilməsi faydalı məsələdir. Bu onların fəaliyyətlərinin stimullaşdırılması məsələsində olduqca vacib addımlardan biri olacaq” - deyə İ.Orucov bildirdi.
İradə SARIYEVA
