Kamran Əsədov: “... müasir standartlara cavab verəcək səviyyədə dərs keçə bilmir” “Ona görə də məktəbəhazırlıq qruplarında məşğələlər aparan ibtidai sinif müəllimləri üçün yekun qiymətləndirmənin keçirilməsini müsbət hal kimi qiymətləndirirəm”
İbtidai sinif müəllimlərinin bilik və bacarıqlarının, o cümlədən də psixoloji vəziyyətlərinin yoxlanılması üçün təşkil edilən qiymətləndirmə bu müəllimlərin gələcək fəaliyyətində əsas rol oynayacaq. Məlumatlara görə, paytaxtdakı ümumtəhsil müəssisələrinin məktəbəhazırlıq qruplarında məşğələlər aparan ibtidai sinif müəllimləri üçün yekun qiymətləndirmə keçirilib.
Bakı Şəhəri üzrə Təhsil İdarəsinin yaydığı məlumata görə, imtahanda Təhsil İşçilərinin Peşəkar İnkişafı İnstitutu (TİPİİ) tərəfindən təşkil olunmuş ixtisasartırma təlimlərini başa vuran 875 ibtidai sinif müəllimi iştirak edib.
Müəllimlər 40 dəqiqə vaxt ərzində iki variantdan ibarət 25 test sualını cavablandırıblar. Onu da bildirək ki, imtahanda iştirak edən müəllimlərə dövlət nümunəli ixtisasartırma sertifikatları təqdim olunacaq.
Qeyd edək ki, “Məktəbəhazırlıq qruplarında işin təşkili metodikası” proqramı üzrə təşkil edilmiş təlimlər Təhsil Nazirliyinin sifarişi ilə “Təhsildə İnnovativ Texnologiyalar” Əlavə Təhsil Mərkəzi tərəfindən həyata keçirilib. Təlimlərin əsas məqsədi uşaqların erkən yaş dövründən intellektual, fiziki və psixoloji inkişafını, sadə əmək vərdişlərinə yiyələnməsini, istedad və qabiliyyətinin üzə çıxarılmasını, sağlamlığının qorunmasını, estetik tərbiyəsini, təbiətə və insanlara həssas münasibətinin formalaşmasını təmin etmək üçün məktəbəhazırlıq qruplarında məşğələlər keçən müəllimlərdə zəruri bacarıqlar formalaşdırmaqdan ibarətdir.
Onu da deyək ki, bəzi müəllimlər imtahan suallarının çətin olduğundan şikayətlənir və onların fikrincə, müəllimlərin bu qədər sorğu-suala çəkilməsi doğru deyil.
İbtidai sinif müəllimlərinin qiymətləndirilməsi ilə bağlı keçirilən imtahanların nəticələri qaneedici səviyyədədirmi?
Mövzunu şərh edən tanınmış təhsil eksperti Kamran Əsədov “Bakı-Xəbər”ə bildirdi ki, bu imtahanların təşkil edilməsinin mənfi deyil, müsbət tərəfləri var: “İlk növbədə qeyd edim ki, hazırda Azərbaycan Respublikasında bir çox sahələrdə olduğu kimi, təhsil sahəsində də köklü islahatlar həyata keçirilir. Bu islahatların əsas məqsədi cəmiyyətin ehtiyac və tələbləri nəzərə alınmaqla, təhsilin keyfiyyətini yüksəltmək və onun inkişafını təmin etməkdir. Bununla əlaqədar təhsilin keyfiyyətini şərtləndirən amillərə, ilk növbədə təhsilin məzmununa, müəllim hazırlığına və qiymətləndirmə sistemlərinə yenidən baxılması zərurəti yaranıb. Amma etiraf edək ki, hazırda 4472 orta məktəbdə çalışan 151 min müəllimin heç də hamısı 1.6 milyon şagirdə tam şəkildə müasir standartlara cavab verəcək səviyyədə dərs keçə bilmir. Ona görə də hesab edirəm ki, istedadlı şagird üçün istedadlı müəllim seçməyə ehtiyac var. İstedadlı şagirdlərin formalaşması məktəbəqədər təhsil və ibtidai sinif səviyyəsində baş verdiyi üçün, bu pillədə çalışanlara daha çox diqqət yetirmək lazımdır.
Bu tip imtahanların əsas məqsədi istedadlı şagirdlərlə işləyəcək pedaqoji kollektivi müəyyənləşdirmək, onların müxtəlif layihələrə cəlb olunmaqla pedaqoji və akademik bacarıqlarının inkişafını təmin etməkdir”.
O vurğuladı ki, son 5 il ərzində ölkəmizdə müasir təhsil quruculuğu istiqamətində uğurlu addımlar atılıb və Azərbaycan təhsilinin dünya təhsil sisteminə inteqrasiyası sürətlənib. Ona görə də təhsil sistemi müasir çağırışlara cavab verən kadrlara daha çox ehtiyac duyur. “Müəllim sözü həmişə kamillik, ləyaqət, bütövlük simvolu kimi mənəvi keyfiyyətləri ifadə edib və bu dəyərlərin işığında yetişən nəsillər hər zaman öz layiqli müəllimlərinə bənzəməyə çalışıblar. Amma təəsüf ki, son illər müəllimlərin bilik və bacarıqlarının yaxşı səviyyədə olmadığının şahidi olmuşuq.
2014-2017-ci illərdə keçirilən müəllimlərin bilik və bacarıqlarının diaqnostik qiymətləndirilməsində iştirak edəm 142 min müəllimin 45 faizə qədərinin nəticəsi 50 faiz olub ki, bu da aşağı nəticədir. Ona görə də məktəbəhazırlıq qruplarında məşğələlər aparan ibtidai sinif müəllimləri üçün yekun qiymətləndirmənin keçirilməsini müsbət hal kimi qiymətləndirirəm və bu qiymətləndirmələrin mütəmadi olaraq keçirilməsini tövsiyə edirəm” - deyə K.Əsədov bildirdi.
İradə SARIYEVA
