Məhərrəm Zülfüqarlı: “Əlavə vəsait cəlb etmək üçün təhsil müəssisələrində istehsal edilən məhsulların qanun çərçivəsində satışı həyata keçirilə bilər”
Ölkədə ümumtəhsil müəssisələri sahibkarlıq fəaliyyəti ilə məşğul ola bilər. Bu barədə məsələ Milli Məclisin (MM) Elm və təhsil komitəsinin iclasında müzakirəyə çıxarılan yeni hazırlanmış “Ümumi təhsil haqqında” qanun layihəsində əksini tapıb.
Qanun layihəsinə əsasən, ümumtəhsil müəssisəsi əlavə gəlir əldə etmək məqsədilə profilinə və fəaliyyət istiqamətlərinə uyğun olaraq və təhsilin prioritetliyini əsas götürməklə müvafiq icra hakimiyyəti orqanının müəyyən etdiyi sahibkarlıq fəaliyyəti növləri ilə (ödənişli təhsil xidmətləri, yardımçı təsərrüfatlardan əldə olunan məhsulların, şagirdlərin əl işlərinin satışından və icarədən əldə olunan gəlirlər və s.) məşğul ola bilər.
Sahibkarlıq və innovasiya fəaliyyətini təmin etmək üçün ümumtəhsil müəssisəsinin nəzdində müvafiq istehsalat və xidmət sahələri yaradıla bilər. Dövlət ümumtəhsil müəssisələrinin innovasiya və sahibkarlıq fəaliyyətinin həyata keçirilməsi məqsədilə yerli və xarici investisiyaların cəlb edilməsinə əlverişli şərait yaradır.
Qeyd edək ki, ümumtəhsil müəssisəsi sahibkarlıq fəaliyyətindən əldə etdiyi gəlirlərdən mövcud qanunvericiliklə müəyyən edilmiş qaydada sərbəst istifadə etmək hüququna malikdir. Dövlət ümumtəhsil müəssisəsinin sahibkarlıq fəaliyyətindən əldə etdiyi gəlirlər bilavasitə təhsilin inkişafına və işçilərin sosial müdafiəsinə yönəldilir.
Məlumat üçün bildirək ki, bir sıra xarici ölkələrdə təhsil müəssisələri sahibkarlıq fəaliyyəti ilə məşğul olurlar. Məktəblilərin əl əməyindən hazırlanan işlər satışa çıxarılır. Həmçinin, ödənişli təhsil xidmətlərinin olması sahibkarlıq fəaliyyətinin inkişafına səbəb olacaq.
Təhsil eksperti Məhərrəm Zülfüqarlı “Bakı-Xəbər”ə açıqlamasında qeyd etdi ki, orta məktəblərin sahibkarlıq fəaliyyəti ilə məşğul olması həm təhsilin inkişafına, həm də iqtisadiyyata müsbət təsir edər: “Ancaq burada şagirdlərin diqqətinin daha çox əmək vərdişinə yönləndirilməsi düzgün olmaz. Əmək təlimi dərslərini şəraitə uyğun olaraq bir qədər artırmaq olar. Ancaq əmək təlimi dərslərinin sayını artırmaq əsas fənlərin sayını azaltmaq hesabına olmamalıdır. Məktəblərdə şagirdlər arasında sorğu keçirilməlidir. Sorğu əsasında şagirdlərin əmək təliminə marağının yüksək olması aydınlaşarsa, o zaman həmin təhsil müəssisəsində qeyd olunan fənn artıq tədris oluna bilər”.
Ekspertin sözlərinə görə, əlavə vəsait cəlb etmək üçün təhsil müəssisələrində istehsal edilən məhsulların qanun çərçivəsində satışı həyata keçirilə bilər.
Günel CƏLİLOVA
