Adil Qeybulla: “Un və ya un məmulatlarının yodlaşdırılması bütün ölkəni deyil, konkret regionu əhatə etməlidir” Tahir Əmiraslanov: “Un və un məmulatlarının yodlaşdırılmasına ehtiyac var”
Yaxın zamanlarda parlamentə yeni qanun layihəsinin daxil olması gözlənir. Bu, un və un məhsullarının yodlaşdırılması ilə bağlı qanunvericilik aktıdır. Bu barədə millət vəkili Məlahət İbrahimqızı media nümayəndələrinə məlumat verib.
O qeyd edib ki, belə bir qanuna ciddi ehtiyac var: “Çünki son illər Azərbaycanda, xüsusilə dünyaya yeni gələn körpələrdə, uşaqlarda, yeniyetmələrdə ciddi problemlər ortaya çıxmaqdadır. Xüsusilə boy, çəki məsələsində ciddi problemlər var. Dünyada boy və çəki məsələsində artım olduğu halda, Azərbaycanda boy hündürlüyü məsələsində xeyli geriləmə var.
Uşaqlar, yeniyetmələr arıq, cılızdırlar. Bunun qarşısının alınması üçün dünyadakı təcrübədən, un və un məhsullarının yodlaşdırılmasından istifadə zərurəti yaranıb. Odur ki, məndə olan məlumata görə, yaxın zamanlarda parlamentə un və un məhsullarının yodlaşdırılması ilə bağlı qanun layihəsinin daxil olması gözlənir. Hesab edirəm ki, bu qanunun qəbulundan sonra ortada olan problemlər, az da olsa, öz müsbət həllini tapa bilər”.
Maraqlıdır, un və un məmulatlarının yodlaşdırılması nə dərəcədə əhəmiyyətlidir? Ümumiyyətlə, qeyd olunan məhsulların yodlaşdırılması yeni dünyaya gələn və ya gələcək uşaqların sağlamlığına necə təsir edəcək?
Bu və digər suallara cavab tapmaq məqsədilə ekspertlərə müraciət etdik.
Professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, un və un məmulatlarının yodlaşdırılmasına ehtiyac yoxdur: “Yod çatışmazlığı bəzi bölgələrdə mövcuddur. Şimali Qafqazda çıxan suda yod çatışmır. Sovet dönəmində həmin bölgələrə idxal olunan duz yodlaşdırılmış olurdu. Ancaq unutmaq lazım deyil ki, yodlaşdırılmış duzu uzun müddət saxlamaq olmaz. Çünki yod uçucudur. Unun yodlaşdırılmasına isə ehtiyac yoxdur. Duzun yodlaşdırılması prosesi effektli aparılarsa, insanların qida rasionuna kifayət qədər duz əlavə olunar. Belə olarsa, yod çatışmazlığı xəstəliklərinin qarşısı alınar”.
Həmsöhbətimizin sözlərinə görə, un məmulatlarının yodlaşdırılması bütün ölkə üzrə deyil, konkret regionu əhatə etməlidir. Çünki heç də bütün regionların duza ehtiyacı yoxdur: “Nəzərə almaq lazımdır ki, Kiçik Qafqaz dağlarındakı suyun tərkibində yod miqdarı yetərincədir. Ancaq Şimali Qafqazda isə vəziyyət əksinədir”.
Ekspert onu da bildirdi ki, un məhsulları yodlaşdırılarsa, o zaman təam bişən zaman effekt verməyəcək. İnsanların tərkibi yodlu çörəyə alışması heç də asan olmayacaq.
Milli Kulinariya Mərkəzinin rəhbəri Tahir Əmiraslanov hesab edir ki, un və un məmulatlarının yodlaşdırılmasına ehtiyac var. Məlumdur ki, hazırda duz yodlaşdırılıb: “Un və un məhsulları yodlaşdırılarsa, bunun insan sağlamlığına müsbət təsiri olar. Bu sahədə müəyyən işlər aparılmalıdır”.
Günel CƏLİLOVA
