Zəm-zəm suyu və onun tarixi haqqında qismən də olsa hər kəsin məlumatı var. Tarix boyu bir çoxları zəm-zəm suyunu adi quyu suyu olaraq qəbul etsə də, aparılan araşdırmalar onun qəribə xüsusiyyətlərini üzə çıxarıb.
Elm adamları quyuda araşdırmalar apararkən ilk növbədə suyun gözünü axtarıb tapmaq istəyiblər, fəqət nə qədər axtarsalar da suyun mənbəyini tapmaq mümkün olmayıb. Suyun mənbəyini tapmaq üçün yeganə bir yol qalırdı – güclü nasoslarla quyu suyunun tam çıxarılması. Çox qəribədir ki, son dəfə quyuya enib suyun mənbəyini tapmağa cəhd ediblər. Bu zaman qəribə bir şey ortaya çıxıb. Araşdırmaçılar quyunun dibində, ayaqlarının altındakı qumun tərpəndiyini hiss ediblər. Addım atılan hər yerdə bu hiss olunurdu. Zəm-zəm quyusunun dibi tam olaraq su fışqırırdı. Yalnız bundan sonra təzyiqlə çıxan bu su axınının qarşısında su nasoslarının niyə aciz qaldığını anlayıblar. Sonra təsdiq olunub ki, zəm-zəm quyusuna onun divarlarından heç bir su sızması yoxdur. Quyu ancaq dibindən – yerin təkindən çıxan suyun hesabına dolur. Bu isə qurunt suların quyuya axması ilə bağlı mövcud iddialara və qeyri-adi şübhələrə son qoymaq üçün kifayət idi. Beləliklə, analiz suyun içməyə tam yararlı olduğunu təsdiqləyib. Yarandığı gündən bəri bu quyunun suyu bir dəfə də olsun nə quruyub, nə də azalıb. Bu da bir həqiqətdir ki, zəm-zəm quyusu İbrahim peyğəmbərin zamanından bu günədək hər il zəvvarlara, Məkkə və Mədinə şəhərlərinə milyon tonlarla su verməkdədir. Quyunun başqa qəribəliklərindən biri də, digər quyulardan fərqli olaraq, divarlarında mamır və başqa bitkilərin bitməməsidir.
Adı Ümumdünya Səhiyyə Təşkilatının hesabatlarında çəkilən, mənbəyi bilinməyən suyun dənizdən 80 kilometr uzaqda olmasına və ətrafında başqa bir su mənbəyinin olmamasına baxmayaraq, minillərdir qurumaması alimləri çaş-baş edir. Sadəcə 1,5 metr dərinliyindəki quyudan həcc mövsümündə milyonlarla hacı bütün su ehtiyacını qarşılayarkən, su səviyyəsində heç bir azalma olmur. İçənin susuzluğunu və hətta açlığını belə aradan qaldıran bu suyun sirri uzun illərdir elmi müəssisələr və tanınmış alimlər tərəfindən araşdırılır.
Alman professoru Pfeyler zəm-zəmlə tanış olduğu gündən etibarən suyun üzərində bir çox tədqiqat işləri aparıb. Onun dediyinə görə, “Bu su heç bir şərt altında dəyişmir, amma dəyişdirir. Maraqlı bir test etdim. Bir damla zəm-zəm suyuna 100 damla normal su qarışdırdım. Sonra gördüm ki, suyun hamısı zəm-zəm olub. Sonra bir damla zəm-zəm suyuna min damla normal su qarışdırdım və eyni nəticə əldə etdim. Zəm-zəmdə böyük bir enerji var. Başqasını dəyişdirər, amma özü dəyişməz”. Doğrusu, bir alman professorunun əldə etdiyi bu nəticə insanlığa çox şey deməlidir!
Yapon alimi Masaru Emoto isə zəm-zəm kristallarını mikroskop görüntüsündə araşdırıb.
Dr.Masaru zəm-zəm kristallarının zəng səsində qaraldığını, Quran və azan səsində isə parladığını qeyd edib. Onun apardığı araşdırmalar nəticəsində yazdığı yazılarında qeyd olunur ki, zəm-zəmin kristalları bir növ Kəbə evini xatırladır. Bu görkəmli elm xadimi bildirib ki, zəm-zəm suyu fiziki və kimyəvi tərkib baxımından yer üzərindəki bütün sulardan fərqlənir.
Zəm-zəm suyunun xeyri elmi cəhətdən isbat edilsə də, bu su elmin izah edə bilməyəcəyi
bir çox möcüzələri özündə birləşdirir. İçilməsi savab sayılan bu müqəddəs suyun şəfaəti bütün dünyada dillər əzbəridir. Zəm-zəm suyunun baş ağrısını kəsməsi və gözü işıqlandırması da isbata ehtiyacı olmayan həqiqətlərdəndir. Amerikada aparılan araşdırmalarda isə zəm-zəm suyunun tərkibində mikroorqanizm və bakteriya olmayan yeganə su olduğu təsdiqlənib.
Bu da bir həqiqətdir ki, digər sulara nisbətən daha çox qidalandırıcı və mineral maddələrlə zəngin olan zəm-zəm suyunun quyusu yer üzərindəki ən müqəddəs torpaqlarda yerləşir. Məkkə şəhərində Məscidül-həramın ərazisində yerləşən bu quyu İslam dininin ən müqəddəs yeri sayılan Kəbədən 20 metr şərqdədir. İslam inancına görə, bu bulaq minillər əvvəl Hz.İbrahim peyğəmbərin körpə oğli İsmayıl susuzluqdan ağladığı vaxt möcüzəvi şəkildə Uca Yaradan tərəfindən yaradılıb. Baş verən hadisənin səbəbini izah edə bilməyən dünya şöhrətli alimlər bunun son dərəcə möcüzəli və qeyri-adi bir məqam olduğunu deyiblər.
Tarixi məlumatlara görə, Hz.İbrahim zövcəsi Həcəri və hələ anasını əmməkdə olan oğlu İsmayılı Uca Yaradanın əmri ilə Kəbənın olduğu yerə gətirir. O zaman orada nə insan, nə su, nə də bir həyat işartısı vardı. Ora daşlıq və bitkisiz bir yer idi. Hz.İbrahim qayıtmaq istədikdə Həcər onun ardınca qaçıb fəryad edir, fəqət İbrahim əleyhissalamın ona cavab vermədiyini gördükdə: “Səni Özünə dost tutan Cənab Haqqın xətrinə söylə, bizi burada Uca Yaradanın əmriləmi buraxıb gedirsən?”– deyir. İbrahim əleyhissəlam: “Bəli”– deyir. Bunu eşitdikdə Hz.Həcər susur və səmimi qəlbdən öz-özünə: “Elə isə Rəbbimiz bizi qoruyar, bizi sahibsiz buraxmaz”– deyir və əllərini səmaya doğru qaldırıb dua etməyə başlayır.
Tənha qalan Hz.Həcər ilk günü İbrahim əleyhissalamın onlar üçün buraxdığı xurmadan yeyib sudan içir, oğlunu əmizdirib ağlayır, göz yaşları axıdır. Su və xurma bitdikdə isə çaşıb-qalır, nə edəcəyini bilmir. Ortalıqda bir damla belə su yox idi. O, İsmayılı yerə yatırıb, bəlkə bir su görərəm ümidilə Səfa təpəsinə çıxır, fəqət heç bir şey görə bilmir. Sonra gedib Mərvə təpəsinə çıxır və o yüksək yerdən ətrafa baxır, fəqət yenə də bir şey görə bilmir. Səfa ilə Mərvə arasında 6 dəfə gedib-gəlir, yeddincidə Mərvə təpəsindən bir səs eşidir, baxır, fəqət ətrafda heç kəsi görmür. Ona səslənən Cəbrail əleyhissəlam idi. Uca Yaradanın elçisi: “Ey Həcər! Oğlunun yanına gəl. Haqq Təala onu ziyan etməz. Bir gün gələr, o bu yerdə atası ilə birlikdə Kəbəni inşa edər” – deyərək onu çağırırdı. Həcər oğlunun yanına gəldikdə orada Cəbrail əleyhissəlamı görür. Cəbrail əleyhissəlam: “İbrahim sizi bu kimsəsiz yerdə kimə əmanət etdi, ey Həcər?”– deyə sorduqda Həcər: “Allah Təalaya”– deyərək cavab
verir. Cəbrail əleyhissəlam isə: “İbrahim sizi elə bir gücə əmanət edib ki, O hər ikinizə kafidir. Allah Təala İbrahimin duasını qəbul edib, bu uşağın soyundan böyük bir millət çıxaracağını müjdələyir,”– deyir...
Bu vaxt Həcər canı qədər sevdiyi oğlunun topuğunun yerdə buraxdığı izdən su axdığını görür. Bu su zəm-zəm suyu idi. Hz.Həcər və oğlu bu sudan içir və Həcər tələm-tələsik su qabını da doldurmaq istədikdə Cəbrail əleyhissəlam: “Buna lüzum yoxdur, ey Həcər, qorxma. Haqq Təala bu suyu əskiltməyəcək, əksinə, çoxaldacaq. O bu məqamı ibadətgah edəcək və bu mübarək yerdə qiyamətə qədər ibadət ediləcək” - deyərək qeyb olur.
Bəli, zəm-zəm Uca Yaradanın möcüzələrindən biridir. Bunu quyunu araşdırarkən onun mənbəyinin tapılmaması da sübut edir. Quyuya su yerin dərinliklərindən gəlir və heç vaxt tükənmir. Hətta dünyanın hər yerində su qurusa belə, zəm-zəm tükənməz. O, dünyada olan hər bir insana yetər. Zəm-zəm suyu Avropa laboratoriyalarında incələndikdə öz möcüzəsi ilə hamını heyrətə gətirib. Belə ki, zəm-zəm suyunun tərkibində başqa sulara nisbətən kalsium və maqnezium daha çoxdur. Bu isə susuzluğu aradan qaldırır. Ən maraqlısı isə budur ki, zəm-zəm suyu mikrobları məhv edən xlorla da zəngindir. Bu isə onun qeyri-adiliyini göstərir:
1. Zəm-zəm suyu tərkibində ən az kükürd olan sudur.
2. Başqa sulardan fərqli olaraq minerallarla zəngindir.
3. Zəm-zəm suyunun mənbəyi hələ də tapılmayıb.
4. Yaxınlığında heç bir quyu yoxdur və dənizdən 80 km uzaqdadır. Belə ki, suyun dənizdən, yaxud başqa bir quyudan gəlmə ehtimalı yoxdur.
5. Aclıq üçün içən insanın aclığını, susuzluq üçün içən insanın susuzluğunu aradan qaldırır.
6. 1,5 metr dərinliyində olan kiçik bir quyudan çıxan zəm-zəm suyu həcc mövsümü boyunca bütün ziyarətçilərin su ehtiyacını təmin edir.
7. Suyu heç vaxt azalmır, eyni səviyyədə qalır.
8. Zəm-zəm suyu tərkibində mikro-orqanizm və bakteriya olmayan yeganə sudur.
Minillərdir ki, bu su öz keyfiyyətini itirmir, qoruyur, suyun həcmi azalmır, onun tərkibinə heç vaxt xlor əlavə edilmir. İllərlə saxlansa belə xarab olmur, öz keyfiyyətini quyudan təzə çıxmış kimi saxlayır.
Yaxşı, müqəddəs sayılan zəm-zəm suyu və quyusu üçün elm nə deyir? Zəm-zəm quyusu haqqında elmi araşdırmalar aparmaq üçün 35 il əvvəl bir İnstitut qurulub. Uzun illərdir dünyanın çoxsaylı yeraltı suları üzrə mütəxəssislərindən biri olan prof.Zekai Şen zəm-zəm araşdırmaları İnstitutunun idarəçiliyini edir. Prof.Zekai Şen 500 nəfərlik bir qrupla ilk tarixindən bu günədək zəm-zəm suyunu və bu suyun keyfiyyəti və xüsusiyyətlərini araşdırır. Dünyanın ən quraqlıq bölgələrindən biri olan Ərəb yarımadasının ən quraqlıq vadisində bu keyfiyyətdə, bu bolluqda olan bir suyun 1,5 metr diametrindəki bir quyudan çıxmasının möcüzəvi bir hadisə olduğunu dilə gətirən prof.Zekai Şen zəm-zəm quyusunun minillərdir su verməyə davam etdiyini, lakin suyun azalmadığını, zəm-zəm quyusunun tam olaraq qaynağının hara olduğunun hələ də sirr olaraq qaldığını açıqlayır.
Minlərlə illər ərzində milyonlarla kubmetr su çəkilən 1,5 metr genişliyindəki zəm-zəm quyusunun qaynağının hələ də tapılmaması möcüzə olaraq qiymətləndirilir. Uzun müddəti əhatə edən elmi araşdırmalar isə o qənaətə gəlməyə əsas verir ki, zəm-zəm suyunun bitmə ehtimalı yoxdur. Belə demək olarsa, bu quyu dərya kimidir. Mənbəyi bilinmir, amma bitməz-tükənməz miqdarda su gəlməyə davam edir. Nə qədər çəkirsənsə quyu o qədər su verir. Bütün bunlar insanlığa bir şey demirmi?
Fazil QARAOĞLU Professor
