Könül Vaqifqızı: “Psixoloji yardıma ehtiyacı olan insanların rahat və effektli şəkildə yardım alması üçün qeyd olunan qanunun qəbul olunması əhəmiyyətlidir”
Azərbaycanda uzun müddətdir müzakirə edilən "Psixoloji yardım haqqında" qanun layihəsi artıq hazırdır. Milli Məclisin Səhiyyə komitəsinin sədr müavini Musa Quliyev media nümayəndələrinə açıqlamasında qeyd edib ki, qanun layihəsi Səhiyyə komitəsi tərəfindən hazırlanıb, müzakirələrdən keçib, müxtəlif əlaqədar nazirliklərdən, dövlət komitələrindən müsbət rəylər alınıb, aidiyyəti üzrə qeyri-hökumət təşkilatları, müxtəlif psixoloji mərkəzlərdə çalışan psixoloqlar qanun layihəsi ilə bağlı dinləmələrdə iştirak ediblər, işçi qrupunun tərkibində olublar.
Qanun layihəsinin mahiyyətinə toxunan M.Quliyev qeyd edib ki, Azərbaycanda hələ Sovet dövründən psixoloji yardım göstərilir: "Sovet dövründən böyük zavodlarda, fabriklərdə psixoloq ştatları olurdu, o cümlədən ali məktəblərdə, orta təhsil müəssisələrində psixoloji yardım göstərilirdi. Bu gün də istər dövlət, istərsə də özəl müəssisələrdə psixoloq xidmətləri var, kifayət qədər özəl psixoloji kabinetlər, psixoloq yardımı mərkəzləri fəaliyyət göstərir. Ancaq bunların hamısı pərakəndə şəkildə işləyir, psixoloqların peşə tələbləri standartı yoxdur. Bu baxımdan qanun layihəsində kimin psixoloq ola bilməsi, kimin hansı sahədə psixoloji yardım göstərə bilməsi, psixoloji yardımın kriteriyaları və s. məsələlər öz əksini tapıb".
Ekspertlər də “Psixoloji yardım haqqında” qanun layihəsinin qəbul olunmasının vacib olduğunu bildirirlər. Onların fikrincə, bu gün hər kəs psixologiya sahəsi ilə məşğul olur. Bu səbəbdən də bu sahə xüsusi nəzarətə götürülməlidir.
Psixoloq Könül Vaqifqızı “Bakı-Xəbər”ə açıqlamasında qeyd etdi ki, ölkədə hər kəs psixologiya sahəsi ilə məşğul ola biləcəyini düşünür: “Ölkədə psixoloji yardımla bağlı mövzunun qabardılması kifayət qədər önəmli bir məsələdir. Psixoloji yardıma ehtiyacı olan insanların rahat və effektli şəkildə yardım alması üçün qeyd olunan qanunun qəbul olunması əhəmiyyətlidir. Ümumiyyətlə, əhalinin bugünkü durumunda psixoloji yardıma ciddi şəkildə ehtiyacı var. Amma psixoloqlar bu sahədə müəyyən standartlara cavab verməlidirlər. Bəzən bir çox insan uzun zaman öncə aldığı diplomu istədiyi zaman götürüb psixoloji mərkəz aça biləcəyini düşünür. Ancaq o şəxslərin nə təcrübəsi, nə də bu istiqamətdə işləmək üçün lazım olan savadı var. Düşünür ki, o da bu sahədə öz fəaliyyətini təşkil edə bilər. Onların meydana rahat şəkildə daxil ola bilməmələri üçün mütləq müəyyən qaydalar tətbiq edilməlidir. Bunu tətbiq etməklə psixoloji yardım istiqamətində işlərini qurmaq istəyən şəxslər müəyyən qaydalara riayət etməli olacaqlar. Bu sahədə fəaliyyət göstərmək üçün təkcə nəzəri biliklər yetərli sayıla bilməz. Mütləq təcrübi biliklərə də sahib olmaq lazımdır”.
Həmsöhbətimiz onu da vurğuladı ki, bu gün istənilən şəxs psixoloq kimi fəaliyyət göstərir. Ancaq onların əksəriyyətinin peşə standartı yox səviyyəsindədir: “Psixoloq kimi çalışan şəxslər öz peşələrinin mahiyyətini tam dərk edə bilmirlər. Onlar psixoloji yardım göstərməkdə çətinlik çəkirlər. Çünki o tip şəxslər əsasən sosial şəbəkədə özlərinin reklamını aparırlar. Elə ki, iş ciddiləşir, o zaman onlar xəstəyə lazımi psixoloji yardım göstərə bilmirlər. Son zamanlar açılan özəl psixoloq xidmətlərinin sayı da artıb. Araşdırılsa, onların öz sahəsi üzrə təhsilinin olmadığı müəyyən olunar. Bu səbəbdən də hesab edirəm ki, qeyd olunan sahəyə nəzarətin gücləndirilməsi üçün “Psixoloji yardım haqqında” qanun qəbul olunmalıdır”.
Günel CƏLİLOVA
