Qadir Bayramlı: “Damazlıq təsərrüfatın yetərli olmaması və baytarlıq xidmətində olan çatışmazlıqlar qoyunçuluğun inkişafına təsir göstərir”
Qurban bayramı günlərində Kənd Təsərrüfatı Nazirliyinin dəstəyi ilə paytaxt və bölgələrdə diri heyvanların satış yarmarkaları fəaliyyətə göstərdi.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin yaydığı məlumatda qeyd olunur ki, yarmarkalarda ümumilikdə 35 minə yaxın qurbanlıq heyvan satışa çıxarılıb. Satış üçün nəzərdə tutulan 20 min baş heyvan Kənd Təsərrüfatı Nazirliyi ilə Dövlət Gömrük Komitəsinin iri sahibkarlara tövsiyəsi əsasında qonşu ölkələrdən, əsasən də Gürcüstan Respublikasından gətirilib. Qonşu ölkələrdən xırdabuynuzlu heyvanların gətirilməsində məqsəd bazarda bolluq yaratmaq, qiymətləri sabitləşdirməkdir. Yarmarkalara çıxarılan qurbanlıq qoyunun 15 mini isə yerlidir.
Nəzərə almaq lazımdır ki, Azərbaycan kənd təsərrüfatı ölkəsidir. Maraqlıdır, yerli xırda buynuzlu heyvanlar tələbatı niyə ödəmir? Tələbatın ödənilməsi üçün nə kimi işlər görülməlidir?
Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, Azərbaycanda qoyunçuluğun inkişafına dair tarixi ənənələr olub. Tarixən Azərbaycan qoyunçuluqla məşğul olan ölkə kimi tanınıb: “Bu sahənin inkişafı üçün imkanlar olmaqla yanaşı, xeyli məhdudiyyətlər var. İlk olaraq bildirim ki, örüş imkanları məhduddur. Kiçik baş heyvançılıqda örüş önəmli məsələdir. Digər problem yaylaqlarımızın önəmli bir hissəsinin işğal altında olmasıdır.
Eyni zamanda, qoyunçuluqda damazlıq təsərrüfatın yetərli olmaması və baytarlıq xidmətində olan çatışmazlıqlar qoyunçuluğun inkişafına təsir göstərir.
Onu da deyim ki, qurbanlıq heyvanların satılmasında müəyyən vasitəçilərin rolu var. Vasitəçilərin olması qiymətə də təsir edir”.
Həmsöhbətimiz hesab edir ki, Azərbaycanda təsərrüfat intensiv şəkildə qurularsa, bunlara ehtiyac olmayacaq. Qoyunçuluğun inkişafı üçün bu sahəyə münasibət dəyişməlidir.
Q.Bayramlının sözlərinə görə, respublikada 8 milyona yaxın kiçik baş heyvan var. Onlar ölkənin ət tələbatını ödəyir, ancaq bu yetərli deyil: “Yem bazasının, yaylaqların məhdud olması, sərmaye tərəfdən fermerlərin sıxıntı çəkməsi bu sahəyə öz təsirini göstərir. Bunlar qoyun ətinin qiymətinə də təsir göstərir”.
Ekspertin fikrincə, kənd təsərrüfatı imkanlarından səmərəli istifadə olunarsa, Azərbaycanda idxal qoyuna ehtiyac qalmaz. Hətta bu sahəni daha yaxşı inkişaf etdirə bilsək, xarici ölkələrə kiçik baş heyvan ixrac etmək mümkün olar.
Günel CƏLİLOVA
