Əliməmməd Nuriyev: “Cinayət işində göstərilir ki, sürüşmə tək texnogen hadisələr nəticəsində baş verməyib, sürüşmənin sürətlənməsində...”
Məlum olduğu kimi, Bakı Televiziya Qülləsindən 200-250 m. cənub-şərqdə yerləşən Bayıl sürüşmə sahəsi bu ilin yanvar ayından aktivləşib. Fevralın 10-da baş verən son sürüşmə prosesi zamanı 4 ev tam, 1 ev qismən dağılıb. Sürüşmə sahəsində 30 metr uzunluğunda, 12 metr dərinliyində çatlar yaranıb.
Bayıl sürüşmə sahəsində vəziyyətlə bağlı Nazirlər Kabinetinin müvafiq sərəncamı imzalanıb. Həmin sərəncama əsasən, Bayıl yamacında sürüşmə təhlükəsi ilə bağlı ərazidən köçürülən 98 ailənin 11 ay ərzində müvəqqəti yerləşdiyi mənzillər üçün kirayə haqqının ödənilməsi məqsədilə Azərbaycan Respublikasının 2018-ci il dövlət büdcəsinin Ehtiyat Fondundan Səbail Rayon İcra Hakimiyyətinə müvafiq vəsait ayrılıb.
Bayıl yamacında baş verən sürüşmə ilə əlaqədar Bakı Şəhər Prokurorluğunun istintaq idarəsi tərəfindən Cinayət Məcəlləsinin vəzifə səlahiyyətlərindən sui-istifadə maddəsi ilə cinayət işi başlanıb. Hazırda cinayət işi üzrə zəruri istintaq tədbirləri davam etdirilir. Səbail Rayon İcra Hakimiyyətindən bildirilib ki, ərazidəki evlər qanunsuz, sənədsizdir və orada yaşayan əhalinin böyük hissəsinin pasport qeydiyyatı yoxdur. Burada xeyli sayda məcburi köçkün ailəsi də məskunlaşıb. Həmin evlər bir gecədə tikilib, möhkəm təməli olmayan gecəqondulardır.
Buna baxmayaraq, vətəndaşların mövqeyi nəzərə alınmaqla, dövlət tərəfindən 98 ailəyə 11 aylıq kirayə haqqı veriləcək. Ailə tərkibi 1-5 nəfər olanlara 200 manat, ailə tərkibi 6-7 nəfər olana 250 manat, ailə tərkibi 8 nəfərdən çox olanlara isə 300 manat kirayə haqqı müəyyən olunub.
Qeyd etdiyimiz kimi, Bayıl yamacında baş vermiş sürüşmə ilə əlaqədar cinayət işi açılıb. Açılan cinayət işinin nəticələrinin necə olacağını öyrənmək məqsədilə Konstitusiya Araşdırmalar Fondunun rəhbəri Əliməmməd Nuriyevə müraciət etdik. O, “Bakı-Xəbər”ə açıqlamasında qeyd etdi ki, Bayılda baş verən sürüşmə hadisəsi ilə bağlı Bakı Şəhər Prokurorluğunun bəyanatını müsbət qiymətləndirir: “Bəyanatda açıq-aşkar göstərilir ki, bu, belə tikilələrə icazə verən şəxslərin nə dərəcədə hadisədə iştirak etmək dərəcəsini müəyyən etməklə bağlıdır. Cinayət işində göstərilir ki, sürüşmə tək texnogen hadisələr nəticəsində baş verməyib. Sürüşmənin sürətlənməsində insan amili də rol oynayır. Ayrı-ayrı tikintilərin aparılmasında rolu olan şəxslərin kim olduğunu müəyyən etmək lazımdır. Tikintiyə kimin icazə verdiyi aydınlaşdırılmalıdır. Əslində, müvafiq strukturların rəyi əsasında tikinti aparılıb-aparılmamasına dair qərar verilir. Aydınlaşdırılsa ki, tikinti qanunsuz olaraq həyata keçirilib, o zaman qanunsuz tikintini həyata keçirən şəxslərin özləri belə məsuliyyətə cəlb olunacaqlar. Eyni zamanda, tikintinin həyata keçirilməsində iştirak payı olan aidiyyəti şəxslərin də məsuliyyətə cəlb olunması istisna olunmur. Hadisənin baş verməsinə aidiyyəti olan hər bir şəxs qanunla məsuliyyətə cəlb olunacaq”.
Günel CƏLİLOVA
