Anar Xəlilov: “Dövlət tərəfindən məcburi köçkünlərə göstərilən diqqət və qayğının bariz nümunəsidir”
Məlum olduğu kimi, Prezident İlham Əliyev məcburi köçkünlər və onlara bərabər tutulan şəxslər üçün vahid aylıq müavinətin artırılması haqqında sərəncam imzalayıb. Məcburi köçkünlər və onlara bərabər tutulan şəxslər üçün vahid aylıq müavinətin məbləği 2018-ci il martın 1-dən 10 faiz artırılıb.
Dövlət başçısının məcburi köçkünlərlə bağlı son sərəncamının onların sosial həyatına təsiri barədə danışan Sağlam İnkişaf və Maarifləndirmə İctimai Birliyinin sədri Anar Xəlilov “Bakı-Xəbər”ə açıqlamasında qeyd etdi ki, atılan bu addım təqdirəlayiqdir: “Nəzərə almaq lazımdır ki, məcburi köçkünlərin həyat rifahının yaxşılaşdırılması istiqamətində verilən müavinətlərin böyük rolu var. Məlumdur ki, 2017-ci il yanvarın 1-dən etibarən kommunal xidmət haqlarını artıq məcburi köçkünlərin özləri ödəyirlər. Bununla bağlı hər bir məcburi köçkün və onlara bərabər tutulan şəxslər üçün 36 manat məbləğində vahid aylıq müavinət müəyyən edilib. Evlərdə yaşayan insanlar üçün 36 manat, yataqxana və düşərgələrdə yaşayanlar üçün 20 manat nəzərdə tutulur. Məcburi köçkün ailəsinin bir nəfərinə 36 manat düşür. Bu rəqəm kifayət qədər məqbul rəqəmdir. Ailə üzvlərinin sayı çox olarsa, həmin puldan həm kommunal xidmətləri ödəmək üçün, həm də digər tələbatlarını ödəmək üçün istifadə edə bilərlər”.
A.Xəlilov onu da qeyd etdi ki, məcburi köçkün və onlara bərabər tutulan şəxslər üçün aylıq müavinətin əlavə olaraq 10 faiz artırılması dövlət tərəfindən məcburi köçkünlərə göstərilən diqqət və qayğının bariz nümunəsidir. Bu sərəncam məcburi köçkün ailələrinin sosial rifahının yaxşılaşdırılmasına təsir göstərəcək: “Xüsusi olaraq qeyd edim ki, bu artım məcburi köçkünlərin kommunal ödənişində böyük dayaq olacaq. Vahid aylıq müavinətin artırılmasının 90-95 faiz məcburi köçkünün sosial problemlərinin həll olunmasına əhəmiyyətli təsiri olacaq. O da bəllidir ki, məcburi köçkünlərin xeyli hissəsi mənzillə təmin olunub. Bu istiqamətdə mütəmadi olaraq işlər həyata keçirilir”.
Günel CƏLİLOVA
