Teymur Əsədov: “Son zamanlar zəifgörmə tək Şamaxı, Kürdəmir, Lerik və Qax rayonlarında deyil, bütün bölgələrdə yayılıb”
Azərbaycanda göz xəstəliklərinin daha çox hansı bölgələrdə yayıldığı açıqlanıb. Zərifə Əliyeva adına Milli Oftalmologiya Mərkəzinin direktoru Elmar Qasımov media nümayəndələrinə açıqlamasında qeyd edib ki, respublika ərazisində 13 yaşadək uşaqlarda miopiya ( uzağı görməmək), böyüklər arasında isə miopiya, qlaukoma (göz təzyiqinin artması), katarakta (göz büllurunun şəffaflığının pozulması) və zəifgörmə özünü göstərir:
“Azərbaycanda 10 illik dövr ərzində böyüklər arasında görmə orqanı xəstəliklərinin yayılmasına görə Sumqayıt şəhəri və Göyçay rayonu ön pillələrdə yer alıb. Zəifgörmə və korluq Şamaxı, Kürdəmir, Lerik və Qax rayonlarında yaşayan sakinlər arasında daha çox yayılıb. Hazırda ölkəmizdə 22 min 256 nəfər qlaukomaya məruz qalmış xəstə var. Mərkəzdə qeydiyyatda olanların sayı 15 min 265 nəfərdir. Bölgələrdə isə bu rəqəm 914-ə bərabərdir. Xəstəliyin terminal mərhələsinin olduğu xəstələr birinci, ikinci, üçüncü qrup əlil hesab edilirlər. Onların hər hansı bir iş fəaliyyəti ilə məşğul olması mümkünsüzdür”.
Qeyd olunan bölgələrdə göz xəstəliklərinin nə səbəbdən çox yayıldığını aydınlaşdırmaq məqsədilə oftalmoloq-həkim Teymur Əsədova müraciət etdik. O bizimlə söhbətində qeyd etdi ki, son zamanlar zəifgörmə tək Şamaxı, Kürdəmir, Lerik və Qax rayonlarında deyil, bütün bölgələrdə yayılıb: “Müasir dövrdə texnologiyanın sürətlə inkişaf etməsi nəticəsində kompyuter, planşet və televizor həyatımızın ayrılmaz hissəsinə çevrilib. Təəssüf ki, bu cihazlar nə qədər zəruri olsa da, onların sağlamlığımıza vurduğu ziyan da danılmazdır. Bu gün göz xəstəliklərinin yayılması, görmə qabiliyyətinin azalması və korluğun artmasının əsas səbəbi qeyd olunan cihazlardan mütəmadi istifadə ilə bağlıdır. Gözlərin artıq yüklənməsi göz zəifliyinin əmələ gəlməsi və ya artmasına səbəb olur”.
Həmsöhbətimizin sözlərinə görə, qeyd olunan bölgələrdə görmə zəifliyinin artması səbəblərindən biri ilkin dövrdə həkimə müraciət olunmamasıdır.
T.Əsədov onu da vurğuladı ki, görmə funksiyalarının azalmasına səbəb olan əsas amil refraksiya qüsurlarıdır, onlardan isə miopiya və qarışıq astiqmatizmin üstünlük təşkil etməsidir: “Gözlərin həddindən artıq və fasiləsiz yüklənməsi nəticəsində göz akkomodasiyasının spazmı halları da geniş yayılıb”.
Günel CƏLİLOVA
