Eyyub Hüseynov: “Broyler firmalarında toyuqlara genetik modifikasiya olunmuş məhsul verilir, bu səbəbdən də yumurtanın sarısı və ya ağının…”
İqtisadiyyat Nazirliyi: “Laborator müayinələr nəticəsində yumurtaların keyfiyyətində heç bir nöqsan aşkar edilməyib”
Bir neçə gündür sosial şəbəkələrdə yayılan bir görüntü əksər insanların narahatlığına səbəb olub. Belə ki, paytaxt sakini mağazadan yumurta alıb. Yumurta qaynadılan zaman ondan çıxan maye qaz plitəsinin üstündə qalaraq bərkiyib və qəribə maddə əmələ gəlib. Yumurtanı alan şəxs gördüyü mənzərədən şoka düşərək sosial şəbəkələrdə yumurtanın süni olması ilə bağlı iddialar irəli sürüb.
Görüntüləri lentə alan Xətai rayon sakini Ofeliya Məmmədova sosial şəbəkə vasitəsilə bildirir ki, mağazadan aldıqları yumurta qaynadılan zaman çatlayıb.Yumurtadan çıxan şəffaf maye bir müddət sonra qaz plitəsinin üzərində bərkiyərək bu formaya düşüb. O.Məmmədova ilk dəfədir belə halla üzləşdiyini qeyd edir. O, yumurtanın insan orqanizminə mənfi təsir edə biləcəyini ehtimal edir.
Məlum vəziyyət əhalini də narahat etməyə başlayıb.
İqtisadiyyat Nazirliyinin İctimaiyyətlə əlaqələr şöbəsindən “Bakı-Xəbər”ə verilən məlumata görə, Bakı şəhər sakinindən İqtisadiyyat Nazirliyinə mağazadan aldığı və yerli istehsal olan yumurtanın qaynadılarkən plastmasabənzər maddənin yarandığı barədə müraciət daxil olub: “Bununla bağlı İqtisadiyyat Nazirliyinin İstehlak Mallarının Ekspertizası Mərkəzi tərəfindən yumurtanın alındığı mağazadan nümunələr və nazirliyə müraciət edən istehlakçının qaynadılarkən plastmasabənzər maddənin yarandığını bildirdiyi yumurtaların qalan hissəsi götürülərək laborator müayinəsi aparılıb. Laborator müayinələr nəticəsində yumurtaların keyfiyyətində heç bir nöqsan aşkar edilməyib, keyfiyyət və təhlükəsizlik göstəricilərinin normalara tam uyğun olduğu müəyyən olunub. Qaynadılarkən yarandığı iddia edilən plastmasabənzər maddənin isə yumurtaya heç bir aidiyyəti yoxdur.
Qeyd edək ki, ötən illərdə də vətəndaş müraciətləri və monitorinqlər əsasında istehlak bazarından götürülmüş nümunələr üzrə aparılmış laborator müayinələr zamanı da yumurtanın keyfiyyəti ilə bağlı heç bir nöqsan aşkar olunmayıb”.
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, Azərbaycanda süni yumurta yoxdur. Ancaq bəzi dünya ölkələrində süni yumurta xüsusi texnologiya ilə hazırlanır: “Nəzərə almaq lazımdır ki, 20 ilə yaxındır Azərbaycanda standartlara uyğun olaraq süni kürü hazırlanır. Çində də standartlara uyğun şəkildə yumurta hazırlanma texnologiyası var. Lakin Çin istehsalı olan yumurtalar Azərbaycana idxal olunmur. Ötən il bizim Birliyə bir qadın tərəfindən ikisi qaynadılmış, biri isə çiy vəziyyətdə yumurta gətirildi. Qaynadılmış yumurtanın sarısı rezin kimi idi və əsla əzilmirdi. Araşdırma zamanı məlum oldu ki, yumurtanın sarısının rezin kimi olmasının səbəbi quşa verilən yemlə bağlıdır”.
Həmsöhbətimizin sözlərinə görə, broyler firmalarında toyuqlara genetik modifikasiya olunmuş məhsul verilir. Bu səbəbdən də yumurtanın sarısı və ya ağının yumurtaya aidiyyəti olmur.
E.Hüseynov xüsusi olaraq vurğuladı ki, Azərbaycanda süni yumurta istehsal olunmur və gətirilmir.
Günel CƏLİLOVA
