Şəmsəddin Əliyev: “Belə cinayətləri daha çox yeniyetmələr və 30 yaşa qədər insanlar törədir”
Son günlər Bakının müxtəlif yerlərində, həyət və küçələrdə avtomobillərin qarət olunması faktlarının artdığı hiss olunur. Sakinlərə ziyan vuran bu kimi cinayət halları avtomobillərin şüşələrinin sındırılması, avtomobillərin salonlarının qarət olunması, avtomobillərdən qiymətli əşyaların aparılması, motorların sökülməsi və sair formada üzə çıxır.
Adətən belə vəziyyətlərdə nəzərə gələn ilk səbəb polisin fəaliyyətində boşluqlar, zəifləmələr barəsində mülahizələr olur. Ancaq maraqlıdır ki, əksər ekspertlər, müşahidəçilər son günlər polisin fəaliyyətində güclənmə və intensivləşmə hiss olunduğunu etiraf edirlər. Ən azından, seçkilərə hazırlıq faktoru bu mülahizələrin əsaslı olduğunu təsdiqləməyə imkan verir. Digər tərəfdən, biz illərdir görürük ki, polisin fəaliyyətində üstün istiqamətlərdən biri də məhz küçə xuliqanlarının, xırda-xuruş oğruların kökünün kəsilməsi istiqamətində çalışmaqdır. Etiraf edək ki, ağır cinayətlərlə, mütəşəkkil cinayətkar dəstələrlə, insan alveri ilə, narkotiklərlə və sair kimi mübarizələrdə ortada böyük nəticələr var. Belədə avtomobil qarətlərinin artması polisin fəaliyyəti ilə bağlı deyilsə, o zaman hansı səbəbdən ortaya çıxır?
Sözügedən məsələyə aydınlıq gətirən “Polisə Dəstək” İctimai Birliyinin rəhbəri Şəmsəddin Əliyev bunu bir sıra amillərlə əlaqələndirdi: “Əvvəla avtomobillərin qarət olunması hallarının aşkar olunmasında polisin fəaliyyəti danılmazdır. Polis bu istiqamətdə fəaliyyətini düzgün qurub və bununla bağlı baş verən cinayətləri vaxtında aşkar edir. Nəzərə almaq lazımdır ki, gün ərzində 100-120 cinayət baş verir. Həmçinin, gün ərzində 20-22 nəfər axtarışda olan cinayətkar yaxalanır. Bütün bunlar əlbəttə ki, polisin uğurlu fəaliyyət göstərməsinin nəticəsidir. Seçkilərlə əlaqədar polisin fəaliyyəti bir az da güclənib. Bütün bunlar ondan ibarətdir ki, vətəndaşların, dövlətin əmlaklarının təhlükəsizliyi təmin olunsun. Sadəcə olaraq, bu kimi cinayətlərdə sovet dönəmindən fərqli bir az artım müşahidə olunur. Bu da avtomobil nəqliyyat vasitələrinin çoxluğu və baxımsız qalması, istənilən yerdə park edilməsi ilə bağlıdır. Vətəndaşlar özləri bəzən öz mülkiyyətində olan əmlakının hansı şəraitdə saxlanmasının qeydinə qalmırlar. Düşünürlər ki, belə yerlərdə avtomobillərin saxlanması onlar üçün hansısa problemlər yaratmayacaq. Ancaq məlum olur ki, bu heç də belə deyil. Cəmiyyətdə bu kimi cinayətləri törədən insanlar var və hər zaman olacaq. Bu tip cinayətlər əsasən tamah məqsədilə baş verən cinayətlərdir. Yəni bəzi insanlar yüngül yollarla gəlir əldə etmək istəyirlər. Bu da ictimai münasibətlərə tamamilə zidd olan bir haldır. Düşünürəm ki, belə insanların şüurunda neqativ hallara meyl çox olur. Həmçinin, ictimai münasibətlərə ziyan vurmaq istəyi olur. Təbii ki, belə düşüncələri onların şüurundan silmək mümkün deyil. Hesab edirəm ki, yalnız maarifləndirmə yolu ilə belə neqativ halları minimum səviyyəyə endirmək mümkündür. Avtomobillərin qarət olunmasına qarşı maarifləndirmə təkcə televiziyada yox, mətbuatda da olmalıdır və bu istiqamətdə iş aparılmalıdır. Bu kimi cinayətləri daha çox yeniyetmələr və 30 yaşa qədər insanlar törədir. Ona görə də Təhsil Nazirliyi, Gənclər və İdman Nazirliyi bu istiqamətdə birgə fəaliyyət göstərməlidirlər. Maarifləndirmə işi vacibdir. Müxtəlif auditoriyalarda bununla bağlı maarifləndirici xarakterli məruzələr təşkil olunmalıdır”.
Cəmilə QARAYEVA
