İlqar Hüseynli: “Nəticədə əhalinin sosial müdafiəyə xüsusi ehtiyac duyan təbəqələrinin bundan istifadə imkanları artacaq”
Cəmiyyətdə elə qrup insanlar var ki, onlara münasibət daha böyük diqqət və həssaslıq tələb edir. Bunlardan biri daim sosial və eləcə də mənəvi qayğıya ehtiyacı olan əlilliyi olan şəxslərdir. Onların reabilitasiyası, cəmiyyətə inteqrasiyası mühüm sosial vəzifələrdən biridir. Xüsusən də sosial müdafiəyə xüsusi ehtiyac duyan təbəqələrin vəziyyətinin yaxşılaşdırılması böyük əhəmiyyət kəsb edir.
Bu mənada Azərbaycanda onların sosial müdafiəsinin gücləndirilməsi dövlət siyasətinin mühüm istiqamətlərindən biri hesab olunur. Bu istiqamətdə zaman-zaman bir sıra işlər görülür və bu siyasət davamlı xarakter daşıyır.
Bu arada Prezident İlham Əliyev əhalinin sosial müdafiəsinin yaxşılaşdırılmasına dair əlavə tədbirlər haqqında sərəncam imzalayıb. Dövlət başçısı bu məqsədlə Əmək və Əhalinin Sosial Müdafiəsi Nazirliyinə 15 297 900 manat ayırıb. Sərəncamda qeyd olunur ki, əhalinin sosial müdafiəyə xüsusi ehtiyac duyan təbəqələrinin sosial rifahının yüksəldilməsi, onların cəmiyyətə fəal inteqrasiyası istiqamətində son illərdə mühüm addımlar atılıb. Bu qəbildən olan insanların çoxsaylı sosial proqramlara, o cümlədən sağlamlıq, reabilitasiya, ödənişsiz istirahət, texniki bərpa və nəqliyyat vasitələri ilə təminat proqramlarına cəlb olunması uğurla həyata keçirilib. Xüsusən bu dövrdə bərpa-müalicə şəbəkəsinin bölgələr üzrə genişləndirilməsi təmin olunub, sağlamlıq imkanları məhdud uşaqların tibbi-sosial reabilitasiyası işinin gücləndirilməsi məqsədilə uşaq bərpa mərkəzləri yaradılıb. ƏƏSMN-ə ayrılan vəsait bir sıra sosial təyinatlı obyektlərdə tikinti və əsaslı təmir işlərinin başa çatdırılmasına sərf olunacaq.
Maraqlıdır, məlum qərarı ekspertlər necə dəyərləndirirlər?
Məsələyə münasibət bildirən ekspert İlqar Hüseynli bununla bağlı sərəncamın imzalanmasına müsbət prizmadan yanaşdı. Onun fikrincə, cəmiyyətdə bir qrup insan var ki, onların sosial müdafiəyə xüsusi ehtiyacı var: “Əhalinin müəyyən təbəqəsi sosial qayğıya ehtiyacı olan insanlardır. Bu o deməkdir ki, ölkədə əhalinin müəyyən hissəsi əlil və xüsusi qayğıya ehtiyacı olan şəxslərdir. Ölkədə Qarabağ müharibəsi, Çernobıl qəzası, 20 Yanvar hadisələri nəticəsində və digər səbəblərdən əlilliyi olan şəxslər var. Bu insanlara dövlətin qayğısı çox vacibdir. Çünki bunlar əhalinin həssas təbəqəsini təşkil edir. Bu baxımdan atılan istənilən addım təqdir olunmalıdır. Belə proqramların olması vacibdir və hesab edirəm ki, bu məqsədlə ayrılan vəsaitin şəffaf formada xərclənməsinə diqqət artırılmalıdır. Bölgələrdə xüsusi qayğıya ehtiyacı olan insanlar üçün bir sıra pansionatlar inşa olunub və bu istiqamətdə işlər davam etdirilir. Orada xüsusi qayğıya ehtiyacı olan insanların müalicəsi, sosial reabilitasiyası həyata keçirilir. Həmçinin, dövlət vəsaiti hesabına onların istirahəti təşkil olunur. Fikrimcə, bu normal haldır və mühüm əhəmiyyət kəsb edir. Ancaq onu da nəzərə almaq lazımdır ki, bütün rayonlarda belə mərkəzlər yoxdur. Hesab edirəm ki, ölkə başçısının sərəncamı ilə ayrılan vəsait regionlarda sözügedən problemin həllini sürətləndirəcək. Nəticədə əhalinin sosial müdafiəyə xüsusi ehtiyac duyan təbəqələrinin bundan istifadə imkanları artacaq. Bu sahədə qarşılaşdıqları problemlər aradan qaldırılacaq. Ən başlıcası odur ki, daha çox əlilliyi olan şəxsin bundan istifadə etmək imkanları olacaq. O üzdən, sözügedən məsələ ilə bağlı dövlət büdcəsindən vəsaitin ayrılmasına müsbət yanaşıram”.
Cəmilə QARAYEVA
