Fevralın 7-də qorunan obyektdən oğurluğa cəhdin qarşısının alınması ilə bağlı daha ətraflı məlumat əldə etmək üçün BMİ-nin Sabunçu Rayon Mühafizə İdarəsinə yollandıq. Bildirdilər ki, bu gün həm xidməti peşə hazırlığı dərsidir, həm də baş vermiş hadisənin təhlili ilə bağlı rəis yanında əməliyyat müşavirəsidir. Gəlişimiz barədə rəhbərliyə məruzə olunduqdan sonra həmin müşavirədə bizim də iştirakımız təmin olundu.
İdarə rəisi, polis polkovniki Əşrəf Allahyarov bildirdi ki, qorunan və ya qorunmayan obyektlərdən oğurluq cəhdlərinin qarşısının alınması və daha etibarlı mühafizə əməkdaşların qarşısında tələb kimi qoyulub, həm də bu onların xidməti borcudur. Bu gün RMİ-nin şəxsi heyəti ötənilki uğurlarla kifayətlənmir, günün, zamanın tələbi olan texniloji yeniliklərdən yararlanır, məsuliyyətini daha yaxşı dərk edir. Elə ayın 7-də oğurluğa cəhdin qarşısının alınması da əməkdaşların özünə tələbkarlığının, sözün əsl mənasında peşəkarlığının göstəricisidir.
Polis polkovniki Ə. Allahyarov xidmətdə fərqlənən əməkdaşların baş idarə rəhbərliyi tərəfindən dəfələrlə mükafatlandırıldığını da diqqətimizə çatdırdı. Dedi ki, təcrübəli əməkdaşlar öz biliklərini təkcə xidmətdə deyil, həmçinin xidməti peşə hazırlığı dərslərində də gənclərə öyrədirlər. Bu da cinayətkarlıqla mübarizədə, obyektlərin etibarlı qorunmasında müsbət nəticəsini verir...
Yeri gəlmişkən, xidməti peşə hazırlığı dərsində də iştirak etdik. Dərs rəhbəri, kadr və peşə hazırlığı üzrə baş inspektor, polis baş leytenantı Anar İbadov şəxsi heyətin hər həftənin 4-cü günü xidməti peşə hazırlığı dərslərində mütəmadı iştirak etdiyini, mövzuların plana uyğun, özü də yüksək peşəkarlıqla keçirildiyini bildirdi.
Növbədən sonra, yəni xidmətdən çıxsalar da günümüzün qəhrəmanları - polis serjantları Mehman İbrahimovla və Urfat İsayevlə görüşdük. Hadisə ilə bağlı onları dinləmək daha maraqlıydı.
Polis serjantı Mehman İbrahimov: “Bakıxanov qəsəbəsində yerləşən xüsusi texniki vasitələrlə qorunan “NUR-Market”dən “həyəcan” siqnalı daxil oldu. Bir dəqiqə ərzində hadisə yerinə çatdıq. Obyektə baxış zamanı mağazanın qapısının sındırıldığını və oğurluğa cəhd olunduğunu müəyyən etdik. Onlar dörd nəfər idilər. Bizi görüb ikisi qaçmağa başladı. Obyektə daxil olmuş şəxsləri mən, qaçan iki nəfəri də həmkarım yaxalayıb, rəhbərliyə hadisə ilə bağlı məlumat verdik.
Qeyd edək ki, polis serjantı Mehman İbrahimov 7, Urfat İsayev isə 4 ildir ki, daxili işlər orqanlarında xidmət edir.
Həmin cinayəti törətməkdə şübhəli bilinən, aralarında qız da olan 4 nəfərdən ibarət dəstə mühafizə polisi əməkdaşlarının çevikliyi sayəsində saxlanaraq 13-cü Polis Bölməsinə təhvil verilib. Şəxsiyyətləri dəqiqləşdirilən zaman onların yetkinlik yaşına çatmadığı müəyyən edilib. Məlum olub ki, Sabunçuda, eləcə də Yasamal, Nərimanov və Binəqədi rayonlarında silsilə oğurluq cinayətləri törədiblər. Mühafizə Polisinin sayıqlığı nəticəsində onların digər obyektlərdən də oğurluq niyyətləri ürəklərində qalıb.
Fevralın 9-da gecə saatlarında Bakıxanov qəsəbəsindəki şirniyyat evlərindən birində daha bir oğurluğa cəhdin qarşısı Sabunçu RMİ əməkdaşları tərəfindən alınıb.
Həmin cinayəti törətməkdə şübhəli bilinən şəxslərin üzərinə baxış zamanı qeyd edilən obyektdən oğurladıqları bir ədəd planşet və mobil telefon aşkar olunaraq maddi sübut kimi götürülüb. Bölmədə şəxsiyyətləri dəqiqləşdirilən zaman onların heç birinin yetkinlik yaşına çatmadığı müəyyən edilib. Məlum olub ki, yetkinlik yaşına çatmayan bu şəxslər tutulana qədər elə həmin gecə Sabunçu və Nizami rayonlarında ümumilikdə 4 geyim dükanı, mağaza və daha bir şirniyyat evindən oğurluq ediblər...
Etibar ediləni göz bəbəyi kimi qoruyan, cinayətkarın, oğrunun üstünə gözünü qırpmadan gedən polisimizin-Mühafizə Polisinin vətəndaşlardan, səndən, məndən, bir sözlə, hər birimizdən bircə təmannası var: “Malınızı, əmlakınızı sizə təhlükədən daha yaxın, həm də etibarlı olana etibar edin”...
Hafiz TƏMİROV polis mayoru
