Kamran Əsədov: “Onların müdafiə etdikləri mövzu qlobal əhəmiyyətli deyil”
"Hazırda gənclər fundamental elmlərə maraq göstərmirlər və bu da həmin sahənin büdcədən asılılığını artırır". Bunu Azərbaycan Milli Elmlər Akademiyasının Humanitar Elmlər Bölməsinin akademik-katibi, akademik Teymur Kərimli Rəyasət Heyətinin dünən keçirilən iclasında deyib.
O, digər problemin Azərbaycan gənclərinin ideologiyası ilə bağlı xarici jurnallarda yazıların az dərc olunması olduğunu söyləyib: "İmpakt faktorlu jurnallarda ikili standartlar hökm sürür. Buna görə də impakt faktorlu jurnallar gənc alimlərin Azərbaycan gənclərinin ideologiyası ilə bağlı hazırladığı yazılara ya çox həvəssiz yanaşır, ya da heç maraq göstərmirlər. Bu səbəbdən də Azərbaycan özünün nəşr brendini yaratmalıdır".
Gənclər fundamental elmlərə nə səbəbdən maraq göstərmirlər?
Təhsil eksperti Kamran Əsədov “Bakı-Xəbər”ə açıqlamasında təəssüf hissilə qeyd etdi ki, son illər Azərbaycan elminə gənc nəslin gəlməsi aşağı faizə düşüb: “Məlumdur ki, ölkə başçısının imzaladığı sərəncama əsasən, magistratura və doktorantura pilləsində təhsil alanlar hərbi xidmətdən azad olunurlar. Lakin buna baxmayaraq, gənclər hələ də bu sahəyə meyl etmirlər. Əsas səbəblərdən biri Azərbaycanda elmi tədqiqat aparan şəxslərə verilən əməkhaqqının aşağı səviyyədə olmasıdır. Digər məsələ magistratura və ya doktoranturada əyani təhsil alan şəxslərin işləməsinə icazə verilməsi ilə bağlıdır. Qanunvericiliyə əsasən, əyani doktorantura pilləsində təhsil alanlar işdən azad olunmalıdırlar. Ancaq bunun qarşılığında həmin şəxsə 135 manat dəyərində pul verilir. İnanmıram ki, kimsə 135 manata görə yüksək əməkhaqqı aldığı iş yerindən çıxar”.
Həmsöhbətimiz gənclərin fundamental elmə maraq göstərməməsinin bir səbəbinin də AMEA-nın özündə mövcud qaydalarla bağlı olduğunu dilə gətirdi: “Akademiyada və ya digər institutlarda çalışan yaşlı nəslin nümayəndələri gənclərin müdafiə etməsinə mane olurlar. Daha çox bu hal şəxsi prinsiplər üzərində qurulur”.
K.Əsədovun sözlərinə görə, beynəlxalq dərəcəli alimlərin jurnallarında Azərbaycan alimlərinin məqalələri çap olunmur: “Son illər ərzində aparılan tədqiqatlara əsasən, Azərbaycan alimləri fundamental iş ortaya qoya bilmirlər. Daha çox yerli əhəmiyyətli işləri həll edirlər. Demək olar ki, yerli alimlər böyük kəşflər həyata keçirə bilmirlər. Halbuki, ay ərzində kifayət qədər şəxs elmi dərəcə alır, müdafiə edirlər. Ancaq onların müdafiə etdikləri mövzu qlobal əhəmiyyətli deyil. Bunun səbəbi də gənclərə ciddi şəkildə maneə törədilməsi ilə bağlıdır”.
Günel CƏLİLOVA
