Fatimə Hacıbəyli: “Bu məsələdə dövlətimizin və ictimaiyyətin maraqları üst-üstə düşür”
Ailə cəmiyyətin ən vacib dayağıdır. Bu dayağın möhkəm olması xalq və dövlətin də sağlam olması deməkdir. Ailə vətəndaş cəmiyyətini formalaşdıran əsas elementlərdən sayılır. Bu mənada Azərbaycan ailəsi hər zaman digər xalqlara nümunə göstərilib.
Azərbaycanda ailə modeli ailə ənənələrinə, milli-mənəvi dəyərlərə söykəndiyindən, tarix boyu öz simasını itirməyib. Qərb dünyasında ailə institutu deformasiyaya uğradığı bir vaxtda, bizdə ailə dəyərlərinin hələ də qorunub saxlanması Azərbaycan xalqına xas ən müqəddəs xüsusiyyətlərdən biridir. Bunun kökündə isə milli-mental dəyərlər, əxlaqi keyfiyyətlər dayanır. Ailəyə hər zaman müqəddəs ocaq kimi baxılıb. Azərbaycanda ailə institutunun sütunları böyüyə hörmət, ailə başçısına sədaqət, qarşılıqlı sevgi və digər dəyərlərə söykənir. Elə bu səbəbdən də Azərbaycanda qurulan ailələrin sayı artır.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova media nümayəndələrinə açıqlamasında deyib ki, ailələrin sayı 2006-cı ildə 1 817 500 idisə, 2017-ci ilin əvvəlinə 2 084 500 olub. 2003-cü ildə hər 100 000 nəfər diri doğulana ana ölümü 34,2 promil təşkil edirdisə, 2016-cı ildə 13,8 promil təşkil edib.
Açıqlanan statistik rəqəmlərə əsasən, Azərbaycanda 2 milyondan çox ailə var. Qeyd edək ki, inkişaf etmiş ölkələrdə belə ailə institutları dağılmaq üzrədir. Xarici ölkələrlə müqayisədə Azərbaycanda qurulan ailələrin sayı yüksəkdir. Bu da ölkəmizdə ailə dəyərlərinə verilən qiymətlə bağlıdır.
“Vəfa” Sosial İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, Azərbaycan cəmiyyəti hər zaman ailələrin möhkəmliyi ilə fəxr edib: “Bu əsasən milli mentalitetimizdən irəli gəlir. Ailə üzvləri arasında səmimi, mədəni münasibət, böyük-kiçik yerinin bilinməsi, valideyn-övlad münasibətlərinin düzgün qurulması bizim ailələrə xas olan keyfiyyətlərdir. Əgər ölkəmizdə yüzlərlə, minlərlə insan qurduqları ailələrin brilyant, qızıl, gümüş yubileylərini keçirirlərsə, bu o deməkdir ki, Azərbaycanda ailə modeli qorunur və nəsildən-nəslə yaşadılır”.
Həmsöhbətimizin sözlərinə görə, Azərbaycan ailəsi, hər zaman olduğu kimi, bu gün də dünyada ən yaxşı ailə modellərindən hesab olunur: “Bu gün dövlət ailə siyasəti Azərbaycan hökumətinin diqqətində olan mühüm məsələlərdəndir. Hazırda Azərbaycanda 2 milyonda artıq ailə var. Ölkəmizdə qurulan ailələrin sayının artması və uzunömürlü olmasının müəyyən səbəbləri var. O səbəblərdən biri də sevgi, inam, etimad kimi dəyərlər üzərində qurulan ailələrdir. Sevgi üzərində qurulan ailələr daha uzunömürlü olur. Bu halda, nikaha girən kişi və qadın qarşılıqlı mənəvi məsuliyyət hiss edir, güzəştlərə meylli olur, meydana çıxan istənilən sosial-psixoloji problemi əzmlə dəf etməyi bacarırlar.
Ümumiyyətlə, hər bir ailənin monolitliyinin təmin olunmasında və uzunömürlüyündə kişilərlə yanaşı, qadınların da üzərinə mühüm vəzifələr düşür. Ailə dəyərlərini uca tutan qadınlar üzərlərinə düşən vəzifələri yaxşı dərk edir, kişinin ailə başçısı, müəyyən mənada söz sahibi olduğunu qəbul edir, uşaqlarının təlim-tərbiyəsində, ailənin bu və digər probleminin həllində yaxından iştirak edirlər”.
F.Hacıbəyli onu da vurğuladı ki, milli ailə dəyərlərimizin Avropa eybəcərliklərindən qorunmasında dövlət siyasəti olduqca məqsədyönlü şəkildə aparılır. Bu siyasət Azərbaycan ictimaiyyətinin maraqlarını müdafiə edir. Bu məsələdə dövlətimizin və ictimaiyyətin maraqları üst-üstə düşür.
Günel CƏLİLOVA
