Bahadur Bilalov: “Qəbələnin İslam dünyasının turizm paytaxtı seçilməsi buraya gələn turistlərin sayının kəskin artmasına səbəb olacaq” Həyat Məhərrəmova: “Qəbələ şəhərinin tarixi abidələri və bugünkü mənzərəsi turistləri özünə cəlb etməyə qadirdir”
Azərbaycanın bölgələri öz göstəricilərinə, sahib olduqları dəyərlərə, ənənələrə görə dünyanın diqqətini özünə cəlb edir. Azərbaycan İslam aləmində də böyük nüfuza malikdir. Bildiyimiz kimi, qədim zamanlardan bəri Azərbaycan islam dəyərlərinin yaşadıldığı, böyük qiymət verildiyi bir ölkədir. Azərbaycanın hər bölgəsində islam mədəniyyətinin silinməz izləri var.
Bu gün dünyanın diqqətində olan bölgələrimizdən biri Qəbələdir. Qəbələ şəhəri uzun illərdir bir sıra beynəlxalq tədbirlərin, festivalların keçirildiyi məkana çevrilib.
Qəbələ şəhərinin 2020-ci il “İslam dünyasının turizm paytaxtı” seçilməsi təqdirəlayiq haldır.
Məlumatlara görə, İslam Əməkdaşlıq Təşkilatına (İƏT) üzv ölkələrin turizm nazirlərinin X konfransının iclasında 2019-cu il "İslam dünyasının turizm paytaxtı" Dəkkə (Banqladeş) və 2020-ci il "İslam dünyasının turizm paytaxtı"nın isə Qəbələ olması qərara alınıb.
Qeyd edək ki, 2016-cı ildə "İslam dünyasının turizm paytaxtı" Konya olub. 2017-ci ildə isə bu şərəfli adı Mədinə daşıyıb , 2018-ci ildə bu status Təbrizə məxsusdur.
Qədim şəhərlərimzidən biri olan Qəbələnin 2020-ci il “İslam dünyasının turizm paytaxtı “ seçilməsini mütəxəssislər yüksək dəyərləndirirlər.
Azərbaycan Turizim və Menecment Universitetinin kafedra müdiri, turizm üzrə mütəxəssis Bahadur Bilalov “Bakı-Xəbər”ə açıqlamasında Qəbələ şəhərinin 2020-ci il “İslam dünyasının turizm paytaxtı seçilməsinə müsbət yanaşdığını dedi: “Son dövrlərdə ölkə Prezidentinin apardığı məqsədyönlü siyasət nəticəsində ölkəmizdə qeyri-neft sektoru sürətlə inkişaf etməkdədir. Belə sahələrdən biri də turizmdir. Son 3 ildə Prezidentimiz tərəfindən turizmin inkişafını sürətləndirən onlarla sənəd qəbul edilib. Bütün bunların nəticəsidir ki, ölkəyə xaricdən, xüsusən də İslam dünyasından turist axını başlanıb. Məlumdur ki, Azərbaycanın dilbər guşəsi olan Qəbələdə aparılan tikinti-quruculuq işləri nəticəsində turizmin maddi-texniki bazası yaradılıb. Burada ilin bütün fəsillərində turistlərin qəbulu üçün şərait mövcuddur. Hesab edirəm ki, Qəbələnin İslam dünyasının turizm paytaxtı seçilməsi buraya gələn turistlərin sayının kəskin artmasına səbəb olacaq”.
Bahadur Bilalov bildirdi ki, turistləri yüksək səviyyədə qəbul etmək üçün əlaqədar təşkilatlar daha aktiv və işgüzar olmalıdırlar: “Sadəcə olaraq yerli turizm təşkilatları, otel sahibləri, restoran biznesi ilə məşğul olanlar bu məsələdə təkcə öz ciblərinin hayında olmamalı, məsələyə dövlətçilik baxımından yanaşmalıdırlar. Gələn turistlərə baha olmayan qiymətlərlə yüksək xidmət göstərilməlidir ki, onlar geri qayıtdıqdan sonra Azərbaycanın turizm ölkəsi kimi reklamçılarına, təbliğatçılarına çevrilsinlər”.
Tarixçi Həyat Məhərrəmova isə bildirdi ki, Qəbələ şəhəri Azərbaycanın tarixi şəhərlərindən biri kimi turistləri özünə cəlb edəcək. O qeyd etdi ki, Qəbələ şəhərinin 2020-ci il “İslam dünyasının turizm paytaxtı” seçilməsi Azərbaycan dövlətinin İslam aləmi üçün böyük dəyərə malik olduğunu və əhəmiyyət daşıdığını deməyə əsas verir: “Qəbələ şəhəri Azərbaycanın qədim şəhərlərindən biridir. Özü də paytaxtlarımızdan biri olub. Qəbələ şəhərinin tarixi abidələri və bugünkü mənzərəsi turistləri özünə cəlb etməyə qadirdir. Bu şəhərdə qədim və müasir dövrün ahəngi formalaşıb. Qəbələ şəhərinin 2020-ci il “İslam dünyasının turizm paytaxtı” seçilməsini təqdir edirəm. Hesab edirəm ki, bu şəhər bütün göstəricilərinə görə üzərinə düşən missiyanı layiqincə yerinə yetirəcək. Bilirsiniz ki, son on-on beş ildə Qəbələyə dünyanın müxtəlif ölkələrindən turistlər gəlir. Onlar burada keçirilən müxtəlif musiqi festivallarında iştirak edirlər. Beynəlxalq Qəbələ Musiqi Festivalı da bu şəhərimizdə keçirilir. Bu olduqca maraqlı bir festivaldır”.
O qeyd etdi ki, Azərbaycanda bütün ənənəvi, sağlam mədəniyyətlərin inkişafına şərait yaradılır. İslam mədəniyyətinin Azərbaycanın ayrılmaz parçası olduğunu qeyd edən tarixçi bildirdi ki, ölkəmizdə İslam dünyasına aid saysız dəyərlər var. “Azərbaycanda islam ənənələri əsrlərdir formalaşıb. Ölkəmizin hər yerində böyük tarixə, əhəmiyyətə malik olan islam abidələri mövcuddur. Azərbaycan İslam dünyası üçün böyük əhəmiyyətə malikdir. Belə olmasaydı, Naxçıvan şəhəri 2018-ci il üçün “İslam mədəniyyətinin paytaxtı” olmazdı, yaxud Qəbələ şəhəri 2020-ci il “İslam dünyasının turizm paytaxtı” seçilməzdi. Ölkəmiz tarixən islam dəyərlərinə sahib çıxıb və bu dəyərləri qoruyub, təbliğ edib, yaşadıb” - deyə tarixçi vurğuladı.
İradə SARIYEVA
