Sahib Məmmədov: “Ölkə başçısı bu amili nəzərə alaraq həmin tələbi irəli sürüb”
Azərbaycan Prezidenti İlham Əliyev Azərbaycan Həmkarlar İttifaqları Konfederasiyasının V Qurultayının iştirakçılarına təbrik məktubu göndərib. Təbrikdə bildirilir: “Hörmətli qurultay iştirakçıları! Sizi səmimi qəlbdən salamlayır və növbəti ali toplantınızın öz işinə başlaması münasibətilə təbrik edirəm.
Böyük tarixi inkişaf yolu keçmiş Azərbaycan həmkarlar ittifaqları müstəqillik illərində genişmiqyaslı fəaliyyəti sayəsində cəmiyyətin aparıcı təsisatlarından birinə çevrilmişdir. Bu gün respublikamızda ən kütləvi ictimai təşkilat olan Azərbaycan Həmkarlar İttifaqları Konfederasiyası vətəndaşların sosial hüquqlarının təmin olunmasında mühüm rol oynayır.
Müasir dövrdə hüquqi dövlət quruculuğu prosesini həmkarlar ittifaqları olmadan təsəvvür etmək qeyri-mümkündür. Azərbaycan hökuməti əmək münasibətlərinin tənzimlənməsi və insanların sosial məsələlərinin həlli sahəsində onların fəaliyyətini yüksək qiymətləndirir. Hazırda ölkəmizdə sosial tərəfdaşlıq sisteminin vacib subyektlərindən biri kimi çıxış edən həmkarlar təşkilatlarına öz işlərini zamanın tələbləri səviyyəsində qurması və funksional imkanlarının genişləndirilməsi üçün hərtərəfli şərait yaradılmışdır.
Azərbaycan Respublikasında dərin sosial-iqtisadi islahatların həyata keçirilməsi, vətəndaşların layiqli həyat şəraitinin təmin edilməsi istiqamətində dövlət proqramlarının və infrastruktur layihələrinin uğurla reallaşdırılması yoxsulluq və işsizlik kimi ağır problemlərin səviyyəsinin minimuma endirilməsinə, əhalinin rifah halının yüksəldilməsinə imkan vermişdir. Enerji resurslarından əldə edilən gəlirlər, ilk növbədə, iqtisadiyyatın şaxələndirilməsinə, insan kapitalının və iqtisadi potensialın inkişafına yönəldilmişdir. Aparılmış islahatlar nəticəsində ölkəmizin ümumdaxili məhsulunda qeyri-neft sektorunun həcmi ildən-ilə artır, sahibkarlığın genişlənməsi üçün yaradılmış əlverişli mühit özəl bölmənin fəaliyyətinə müsbət təsir göstərir və çoxsaylı yeni iş yerləri açılır.
Əldə olunan bu uğurlar həm də vətəndaşların sosial mənafelərinin qorunması, əmək münasibətlərinin nizamlanması, cəmiyyətdə hüquqi mədəniyyətin yüksəldilməsi və ictimai həmrəyliyin möhkəmləndirilməsi ilə bağlı həmkarlar ittifaqlarının rolunu və məsuliyyətini daha da artırır. Həmkarlar təşkilatları bu reallıqdan çıxış edərək, müxtəlif mülkiyyət formasına malik olan müəssisə və şirkətlərdə öz fəaliyyətinin qurulması, işçilərin əmək, istirahət, müalicə və digər sosial tələbatlarının ödənilməsi üçün ardıcıl tədbirlərini davam etdirməlidir. Hesab edirəm ki, indiki dövrdə sahə həmkarlar təşkilatlarının işinin gücləndirilməsinə və tərəfdaşlarla səmərəli əməkdaşlığın dərinləşdirilməsinə daha çox diqqət ayrılmalıdır.
İnanıram ki, bugünkü mötəbər tədbirdə aparılacaq konstruktiv müzakirələr və qəbul ediləcək qərarlar ölkəmizin sosial-iqtisadi inkişafının müasir mərhələsində həmkarlar ittifaqlarının nüfuzunun artmasına, cəmiyyətimizin ahəngdar həyatının və vətəndaşların sosial rifahının təmin olunmasına sanballı töhfələr verəcəkdir.
Sizi bir daha ürəkdən təbrik edir, qurultayın işinə uğurlar arzulayıram!"
Prezidentin məktubu təbrik məzmunlu olsa da, orada bəzi tövsiyələr də yer alıb. Xüsusilə də sahə həmkarlar təşkilatlarının işinin gücləndirilməsinə və tərəfdaşlarla səmərəli əməkdaşlığın dərinləşdirilməsinə daha çox diqqət ayrılmasına dair tapşırıq verilir.
Ölkə başçısının bu tövsiyəsini həyata keçirmək üçün hansı zəruri addımlar atılmalıdır?
Əmək Hüquqlarının Müdafiəsi Liqasının rəhbəri Sahib Məmmədov qəzetimizə açıqlamasında bildirdi ki, ölkə başçısının həmin tövsiyəsi çox vacibdir: “Bilirsiniz ki, həmkarlar subyektləri partnyorluq əsasında yaranır. Bəzən bu partnyorluq üç tərəfi əhatə edir. Bizdəki həmkarların strukturu bir qədər fərqlidir. Həmkarlar Konfederasiyası öz ətrafında 26 sahəni əhatə edən həmkarlar təşkilatlarını cəmləşdirir. Onların da əksəriyyəti dövlət və iri təsərrüfat subyektlərini əhatə edir. Fikir versəniz görərsiniz ki, özəl sektoru əhatə edən həmkarlar ittifaqları bizdə çox azdır. Bu da maraqlı təzad yaradır. Çünki bizim iqtisadiyyatımız inkişaf edir və özəl sektorun payı çoxdur. Bu o anlama gəlir ki, özəl sektoru əhatə edən qurumlarda işləyən işçilərin sayı heç də dövlət aparatından az deyil. Onda niyə onların həmkarları olmamlıdır? Aparılan monitorinqlər də göstərir ki, bizdə işçi hüquqları daha çox özəl sektorda pozulur. Bura yalnız işçi hüquqlarının pozulması aid deyil. Bilirsiniz ki, həmkarlar geniş sahəni əhatə edən fəaliyyətlə məşğul olur. Bura işçilərin normal məzuniyyət və istirahət hüququnun təmin olunmasını da aid edə bilərik. Bu baxımdan da özəl sektorda sahə həmkarlarının fəaliyyətinə böyük ehtiyac var. Ölkə başçısı bu amili nəzərə alaraq həmin tələbi irəli sürüb. Bu məsələdə özəl şirkət rəhbərlərinin özləri də maraqlı olmalıdır. Bu sahələrin inkişafı ümumilikdə milli həmkarlar qurumunun güclənməsi anlamına gəlir. Çünki alt bazası güclü olan qurum heç vaxt büdrəməz”.
Məhəmmədəli QƏRİBLİ
