Bu gün daxili işlər orqanları əməkdaşlarının ilkin hazırlıq keçmələri üçün ixtisaslaşmış DİN-in Arif Heydərov adına Sıravi və Kiçik Rəis Heyəti Hazırlayan Məktəbində gənc əməkdaşların xidmətinin möhkəmlənməsi, eləcə də bütün şəxsi heyətin mənəvi-psixoloji hazırlığının yüksəldilməs, peşə hazırlığının artırılması məqsədilə davamlı işlər görülür.
Məktəbin rəisi, polis polkovniki Mirzeynalabdin Seyidov dərs proqramının günün tələblərinə cavab verdiyini, DİN rəhbərliyinin ötən ilin yekunları, xüsusən də şəxsi heyətin etik-davranış qaydaları ilə bağlı kollegiyada səsləndirdiyi tövsiyələrin bu gün dərs proqramlarına salındığını, “Etik-davranış kodeksi” və ya “Polis əməkdaşının davranış qaydaları” mövzusunda keçirilən mühazirələrin davamlı şəkildə dinləyicilərə çatdırılmasının diqqət mərkəzində olduğunu görmək marağımızı nəzərə alaraq bizi sinif otaqlarından birinə dəvət etdi.
Xüsusi fənlər silsiləsinin müəllimi, polis kapitanı Natiq Babanlı “Ağıllı lövhə”də nümayiş etdirilən “Etik-davranış kodeksi”n də əksini tapan müddəaların şəxsi heyətin peşə hazırlığının təşkilində, əməkdaşların təlim-tərbiyəsi işinin müasir dövrün tələbləri səviyyəsinə qaldırılmasındakı rolundan danışdı. Polis əməkdaşlarında yeni düşüncə tərzinin, geniş dünyagörüşün formalaşdırılması, əxlaqımıza, adət-ənənələrimizə uyğun etik-davranış qaydalarının onlara daha dərindən aşılanması, bununla yanaşı polisin cəmiyyətdəki nüfuzunun artırılması tədbirlərinın əhəmiyyətini vurğuladı.
Rəisin şəxsi heyətlə iş üzrə köməkçisi, polis polkovniki Fuad Əliyev qeyd etdi ki, gündəlik fəaliyyətində insanlarla, onun ayrı-ayrı sosial qrupları ilə bilavasitə təmasda olan polis əməkdaşlarının intellektual səviyyəsi, geniş dünyagörüşünə malik olması, qanunun aliliyi prinsipinə dönmədən riayət etməsi, rəftarında, müraciətində etik davranış normalarının tələblərini gözləməsi vacibdir. Bütün bu keyfiyyətlərin hər bir əməkdaşa aşılanması üçün fərdi yanaşma prinsipi əsas götürülsə də, kollektivlərdə sağlam mənəvi-psixoloji mühitin mövcudluğu, əməkdaşlar arasında vətənə, dövlətçiliyə, xidməti borca sədaqət hisslərinin bərqərarlığı əldə olunmuş uğurlu nəticələrin davamlılığı üçün başlıca şərtdir.
M.Seyidov onu da diqqətimizə çatdırdı ki, polisdə xidmətin xüsusiliyi ondan ibarətdir ki, biz, yəni polis əməkdaşları mənəvi dəyərlərimizi mühafizə edirik, bir qədər də dəqiqləşdirsək, həm də milli mənəviyyətımızın qoruyucularıyıq. Polis əməkdaşları tərəfindən törədilən neqativ fakt – insan hüquqlarının tapdanmasına yönəldilmiş hər bir əməl, kobudluq, təkəbbürlük, qeyri-etik davranış ictimaiyyət arasında geniş rezonans doğuraraq vətəndaşlarda polisə olan inamın zəifləməsinə, yersiz söz-söhbətlərin yaranmasına səbəb olub, bütövlükdə polisin imicinə ləkə gətirir.
Daxili işlər orqanları əməkdaşlarının qanunvericiliyi öyrənib ona əməl etmələri, mövcud əmr, normativ sənədələrin tələblərinə riayət olunması bütövlükdə polisin işinin səmərəliliyinin yüksəldilməsinə, əhali arasında onun nüfuzunun artırılmasına xidmət etməklə yanaşı, cinayətkarlığa qarşı mübarizə, ictimai asayişin qorunması işinin ümumxalq işinə çevrilməsinə şərait yaratmış olur.
Bu gün insan və vətəndaş hüquqlarının qoruyucusu və təminatçısı rolunda çıxış edən tərəf hüquq-mühafizə orqanları, o cümlədən polisdir. İnsanlar bizdən cinayətkarlığa qarşı barışmazlıq, əməldə düzlük, səriştəlilik və peşəkarlıq, insanpərvərlik, humanistlik gözləyir. Bu keyfiyyətlərin bu gün polisdə xidmətə yeni başlayan, bu sahədə ilk addımlarını atan əməkdaşlara yetərincə aşılanması, eyni zamanda, sabahın dinc həyatının, təhlükəsizliyinin və asayişinin qarantı deməkdir. Çətin, amma çox şərəfli işdir.
Hafiz TƏMİROV polis mayoru
