Fevralın 6-da Hilton otelində BMT-nin İnkişaf Proqramı tərəfindən təşkil olunan “Jurnalistika və Dayanıqlı İnkişaf Məqsədləri” adlı media, bloqqinq və yaradıcı məqalələr vasitəsilə Dayanıqlı İnkişaf Məqsədlərinə (DİM ) dair təlim keçirildi. Təlimdə BMT-nin rezident əlaqələndiricisi Qulam İsakzai çıxış edərək BMT-Azərbaycan əlaqələrindən danışdı.
O qeyd etdi ki, Azərbaycan dövləti dayanıqlı inkişafda maraqlıdır. Azərbaycanın bir tərəfdaş kimi hər zaman aktivliyi ilə seçildiyini deyən İsakzai bildirdi ki, dövlətimiz qarşıya qoyulan hədəflərə çatıb. Azərbaycanın siyasi iradə göstərdiyini deyən İsakzai dayanıqlı inkişafla bağlı məsələdə medianın rolunun böyük olduğunu dedi. BMT təmsilçisi bildirdi ki, mətbuat mesajları, düşüncələri cəmiyyətə çatdırmalıdır. Media əhaliyə dayanıqlı inkişafla bağlı fikirləri çatdırmaq üçün çox böyük iş görə bilər: “Əsas məqsəd dünyada yoxsulluğun azaldılması, təhsili dəstəkləmək, ana və uşaq ölümlərinin qarşısını almaqdır. Bura qoşulan ölkələr bu kimi problemlərlə mübarizə istiqamətində öhdəlik götürüblər. Bizim qarşımızda böyük gündəlik dayanır. Belə ki, 17 məqsədi həyata keçirmək üçün 13 il vaxt müəyyənləşdirilib. Dayanıqlı İnkişaf Məqsədləri özündə 169 hədəfi birləşdirib". BMT rəsmisi bildirdi ki, Azərbaycan BMT ilə sıx əməkdaşlıq edir: “Belə ki, Azərbaycan bu məqsədlərə nail olmaq üçün çox ciddi addımlar atır. Azərbaycan BMT-yə “Yol Xəritəsi”nin hazırlanması prosesi üçün müraciət edib. Həmçinin, bu istiqamətdə ciddi təbliğat-təşviqat işləri həyata keçirilir”. Onun sözlərinə görə, Azərbaycanda dayanıqlı inkişaf istiqamətində mühüm addımlar atılır: “BMT Azərbaycanda dayanıqlı inkişaf üçün hökumətə dəstək verir, medianın inkişafını dəstəkləyir”. İqtisadiyyat nazirinin müavini Sevinc Həsənova da Azərbaycan və BMT əlaqələrindən danışdı. O vurğuladı ki, Azərbaycan minilliyin inkişaf proqramına öz töhfəsini verir: “Azərbaycan 2015-ci ildə BMT-nin Nyu-Yorkdakı mənzil-qərargahında 192 ölkə ilə birgə yeni qlobal dayanıqlı inkişaf məqsədlərinə dair qəbul olunmuş qərara qoşulub. Azərbaycan bundan öncə də BMT-nin təşəbbüslərinə qoşulub. Ölkəmiz bu illər ərzində xeyli inkişaf əldə edib. Son 10 ildə Azərbaycanda ümumdaxili məhsul 1,4 dəfə artıb. Valyuta ehtiyatlarımız, büdcə gəlirlərimiz 2,7 dəfə artıb”. Nazir müavini bildirdi ki, Azərbaycan Respublikasının Prezidenti tərəfindən yürüdülən düzgün iqtisadi siyasət sayəsində Azərbaycan BMT-nin Minilliyin İnkişaf Məqsədi proqramında yoxsulluq səviyyəsinin aşağı salınması üzrə lider ölkədir. Biz bu təşəbbüsə qoşulanda Azərbaycan əhalisinin yarısı yoxsulluq səviyyəsində idi. Biz 2015-ci ilə qədər bu göstəricini 10 dəfəyə qədər aşağı sala bildik. Azərbaycanda yoxsulluğun göstəricisi 4,9 faizə düşüb. Hazırda Azərbaycan dünyada yoxsulluq səviyyəsinin 5 faizdən aşağı olduğu 29 ölkədən biridir”. BMT-nin Ərzaq və Kənd Təsərrüfatı Təşkilatının Azərbaycandakı nümayəndəliyinin rəhbəri Mələk Çakmak isə bildirdi ki, əsas məqsədlərdən biri ətraf mühitin mühafizəsi, su hövzələrinin qorunması, kənd yerlərində yoxsulluğun azaldılması olmalıdır. O qeyd etdi ki, dünya dayanıqlı inkişafa nail olsa, yoxsulluqla mübarizədə irəliyə addım atmış olar. Onun sözlərinə görə, Azərbaycanda həm dövlət, həm də özəl sektorla BMT arasındakı əməkdaşlıq uğurla davam edir.
"DİM-lər və jurnalistik hesabat: qlobal icmal" mövzusunda danışan BMTİP-in İstanbul Regional Mərkəzinin kommunikasiya və KİV-lə əlaqələr üzrə mütəxəssisi Nikolas Douiller müxtəlif mövzularla bağlı təlim iştirakçılarını məlumatlandırdı, auditoriya ilə canlı ünsiyyət quraraq, sualları və fikirləri dinlədi. Təlimçinin təqdim etdiyi praktik sessiya maraq doğurdu, göstərilən məhsullar, məlumatlar iştirakçılara böyük informasiya verdi. Azərbaycan Mətbuat Şurasının sədr müavini Müşfiq Ələsgərli də çıxış edərək çağdaş Azərbaycan mətbuatının mənzərəsi haqqında məlumat verdi. O qeyd etdi ki, Azərbaycanda medianın bütün növləri inkişaf edir. M .Ələsgərli məlumat verdi ki, ölkəmizdə 5 min çap mediası, 300-ə yaxın onlayn media fəaliyyət göstərir. 1 mln. 200 min nəfər sosial şəbəkə istifadəçisi var. Bu gün Azərbaycanda çap mediası və televiziya-radio sahəsində özünütənzimləmə mexanizmi formalaşıb. M.Ələsgərli dedi ki, 2013-cü ildə Azərbaycan Mətbuat Şurasının qurultayında onlayn medianın da özünütənzimləmə mexanizminin yaradılmasını təklif edib. Bu sahədə işlərin görülməli olduğunu bildirən MŞ sədrinin müavini hesab edir ki, qurum BMT-nin dayanıqlı inkişaf proqramına öz dəstəyini göstərir. "Dayanıqlı İnkişaf Məqsədləri üzrə Azərbaycanın mövqeyi " mövzusunda məruzə edən Azərbaycan Respublikası Dayanıqlı İnkişaf üzrə Milli Əlaqələndirmə Şurası Katibliyinin rəhbəri Hüseyn Hüseynov da Minilliyin İnkişaf Proqramının hədəflərindən danışdı. O qeyd etdi ki, Dayanıqlı İnkişaf Məqsədlərinə 17 məqsəd və 169 hədəf aiddir. O, həmçinin, vurğuladı ki, gələcəkdə Azərbaycanda dayanıqlı inkişafla bağlı elmi-tədqiqat işləri yazılacaq.
İradə SARIYEVA
