Elgün Səfərov: “Məişət zorakılığı ilə bağlı “Qaynar xətt”in açılması planlaşdırılır” Mehriban Zeynalova: “Təmiz Dünya” İctimai Birliyinin 2 “Qaynar xətt”i mövcuddur”
“Qaynar xətt” vətəndaşlarla daha rahat və çevik formada əlaqə saxlamaq, yaranmış problemlərlə bağlı onları maraqlandıran suallara dərhal cavab vermək məqsədilə yaradılıb. “Qaynar xətt”dən yararlanan hər bir vətəndaş üzləşdiyi hər hansı bir problemlə bağlı tez bir zamanda aidiyyəti qurumu məlumatlandıra bilər. Əksər dövlət qurumlarının “Qaynar xətt”i mövcuddur.
Maraqlıdır, məişət problemlərindən əziyyət çəkən vətəndaşlar üzləşdikləri sıxıntılarla bağlı hansı qurumun “Qaynar xətt”inə müraciət edirlər?
Qeyd edək ki, qonşu Türkiyə və bir sıra digər ölkələrdə zorakılıqdan əziyyət çəkən qadın və uşaqlar üçün xüsusi “Qaynar xətt” mövcuddur. Azərbaycanda isə ailə-məişət zorakılığından əziyyət çəkənlər Daxili İşlər Nazirliyinin 102 nömrəli “Qaynar xətt”inə müraciət edə bilərlər.
Həmçinin, 2010-cu ildə “Azercell Telekom” MMC-nin dəstəyi ilə “Azərbaycan Uşaq Qaynar Xətt” xidməti yaradılıb. Fasiləsiz olaraq 24 saat fəaliyyət göstərən “Uşaq Qaynar Xətt” xidmətinə həm şəhərdaxili, həm də “Azercell” nömrələrindən edilən zənglər ödənişsizdir. Uşaqlara Bakıda (012) 480 22 80; (051) 880 11 80 və (050) 680 22 80; (088) 480 22 80, Gəncədə isə (022) 256 20 40; (051) 880 22 80; (051) 580 22 80; (088) 256 20 40 nömrələri ilə günün istənilən saatında “Qaynar Xətt” xidmətinə müraciət etmək imkanı yaradılıb.
Ailə-məişət zorakılığından əziyyət çəkənlər üçün Ailə, Qadın və Uşaq Problemləri üzrə Dövlət Komitəsinin “Qaynar xətt”i varmı?
Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov “Bakı-Xəbər”ə açıqlamasında qeyd etdi ki, hazırda komitənin “Qaynar xətt”i yoxdur. Ancaq Dövlət Komitəsinin “Qaynar xətt”inin yaradılması gözlənir: “Xüsusilə də məişət zorakılığı ilə bağlı “Qaynar xətt”in açılması planlaşdırılır. Məlumat üçün bildirim, Azərbaycanda sırf məişət zorakılığı ilə bağlı xüsusi bir “Qaynar xətt” yoxdur. Ancaq bu məsələlər üzrə 102 nömrəsi fəaliyyət göstərir”.
E.Səfərov onu da bildirdi ki, qısamüddətli layihələr çərçivəsində qeyri-hökumət təşkilatlarının “Qaynar xətt”i olub.
“Təmiz Dünya” İctimai Birliyinin rəhbəri Mehriban Zeynalova bizimlə söhbətində qeyd etdi ki, uşaqlara qarşı zorakılıqla bağlı bir sıra təşkilatların “Qaynar xətt”i fəaliyyət göstərir: “Hazırda Ailə, Qadın və Uşaq Problemləri üzrə Dövlət Komitəsi “Qaynar xətt”in yaradılması məsələsini qaldırıb. Çox güman ki, yaxın zamanlarda qeyd olunan qurumun “Qaynar xətt”i fəaliyyət göstərəcək.
Onu da bildirim ki, “Təmiz Dünya” İctimai Birliyinin 2 “Qaynar xətt”i mövcuddur. 012 511 11 51 nömrəli “Qaynar xətt” insan alveri qurbanlarına yardım məqsədilə yaradılıb. Digəri 012-408-56-86 nömrəi isə məhz məişət zorakılığı qurbanları üçün fəaliyyət göstərir”.
Günel CƏLİLOVA
