Bir millətin mövcud olması üçün onun sağlam gəncliyinin olması vacib şərtdir. Hər bir ölkədə dövlətçiliyin, müstəqilliyin daha da möhkəmləndirilməsi, gələcəyin etibarlı təminatı intellektual səviyyəli potensial kadrların yetişdirilməsindən, onların aparıcı qüvvəyə çevrilməsindən asılıdır. ölkəmizdə gənclərlə iş sahəsində, onların inkişafına təkan verən, cəmiyyətdə özlərini təsdiq etməsində böyük əhəmiyyəti olan tədbirlər həyata keçirilir.
Elə bu faktı nəzərə alaq ki, MDB məkanında və Şərqi Avropa ölkələri arasında gənclər günü ilk dəfə Azərbaycanda qeyd olunub. Hər il 2 fevral Azərbaycanda gənclər günü kimi qeyd olunur. Gənclərə göstərilən yüksək diqqət və qayğının nəticəsi olaraq ulu öndər Heydər Əliyev bu barədə müvafiq sərəncam imzalayıb. Aradan ötən müddətdə bu siyasət daha da davam və inkişaf etdirilib.
Dövlət başçımız tərəfindən “Azərbaycan gəncləri 2017-2021-ci illər” Dövlət Proqramının təsdiq olunması barədə imzalanmış Sərəncam gənclərlə bağlı üçüncü Dövlət Proqramıdır. Gənclərlə bağlı ardıcıl olaraq bu qədər proqramların qəbul edilməsində də dövlətimiz liderlik mövqeyini qoruyub saxlayır.
Dövlət Proqramının müvafiq bəndinə əsasən, sənədin əhatə etdiyi dövrdə hər il ölkənin bir rayon və ya şəhərinin "Gənclər Paytaxtı" elan edilməsi nəzərdə tutulub. Bu münasibətlə onlayn səsvermədə iştirak edən gənclər Naxçıvan şəhərinə daha çox səs veriblər, bununla da qədimliyin və müasirliyin harmoniyasında yenidən qurulan bu möhtəşəm şəhəri 2018-ci ildə “Gənclər paytaxtı” olmağa layiq ən ideal məkan hesab etdiklərini nümayiş etdiriblər.
Hazırda Azərbaycan gəncləri vətənpərvər, yüksək intellektli, milli-mənəvi dəyərlərinə, tarixi köklərinə, dövlətə və Vətənə sadiq olmaqla yanaşı, ictimai-siyasi məsələlərlə bağlı əsl vətəndaşlıq mövqeyindən çıxış edərək yüksək fəallıq və təşəbbüskarlıq göstərirlər. Ötən il 160-dan çox ölkədən nümayəndələrin iştirakı ilə Dünya Skaut Təşkilatının 41-ci konfransının Azərbaycanda təşkili Azərbaycan gənclərinin təşkilatlanması, onların beynəlxalq əlaqələrinin inkişafı istiqamətində mühüm nailiyyətlərin əldə olunduğunun bariz nümunəsidir.
Ümummili lider və onun uğurlu siyasətinin layiqli davamçısı, möhtərəm Prezident İlham Əliyev ölkəmizin gələcəyinin intellektli, sağlam təfəkkürlü, geniş dünyagörüşlü, dərin bilikli, mükəmməl təhsil almış, dövlətçiliyə sadiq, vətənpərvər gənclərdən asılı olduğunu çıxış və nitqlərində dəfələrlə vurğulamış, belə gənclərin hər zaman dövlət idarəçiliyində daha geniş şəkildə təmsil olunmaları üçün tövsiyə və tapşırıqlarını verib.
Dövlət gənclər siyasəti daxili işlər orqanlarında da layiqincə yerinə yetirilir. Kadrların hazırlıq səviyyəsinin artırılması, gənc əməkdaşlara lazımi diqqət və qayğı göstərilməsi, onların bacarığına, peşəkarlığına, dövlətçiliyə sədaqətlərinə görə irəli çəkilmələri DİN rəhbərliyinin fəaliyyətində ən ümdə istiqamətlərdən və daim nəzarətdə saxlanılan məsələlərdəndir.
Bunun nəticəsidir ki, son illər minlərlə belə gənc əməkdaş şəffaflıq, aşkarlıq və ədalət prinsipləri əsasında daxili işlər orqanlarında xidmətə qəbul olunub, dövlətə və xalqa sədaqətlə xidmət edir.
Daxili işlər naziri, general-polkovnik Ramil Usubov daxili işlər orqanlarında xidmətə qəbul olunan gənclərlə görüşlərində bu istiqamətdə ulu öndərin və dövlət başçısının müdrik tövsiyələrinin və göstərişlərinin layiqincə yerinə yetirildiyini, gənclərə dövlət qayğısının davamlılığını xüsusi qeyd edir, onlara bilik və bacarıqlarını, təcrübələrini daim artırmalarını, ekstremal hallarda müstəqil qərar qəbul edə bilmələrini, müasir dövrün tələblərinə və çağırışlarına cavab vermələrini, daim öz üzərlərində işləmələrini, ən müasir informasiya texnologiyalarına yiyələnmələrini və praktikada fəal şəkildə tətbiq etmələrini, insan və vətəndaş hüquq və azadlıqlarına, onların şərəf və ləyaqətinə hörmətlə, həmçinin vətəndaşların müraciətlərinə xüsusi diqqət və həssaslıqla yanaşmalarını tövsiyə edir.
Hazırda DİN-də xidmətin daha müasir tələblər səviyyəsində qurulması üçün yeni xidmət sahələri yaradılıb. Burada geniş tətbiq olunan informasiya kommunukasiya texnologiyaları ilə işləyən gənclər asayişin, təhlükəsizliyin təminində yüksək nəticələr əldə edirlər.
Gənc əməkdaşlarımız həm də beynəlxalq miqyaslı yarışlarda, Olimpiya oyunlarında, dünya və Avropa çempionatlarında dəfələrlə fərqlənib, ölkəmizin idman şərəfini layiqincə qoruyublar.
Gənc əməkdaşların elmi-praktiki fəaliyyətdə uğurlar qazanmasına da daim lazımi diqqət yetirilir. Onların hüquqi biliklərinin artırılması, daha peşəkar və hazırlıqlı əməkdaş kimi formalaşmaları üçün DİN-in Polis Akademiyasında güclü elmi baza yaradılıb.
Gənc əməkdaşlar onlara olan inama, göstərilən diqqət və qayğıya cavab olaraq asayişin, sabitliyin qorunması üçün səy və bacarıqlarını əsirgəmədən çalışır, uğur və nailiyyətlərini daha da artırır, istər xidmət, istərsə də texnologiyalar, elmi-nəzəri, praktik sahədə əldə etdikləri göstəricilərlə dəyərli töhfələr verir, bir sözlə, etimadı layiqincə doğruldurlar.
Natiq CAVADOV Zeyni HÜSEYNOV DİN Mətbuat Xidmətinin əməkdaşları
