Ruslan Quliyev: “Bəzi ölkələrin vətəndaşları Azərbaycanda bələdçilik fəaliyyəti ilə məşğul olurlar...”
Hazırda turizmə yerli iqtisadiyyatı stimullaşdıran, ölkə əhalisinin rifahını artıran və həyat keyfiyyətinə və səviyyəsinə təsir göstərən bir sahə kimi baxılır. Buna görə turizm bazarında konkret regionun müsbət imicinin yaradılması xüsusi aktuallıq kəsb edir. Bu kontekstdə turizm böyük əhəmiyyət daşıyır, belə ki, tolerantlıq, bütünlükdə dünya mədəniyyətlərinin müxtəlifliyinin qəbul edilməsi və düzgün başa düşülməsi ideallarına xidmət etməlidir.
Turizmin inkişafı istiqamətində ölkədə müəyyən addımlar atılır. Qanunvericiliyə dəyişikliklər olunur, turizm şirkətlərinin sərbəst fəaliyyət göstərməsi üçün onlara lazımi şərait yaradılır. Ancaq buna baxmayaraq, qeyd olunan sektorda bəzi problemlər yaşanır. Problemlərdən biri, bəlkə də ən böyüyü bu sahədə qeyri-peşəkarların çalışmasıdır. Hüquqi əsas olmadan bir çox fərdlər turizm xidmətləri göstərirlər. Bu da milli turizmin imicinə ciddi mənfi təsir göstərir.
Azərbaycan Sağlamlıq və Termal Turizminə Dəstək Assosiasiyasının prezidenti Ruslan Quliyev “Bakı-Xəbər”ə açıqlamasında qeyd etdi ki, turizm sahəsi xüsusi professionallıq tələb edir: “Məlumdur ki, 2016-cı ildə lisenziyaların ləğv olunması haqqında sərəncam imzalandı. Həmin sərəncamadək 270 turizm şirkəti lisenziya almışdı. Sonralar bazarda araşdırma apararkən məlum oldu ki, hazırda 1400-ə yaxın şirkət fəaliyyət göstərir. Həmin şirkətlərdə çalışanların peşəkarlıq səviyyəsinin hansı formada olması isə bəlli deyil. Bu gün hansısa şirkətdə bələdçi kimi çalışan şəxs sabah “İnstagram” və ya “Facebook” səhfəsində virtual şirkət yaradır. Bunun nəticəsi isə xoş olmur”.
Həmsöhbətimizin sözlərinə görə, turizm sektoru ölkənin təqdimatı deməkdir: “Təhrif olunmuş materialların yayımlanması birbaşa ölkənin imicinə təsir edir. Bu hal birbaşa qara piar xarakteri daşıyır. Onu da deyim ki, bəzi ölkələrin vətəndaşları Azərbaycanda bələdçilik fəaliyyəti ilə məşğul olurlar. Dünyanın ən inkişaf etmiş ölkələrində belə turizm qanunları olduca sərtdir. İstər Türkiyə, istərsə də Avropada başqa ölkənin vətəndaşı bələdçi kimi çalışa bilməz. Eyni zamanda, turizm avtobusu icazəsiz Türkiyədə hava limanına daxil olarsa, həmin şirkət müəyyən məbləğdə cərimə olunacaq”.
R.Quliyev onu da bildirdi ki, xarici bələdçi kimi fəaliyyət göstərən şəxslərin işinə nəzarət olunmur. Onun hansısa abidəni necə təqdim etməsinə heç kim nəzarət etmir: “Müəyyən dəyərlər var ki, onu qorumaq lazımdır. Ümid edirik ki, turizm haqqında qanun və vahid turizm reyestri qəbul olunandan sonra bu sahədə müəyyən dəyişiklik olacaq.
Hətta ölkə başçısı da dəfələrlə öz çıxışlarında qeyd edib ki, Azərbaycana gələn turist razı qalmalıdır. Xarici turistlərin başına hər hansı hadisənin gəlməsi turizm sektorunda qeyri-peşəkarların olması ilə bağlıdır”.
Günel CƏLİLOVA
