Bahadur Bilalov: “ASAN viza” portalı ilə qısa müddət ərzində viza alınması artıq mümkündür”
Xəbər verildiyi kimi, Azərbaycan Prezidenti İlham Əliyev respublikanın beynəlxalq hava limanlarında əcnəbilərə və vətəndaşlığı olmayan şəxslərə viza verilməsi prosedurunun təkmilləşdirilməsi haqqında Fərman imzalayıb. Azərbaycan Respublikasının qanunlarında, Azərbaycan Respublikası Prezidentinin aktlarında və Azərbaycan Respublikasının dövlətlərarası və ya hökumətlərarası müqavilələrində nəzərdə tutulmuş hallarda əcnəbilərə və vətəndaşlığı olmayan şəxslərə Azərbaycan Respublikasının beynəlxalq hava limanlarında viza verilməsi “ASAN viza” sistemi vasitəsilə elektron qaydada həyata keçirilir.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi Azərbaycan Respublikasının beynəlxalq hava limanlarında vizaların “ASAN viza” sistemi vasitəsilə verilməsini, habelə viza ilə əlaqədar ödənişlərin “ASAN ödəniş” sistemi vasitəsilə həyata keçirilməsini təmin etməlidir.
Məlumat üçün bildirək ki, fərman 2018-ci il mayın 15-dən qüvvəyə minir.
Beynəlxalq hava limanlarında əcnəbilərə və vətəndaşlığı olmayan şəxslərə viza verilməsi prosedurunun təkmilləşdirilməsi ölkəyə gələn turistlərin sayına təsir edəcək.
Turizm sahəsi üzrə mütəxəssis Bahadur Bilalov “Bakı-Xəbər”ə açıqlamasında qeyd etdi ki, viza verilməsi qaydasının sadələşdirilməsi turist axınına təkan verən amillərdən biridir: “Zaman-zaman Dünya Turizm Təşkilatı turizmin inkişafı nöqteyi-nəzərdən ölkələrə tövsiyə edir ki, viza verilməsi məsələsi sadələşdirilsin. Bu baxımdan ölkə başçısı İlham Əliyevin imzaladığı fərman yalnız alqışlanmalıdır. Bəllidir ki, “ASAN viza” portalı ilə qısa müddət ərzində viza alınması artıq mümkündür. Həmçinin, beynəlxalq hava limanlarında “ASAN viza” rejiminin tətbiq olunması işin daha da sadələşdirilməsinə yönəlib. Beynəlxalq hava limanında hər bir əcnəbi vizasını almaqla sərhədi keçəcək”.
B.Bilalovun fikrincə, beynəlxalq hava limanlarında əcnəbilərə vizanın verilməsi ölkəyə gələn turistlərin sayına təsir edəcək.
Günel CƏLİLOVA
