Rasif Bağırov: “Bəzən apteklərdə çalışanlar xəstəyə aidiyyəti olmayan preparat verirlər”
Məlum olduğu kimi, əczaçılar üçün əsas tələblər müəyyənləşib. Fasiləsiz olaraq ixtisasları üzrə 5 ildən çox işləməmiş əczaçılar müvafiq tədris müəssisələrində hazırlıq keçdikdən sonra əczaçılıq fəaliyyəti ilə məşğul ola bilərlər. Bu, Səhiyyə Nazirliyinin Kollegiyasının təsdiq etdiyi və yanvarın 23-dən qüvvəyə minən “Dərman vasitələrinin topdan satışına dair tələblər”də əksini tapıb.
Dərman vasitələrinə olan tələb və təklifi öyrənmək, dərman vasitələrinin dövriyyəsinə aid olan xüsusi sənədləri tərtib etmək, dərman vasitələrinin və tibbi ləvazimatların keyfiyyətinə nəzarəti və hərəkəti haqqında hesabatı təşkil etmək, dövlət nəzarətində olan dərman qrupları ilə işləmək və qüvvədə olan normativ sənədlərin tələblərinin yerinə yetirilməsini təmin etmək üçün topdansatış müəssisəsinə kifayət sayda peşəkar əczaçılıq ixtisası olan mütəxəssislər cəlb olunmalıdırlar. Topdansatış müəssisəsinin fəaliyyəti ilə bağlı olan digər işlərin görülməsinə uyğun ixtisaslı və təhsilli mütəxəssislər buraxılırlar. Topdansatış müəssisələrində işləyən əczaçılar beş ildə bir dəfədən az olmayaraq ixtisasartırma və kadrların hazırlığı müəssisələrində müəyyən proqram üzrə təhsil almalıdırlar. Topdansatış müəssisəsində keyfiyyətin idarə olunmasına məsul şəxs ayrılmalıdır, keyfiyyətin idarə olunmasına məsul şəxsin əczaçılıq ixtisası üzrə təhsilinin olması arzuolunandır. Məsul şəxs müvafiq ixtisasa malik olmaqla yanaşı, həmçinin, Etibarlı Distribüter Təcrübəsi (EDT) üzrə lazımi bilik və təcrübəyə malik olmalıdır. Müəssisədə işçi heyətdən düzgün istifadə olunmalı, şəxsi gigiyena və texniki təhlükəsizlik qaydaları üzrə onların hazırlığı və yenidən hazırlığı, eləcə də işə daxil olarkən dövri tibbi müayinələrin keçirilməsi təmin edilməlidir. Dərman vasitələri saxlanan sahələrdə çalışanlar yerinə yetirdikləri işə uyğun olaraq xüsusi qoruyucu və ya iş geyimləri ilə təmin edilməlidirlər.
Dərman vasitələrinin topdansatış mərkəzlərində çalışacaq şəxslərin 5 il təcrübəsinin olmasına ekspertlər fərqli yanaşırlar.
Tibbi ekspert Rasif Bağırov bizimlə söhbətində qeyd etdi ki, söhbət topdansatış mərkəzlərində çalışan əczaçıların peşəkarlığından getmir: “İstənilən aptekdə çalışan işçilər kifayət qədər təcrübəli olmalıdırlar. Topdansatış mərkəzləri adətən apteklərə mal verir. Onların işi prosesləri bilmək, dərmanları yükləmək və apteklərə verməkdən ibarətdir. Apteklərdə çalışan işçilərin peşəkar olması vacibdir. Danılmaz faktdır ki, bu gün Azərbaycanda çoxlu sayda dərman var ki, adları bir və ya iki hərf fərqi ilə bir-birinə bənzəyir. Bəzən apteklərdə çalışanlar bu tip hallarla rastlaşan zaman xəstəyə aidiyyəti olmayan preparat verirlər. Bu sahədə təcrübəli və diqqətli olmağa ehtiyac var”.
Həmsöhbətimizin sözlərinə görə, əhaliyə xidmət göstərən apteklərdə təcrübəli kadrların çalışmasına ehtiyac var.
Günel CƏLİLOVA
