Suraxanı rayonunun Bülbülə qəsəbəsi, 3-cü mədən küçəsi ev 32 ünvanda yaşayan 78 yaşlı, ömrünün nə az, nə çox, düz 53 ilini neft sənayemizdə çalışmış Əliyev Məmməd Mehrəli oğlunun redaksiyamıza göndərdiyi məktubu emosiyasız oxumaq mümkün deyil. Yaşadığı evin hər an başına uçacağını elə inandırıcı yazıb ki, 78 yaşlı bu ixtiyar qocanın səmimi olduğuna bir balaca da şübhə qalmır.
1957-ci ildən 2008-ci ilədə Suraxanı Neft-Qaz Çıxarma İdarəsinin (NQÇİ), indiki Suraxanı OİL şirkətinin operatoru işləmiş qocaman neftçi ömrünün qalan günlərini görəsən niyə qorxu altında yaşayır? Niyə indiyə qədər ev almayıb?
Məktubdan görünür ki, ev almaq üçün cəhdlər göstərib, özündən asılı hər şey edib...
“2005-ci ildə mənzil növbəsinə dayandım”
İndi yaşadığı bərbad evin yaşayış üçün qətiyyən yararlı olmadığını müvafiq komissiya hələ 2004-cü ilin 12 mayında təsdiqləyib. Suraxanı İcra Hakimiyyəti Müəssisələrarası Komissiyasının sədri Z.Fətullayev, üzvləri - KBM-in şövbə müdiri B.Bəylərov, DYTX-nin rəis müavini A.İbrahimov Məmməd Əliyevin Bülbülədəki indiki evinə baxış keçiriblər. Komissiya təsdiqləyib ki, ev 1931-ci ildə tikilib. Üç otaq və mətbəxtdən ibarət evin yaşayış sahəsi 44,1 kvadrat metrdir. Komissiyanın yekun rəyi: “Bülbülə qəsəbəsi, 3-cü mədən küçəsi 32 ünvanda yerləşən mənzil sanitar-texniki və inşaat normalarına qəti uyğun olmadığı üçün yaşayış üçün yararsız hesab edilsin”.
İndi də Suraxanı neft NQÇİ-nin rəhbərliyi və həmkarlar ittifaqı komitəsinin birgə iclasının 10 may 2005-ci il tarixli 12 saylı protokolundan çıxarışa baxaq. Suraxanı NQÇİ-nin rəis müavini Axundov Ç.M, Rəhimov R.Ə, Əliməmmədov M, Bayramov R, Almazov E, Məhərrəmov M, Əzimov B, Quluzadə N, Əliyev N. iştirak etdikləri iclasda tək bir məsələ müzakirə olunub və müvafiq qərar verilib. Qeyd edilib ki, 1957-ci il noyabrın 26-dan Suraxanı NQÇİ-də operator işləyən, qəzalı evdə yaşayan Əliyev Məmməd ərizə ilə müraciət edərək 2 nəfər ailə tərkibi ilə mənzil növbəsinə götürülməsini və 15 ildən artıq bir müəssisədə işlədiyi üçün güzəştli siyahıya daxil edilməsini xahiş edib. Sonda elə bu cür də qərar verilir, onun güzəştli siyahıya daxil edilməsi qərara alınır və bu qərarın təsdiqi Suraxanı Rayon İcra Hakimiyyətinin başçıxından xahiş edilir.
Göründüyü kimi, 2005-ci ildə özünü ev almaq xoşbəxtliyinin bir addımlığında görən neftçi birdən-birə ondan uzaqlaşır və hər şeydən məhrum olur, ev almaq şansından da...
Niyə?
Yazır ki, 2006-cı ildə Dövlət Neft Şirkəti “bizim idarəni ləğv etdi” və “aradakı mənzil növbəsini nəzərə almadı”, “bizim idarəni Suraxanı OİL şirkətinə icarəyə verdilər”.
Ağır xəstə olan və bu vəziyyətdə redaksiyamıza çətinliklə məktub gətirən Məmməd Əliyevin yazdışı bəzi cümlələr dolaşıq görünsə də, birtəhər aydınlaşdıra bilirik ki, Məmməd Əliyevə yalnız bir halda mənzil ala biləcəyi bildirilib – ona tövsiyə ediblər ki, “Dövlət Neft Şirkətinin Neftçi Kooperativinə üzv olsun”. Biz redaksiya olaraq belə bir kooperativin həqiqətdə necə adlandığını və hazırkı problemin həllində kooperativin hansısa imkanlara malik olub-olmadığını deyə bilmərik. Yaşlı neftçi isə çətinliklə danışdığı üçün nəyisə sonadək tam izah edə bilmir. Ancaq bunu bildirir ki, ayda cəmi 255 manat təqaüd alan imkansız bir vətəndaş olduğu üçün kooperativə o qədər mənzil pulunu necə ödəyə bilərdi?!
Təsirli sualdır. Məmməd Əliyevin mənzil tarixçəsinə aid köhnə sənədlərə – protokollara, qərarlara baxanda onun mənzil almağa tam haqlı olduğunu görürsən. Ancaq bu, 2006-cı ilə qədərki sənədlərin hökmüdür. Həmin sənədlərin bu gün nə dərəcədə qüvvədə qalıb-qalmadığını qanunvericilik baxımından təyin etmək Dövlət Neft Şirkətinin səlahiyyətindədir və borcudur.
Neft Şirkətinin indiki rəhbərliyinin qocaman neftçilərin haqlarına laqeyd yanaşdığına dair bu vaxtadək söz-söhbət eşitməmişik. Elə Məmməd Əliyev özü də inanır ki, Neft Şirkətinin rəhbərliyi onun mənzil almaq haqqına, daha doğrusu “ölmüş mənzil növbəsinin” hansısa formada bərpasına həssas yanaşacaq.
Elə biz də məhz bu ümidlə məktubun ümumi məzmununu çap edirik.
Dərc olunan məktubla bağlı Dövlət Neft Şirkətinin və ya Suraxanı OİL şirkətinin hər hansı reaksiyası olarsa, qəzetimizdə və baki-xeber.com saytında ona yer ayıra bilərik.
Hazırladı: Namiq QULİYEV
