Məlahət Mürşüdlü: “Elə xəstəliklər var ki, onların daşıyıcıları uşaqlarla tez-tez təmasda olmasa yaxşıdır”
Azərbaycanda tibbi müayinədən imtina edən, bəzi xəstəliklər aşkarlanan müəllimlərin məktəbəqədər təhsil sahəsində işləməsinə icazə verilməyəcək. Bu, Nazirlər Kabineti tərəfindən yeni təsdiqlənmiş "Məktəbəqədər təhsil sahəsində təhsilverənlərin tibbi müayinədən keçməsi qaydası"nda öz əksini tapıb. Bu qaydalara görə, təhsilverənlərlə əmək müqaviləsi bağlanarkən onların yaşadığı ərazi üzrə ambulator və ya stasionar tibbi xidmət göstərən tibb müəssisəsindən sağlamlıq haqqında arayışın təqdim olunması vacibdir.
Təhsilverənlər “Məktəbəqədər təhsil haqqında” Qanuna uyğun olaraq, ildə bir dəfə dövlət tibb müəssisələrində dövri tibbi müayinədən dövlət hesabına keçirlər.
Tibbi müayinədən imtina edildikdə və dövri tibbi müayinədən keçmiş şəxslərdə bəzi xəstəliklər aşkar edildikdə, onların işə buraxılmasına yol verilmir. Həmin xəstəliklər tam sağalma təsdiq edilənə qədər vərəm xəstəliyinin bütün klinik formaları, sifilis xəstəliyi, süzənək xəstəliyi, helmintozlara (qurda yoluxma) və patogen ibtidailərə (amöbiaz, balantidiaz, ləmblioz) yoluxmalar, kəskin və xroniki bağırsaq infeksiyalarının bütün klinik formaları, kəskin virus infeksiyaları, kəskin bakterial infeksiyalar, bakterial infeksiyalarla bağlı bakteriyagəzdirənliyin bütün formaları, ruhi xəstəliklər, narkoloji xəstəliklər (narkomaniya, alkoqolizm, toksikomaniya), ağıreşitmədir.
Təhsil ekspertləri də ciddi xəstəliyi olan şəxslərin müəllim kimi çalışmasının düzgün olmadığını düşünürlər. Onların fikrincə, müəllim bir neçə saat məktəbli ilə təmasda olur. Bu müddət ərzində təhlikəli sayılan keçici viruslar şagirdlərə keçə bilər. Ona görə də həmin pedaqoqların tam sağalana qədər çalışmasının düzgün olmadığı bildirilir.
Azad Müəllimlər Birliyinin rəhbəti Məlahət Mürşüdlü bizimlə söhbətində qeyd etdi ki, səhhətində ciddi problemi olan pedaqoqların müəllim kimi çalışması düzgün deyil. O şəxslərin çalışması həm özlərinə, həm də şagirdlərinin səhhətinə zərərdir: “Elə xəstəliklər var ki, müəllimin ondan əziyyət çəkməsini şagird görməməlidir. Bu hal şagirdin psixologiyasına mənfi təsir göstərəcək. Həmçinin, keçici infeksiyalar var ki, istənilən an məktəbli həmin virusa yoluxa bilər. Səhhətində problemi olan şəxs, istənilən halda, dərsi tam şəkildə məktəbliyə izah edə bilməyəcək. Onun fikri tez bir zamanda sinif otağını tərk edib, ağrıkəsici dərmanı qəbul etmək olacaq. Elə xəstəliklər var ki, onların daşıyıcıları uşaqlarla tez-tez təmasda olmasa yaxşıdır. Bəllidir ki, istənilən yaş dövründə olan uşağın orqanizmi həssas olur. Onlar hər hansı bir keçici xəstəliyə tez bir zamanda yoluxa bilərlər”.
Həmsöhbətimizin sözlərinə görə, qeyd olunan xəstəliklərdən əziyyət çəkən pedaqoqlar tam şəkildə sağalandan sonra yenidən müəllimlik fəaliyyəti ilə məşğul ola bilərlər.
Günel CƏLİLOVA
