Lerik rayonunun ucqar dağ kəndlərində ayrı-ayrı adamlar heç nəyə məhəl qoymadan özlərinə aid olmayan torpaqları çəpərə alırlar. Artıq bir neçə ildir ki, bu qorxunc hal kütləvi şəkil alıb.
Harada bir yamac, dərə kənarı, su hövzəsi, kəndə yaxın, ona füsunkarlıq gətirən meşəlik var, dədə malı kimi zəbt olunur. Hətta camaatın istifadə etdiyi yollar da tutulur. Ən çox narahatlıq doğuran isə mal-qaranın otlaq sahələrinin, bulaqların hasara salmasıdır. Dediyim bu vəziyyət qonşu olan Daster, Siyov və Bürsülüm ərazilərində son həddə çatıb. Çəpər etmə eşqinə düşənlərin arasında balta davası olur, qohumlar, kəndlər bir-birinə düşmən kəsilir. Meşələrə “ sahib” duranlar cavan ağacları qırır, zindanlanan bulağın gözü tutulur, bir sözlə, təbiət öz görkəmini itirməklə sanki vəhşiləşir.
Bir misal. Dasteri Siyov ərazisindən ayıran “ Əlioba” adında geniş bir ərazi var. Yamaclıq olan bu yer əsasən kol-kosdan ibarətdir. Odur ki, dövlət tərəfindən örüş yeri kimi nəzərdə tutulub. Yamacın aşağısından çay keçir. Aküşəpeştə kənd sakinləri ərazini elə çəpərə salıb ki, Bradi kəndinin mal-qarası çaya düşüb su içə bilmir. Guya sovet vaxtı ərazi aküşəpeştəlilərə məxsus olub.
Ləkər, Vənədı kəndlərinə yaxın olan meşə bir-iki adam arasında bölünüb. Ümumiyyətlə, hər üç ərazidə kim haranı istəsə, çəpərləyə bilir. Əvvəllər bu “çəpərləmə əməliyyatı” ilə bağlı cinayət işləri açılıb. Nəticəsi olmayıb. İndi heç bir məsuliyyət hissi olmadan çəpərlərin sayı artmadadır. Bunun da ziyanını ən çox təbiət çəkir. Belə getsə, qarşıdan gələn təhlükə dəhşətli olar.
Zəfər ORUCOĞLU Azərbaycan Jurnalistlər Birliyinin üzvü
