Adil Qeybulla: “Narkotik vasitələrin və psixotrop maddələrin, güclü təsirə malik maddələrin, o cümlədən adi dərmanların xüsusi saxlanma qaydası var”
Səhiyyə Nazirliyinin Kollegiyası aptek təşkilatlarında dərman vasitələrinin saxlanması və keyfiyyətinin təmin edilməsi tələblərini təsdiqləyib. Təsdiqlənən yeni tələblərə əsasən, narkotik tərkibli dərmanlar apteklərdə siqnalizasiyası olan otaqlarda saxlanacaq. Narkotik vasitələrin və psixotrop maddələrin, həmçinin, zəhərli və güclü təsirə malik maddələrin saxlanması üzrə də tələblər müəyyən edilib.
Bu tələblərə əsasən, giriş qapısının qalınlığı ən azı 40 mm olmaqla dəmirdən olmalı və ya hər iki tərəfdən dəmirlə üzlənməlidir, dəmir təbəqəsi qapının tirinə və ya daxili səthinə vurulmalıdır. Qapının çərçivəsi polad hissədən hazırlanmalıdır. Daxildə barmaqlıqlı metal qapı, pəncərələrdə daxili barmaqlıqlar diametri ən azı 16 mm olan polad çubuqdan hazırlanmalıdır. Çubuqlar hər bir kəsişmə nöqtəsində qaynaq olunmalı və ölçüsü 150x150 mm-dən çox olmayaraq özəklər yaradılmalıdır. Müdafiənin ikinci sərhədinə, daxili qapılara, divarlara, tavana qoşulmuş qorunma siqnalizasiyasının olması vacibdir. Narkotik vasitələr, psixotrop maddələr, zəhərli və güclü təsirə malik maddələr bağlanan seyflərdə və qorunan yerlərdə saxlanır. Narkotik vasitələrin, psixotrop maddələrin, zəhərli və güclü təsirə malik maddələrin saxlandığı yerlərə yalnız aptek rəhbərinin əmri ilə təyin olunmuş maddi məsul şəxslərin girişinə icazə verilir.
Narkotik tərkibli dərmanların apteklərdə xüsusi otaqlarda saxlanmasına münasibət bildirən professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, dərman maddələrinin dövriyyəsi qanunvericiliyin tələbinə uyğun olaraq müəyyənləşib: “İstənilən dərmanın hansısa şkafda saxlanması xüsusi olaraq müəyyən olunur. Elə dərman var ki, onlar A, bəziləri isə B və ya digər şkaflarda saxlanır. Narkotik vasitələrin və psixotrop maddələrin, güclü təsirə malik maddələrin, o cümlədən adi dərmanların xüsusi saxlanma qaydası var. Həmçinin, tez xarab olan dərmanlar da müvafiq qaydada saxlanır. Ümumiyyətlə, bütün dərmanlar təlimata uyğun şəkildə saxlanır. Bu qaydalar aptek şəbəkəsindən tutmuş, daxili apteklərə qədər gözlənilməlidir. Təəssüflər olsun ki, bu qaydalara bəzi apteklərdə riayət olunmur”.
Həmsöhbətimiz onu da bildirdi ki, bəzi hallarda fermantativ, hormonal dərmanlar yüksək temperaturda inakvasiya olunur. Artıq bu dərmanları orqanizmə yeritməyin heç bir xeyri olmur: “Bu baxımdan dərmanlar və farmokologiya ilə bağlı ümumi bir qayda-qanun olmalıdır. Həmin qaydalarda bu məsələnin hər bir detalı öz əksini tapmalıdır”.
Günel CƏLİLOVA
