İlqar Hüseynli: “Çalışmaq lazımdır ki, belə mərkəzlərdə bacarıqlı mütəxəssislər fəaliyyət göstərsinlər”
Uşaq və yeniyetmələr arasında böhran vəziyyətləri, intiharlar, aqressiv və digər risqli davranışların profilaktikası aparılacaq. Belə ki, səhiyyə naziri Oqtay Şirəliyev Azərbaycanın regionlarında uşaq psixi sağlamlıq bölmələrinin yaradılması barədə əmr imzalayıb.
Əmrə əsasən, İmişli, Ağcabədi, Masallı, Zaqatala, Şamaxı, Abşeron, Şəmkir və Kürdəmir rayonlarında uşaqlara tibbi xidmət göstərən ambulator-poliklinika müəssisələrində (şöbələrdə) uşaq psixi sağlamlıq bölmələri təşkil edilib və həmin bölmələrə təhkim olunmuş ərazi üzrə uşaqlara psixi sağlamlıq xidmətinin göstərilməsi üçün regional mərkəz funksiyası həvalə olunub.
Uşaq psixi sağlamlıq bölmələrinin tərkibinə rayon (şəhər) tibb müəssisələrinin mövcud ştat vahidləri və əməkhaqqı fondu çərçivəsində həkim-psixiatr, loqoped, psixoloq, tərbiyəçi, müalicəvi bədən tərbiyəsi üzrə təlimatçı və əmək terapiyası üzrə təlimatçı ştatları daxil edilib.
Bölmələr psixi sağlam sahəsində ehtiyacı olan uşaq və yeniyetmələrin müayinəsini həyata keçirəcək, uşaq və yeniyetmələr arasında böhran vəziyyətləri, intiharlar, aqressiv və digər risqli davranışların profilaktikasını aparacaq, uşaq və yeniyetmələr arasında mövcud olan psixi sağlamlıqla bağlı statistik məlumatlar toplanaraq illik hesabat şəklində Səhiyyə Nazirliyinin Psixi Sağlamlıq Mərkəzinə təqdim edəcək.
Maraqlıdır, bütün bunlar uşaqlar arasında intihar hallarının azalmasında necə rol oynayacaq?
Məsələyə münasibət bildirən ekspert İlqar Hüseynlinin sözlərinə görə, regionlarda belə bölmələrin yaradılması müsbət haldır: “Ümumiyyətlə, son illər uşaqlar arasında baş verən intiharların kökündə dayanan əsas faktor məhz psixi pozğunluqdur. Eyni zamanda, belə halların baş verməsi nevroz sindromunun nəticəsi kimi dəyərləndirilir. Sözsüz ki, bununla bağlı bölgələrdə profilaktik tədbirlərin aparılması çox önəmlidir. Ona görə də uşaqların psixi durumunun daim nəzarət altında saxlanması, yeniyetmələrin psixoloji affekt vəziyyətindən uzaqlaşdırılması baxımından işlərin görülməsi doğru yanaşmadır. Yəni məhz bununla bağlı regionlarda uşaq psixi sağlamlıq bölmələrinin yaradılması problemin həllinə müsbət təsir göstərə bilər. Bununla bağlı psixo-nervoloji reabilitasiya, yardım mərkəzlərinin bölgələrdə yaradılmasına ümumiyyətlə ehtiyac var. Məsələ ondadır ki, əsasən Bakıda belə mərkəzlər fəaliyyət göstərir. Ona görə də vətəndaşlar çox vaxt Bakıya gəlməli olurlar. Bu da bütün bölgə uşaqları üçün əlçatan deyil. Çünki elə insanlar var ki, bu haqda məlumatı olmur. Nəticədə uşaqlar bundan məhrum olurlar. Ona görə də hesab edirəm ki, regionlarda belə mərkəzlərin fəaliyyətinin güclənməsi, qismən də olsa, sözügedən problemin həllinə öz təsirini göstərəcək. Bu baxımdan hesab edirəm ki, regionlarda uşaq psixi sağlamlıq bölmələrinin yaradılmasını dəstəkləmək lazımdır. Çalışmaq lazımdır ki, belə mərkəzlərdə bacarıqlı mütəxəssislər fəaliyyət göstərsinlər. Belə olsa, o zaman müsbət nəticə özünü göstərəcək”.
Vidadi ORDAHALLI
