Son aylar Lerik rayonunun dağ kəndi olan Bradidə hər gün işıqların kiçik fasilələrlə 10-15 dəfə sönməsi əhalini narazı salır. Ən çox da dediyim vəziyyət axşamüstü və səhər, qaranlıq hələ çəkilməmiş baş verir. Belə vaxtlarda işığın olmamağı bir yana, evdə olan elektrik cihazları sıradan çıxır, hətta yanğın təhlükəsi yarana bilər.
Kənddə uzun illərdir ki, işıq problemi öz həllini gözləyir. Doğrudur, bu dağ kəndində 60-cı illərin yadigarı olan, artıq ömrünü başa vuran dibi çürük ağac dirəkləri hələ də qalır. Kəndin içində o qədər məftildən asılı dirəklər var ki, saya gəlmir. Balaca yağış, qar yağanda, zəif külək əsəndə sallanmış məftillər bir-birinə dolaşır, günlərlə kənd işıqsız qalır.
Ən təəccüblüsü odur ki, ilin isti günlərində bir balaca da olsun bu yararsız xətlərə əl gəzdirən tapılmır. Amma belə günlərdə dirəklərin dibini bərkitməklə, sallanan məftilləri yerinə qoymaqla müəyyən işləri görmək olar. “Montyorlar” belə günlərdə işdə görünmürlər. Elə ki, şaxtalar düşür, işə çıxırlar. Nəticədə görülən iş keyfiyyətsiz alınır, həftələrlə işıq olmur...
Artıq kənd camaatı onların bu iş üslubuna alışıb. Əvvəldən lampa yandırıb, evlərinə işıq saçmaq üçün bol neft tədarük ediblər. Bu ehtiyatla qışı birtəhər yola verə bilərlər.
Məsələ ondadır ki, ölkəmiz hərtərəfli inkişafı ilə dünyada nüfuz sahibidir. Bu danılmaz həqiqətdir. Bradi kəndi də ölkənin kiçik parçasıdır. Belə bir tərəqqi dövründə lampa işığına möhtac olmaq yaxşı düşmür. Yəqin ki, bundan sonra Lerikdə əlaqədar təşkilatların vəziyyəti dəyərləndirməsil kəndin işıq problemi öz həllini tapacaq.
Zəfər ORUCOĞLU, Azərbaycan Jurnalistlər Birliyinin üzvü.
