Ölkəmizdə həyata keçirilən idman siyasəti, idmana qayğı daxili işlər orqanlarından da yan keçməyib. DİN rəhbərliyinin diqqəti, gündəlik nəzarəti və tələbkarlığının nəticəsidir ki, indi idmançı əməkdaşların qələbə sorağı Olimpiya yarışlarından, Dünya və Avropa çempionatlarından gəlir.
Ölkəmizdə sabitliyin, əminamanlığın yaradılmasında böyük fədakarlıqlar göstərmiş, hər zaman xalqın və dövlətin müdafiəsi üçün üzərinə düşən vəzifələri layiqincə yerinə yetirməklə xalqın etimadını qazanan Azərbaycan Polisinin 100 illik yubileyi ilə əlaqədar müxtəlif tədbirlər keçirilir. DİN İdman Cəmiyyətində keçirilən mini-futbol yarışı da möhtəşəm yubileyə həsr olunmuşdu.
Yubiley şərəfinə gerçəkləşən mini-futbol üzrə DİO-nun nizami hissələri arasında keçirilən yarışda qələbə uğrunda Daxili Qoşunların Baş İdarəsi, Bakı Şəhər Baş Polis İdarəsi, Baş Mühafizə İdarəsi, Nəqliyyatda Baş Polis İdarəsi, Polis Akademiyası, Əlahiddə Çevik Polis Alayı, Baş Dövlət Yol Polisi İdarəsi olmaqla 7 komanda 2 qrupda mübarizə aparıblar. Tədbirin əsas məqsədi həm də DİN-in yığma komandasını müəyyənləşdirməkdir.
Yanvarın 18-də DİN Nəqliyyatda Baş Polis İdarəsinin və Əlahiddə Çevik Polis Alayı komandaları görüşüblər. Oyun öncəsi NBPİ-nin rəis müavini, polis polkovniki Rövşən Eyyubov çıxış edərək bildirib ki, Azərbaycan Polisi cinayətlərin qarşısının alınması, ictimai qaydanın və təhlükəsizliyin qorunması, insan hüquq və azadlıqlarının təmin edilməsi kimi məsul vəzifələri vicdanla yerinə yetirir, hər zaman xalqın və dövlətin mənafeyinə ləyaqətlə xidmət edir. Qeyd olunub ki, müstəqilliyin ilk illərində ölkədə hakimiyyət uğrunda gedən mübarizənin yaratdığı vətəndaş qarşıdurması, xarici qüvvələrin dəstəklədiyi Ermənistanın Azərbaycana qarşı təcavüzü yeni yaranmış respublikanı uçuruma sürükləyirdi. Belə bir zamanda - dövlətçilik, müstəqillik təhlükə altında qalanda ulu öndər xalqın təkidli tələbi ilə hakimiyyətə qayıtdı, 1993-cü il iyun ayının 15-dən sonra xaosdan qurtuluşa keçidin əsası qoyuldu, ölkənin ictimai-siyasi həyatında və kriminogen durumda köklü müsbət dəyişikliklər baş verdi.
Polis polkovniki Rövşən Eyyubov cinayətkarlığa qarşı mübarizənin daha effektli aparılması, açılması, dövlətin maraqlarının etibarlı qorunması, ictimai asayişin təmin edilməsi, şəxsi heyətin nizam-intizamının gücləndirilməsi, polis-vətəndaş münasibətlərinin daha yüksək səviyyəyə qaldırılması üçün üzərinə düşən vəzifələri layiqincə yerinə yetirdikləri kimi, polisimizin Azərbaycanın möhtəşəm idman uğurlarına öz töhfələrini verdiyini də xüsusi vurğulayıb.
Sonra komandalar arasında yarışlara start verilib. Gərgin keçən yarışda Nəqliyyatda Baş Polis İdarəsinin komandası 5-2 hesabıyla qələbə qazanıb.
Yeri gəlmişkən, yarışdan sonra qalib komandanın baş məşqçisi ilə görüşmək imkanından yararlanıb ona bir neçə sual ünvanladıq. “Qələbə qazanmaq üçün zəhmət əsas şərtdirmi” - sualına cavab belə oldu: “Komandanın uğur qazanması heç də asan başa gəlməyib. Demək olar ki, bütün komandaların hazırlıq səviyyəsi yüksək səviyyədədir. Ümumən polis idmançılarımız ustalıqlarının artırılmasının qayğısına qalırlar. Çalışdırdığım komandanın bəxti onda gətirdi ki, Baş İdarənin rəis müavini, polis polkovniki Rövşən Eyyubov bütün təminat işlərini öz üzərinə götürüb. Komandanın geyim formasından başlamış, təlim-məşq toplantılarının keçirilməsinə qədər bütün qayğıları ilə məşğul olur. Elə bunun nəticəsində də komandamız gərgin idman mübarizəsində layiqli qələbə qazana bildi”. Rəis müavini R.Eyyubovun xususi əməyinin olduğunu, əməkdaşların təlim-məşqlərinə, bunun üçün müvafiq şəraitin yaradılmasına onun tərəfindən mütəmadi nəzarət edildiyini diqqətə çatdırdı”.
Yanvarın 19-da NBPİ-nin və Daxili Qoşunların Baş İdarəsinin komandası qarşılaşıb. Maraqla qarşılanan bu görüşdə də NBPİ-nin komandası 3-2 hesabı ilə qələbə qazanaraq, ümumi hesabda 3-ü yeri tutub.
Daha sonra qaliblərin mükafatlandırılması mərasimi olub. Mərasimdə çıxış edən DİN İdman Cəmiyyətinin sədri, polis polkovniki Zemfira Meftaxetdinova qalibləri təbrik edib, NBPİ-nin komandasının ilk üçlükdə olmasını müsbət hal kimi qiymətləndirib.
Komandanın qapıçısı “ən yaxşı qapıçı” adına layiq görülüb, DİN rəhbərliyinin fəxri fərmanı ilə təltif edilib.
Çingiz Şıxverdiyev DİN Mətbuat Xidmətinin əməkdaşı
