Fatimə Hacıbəyli: “Onların qəhrəmanlığı bugünkü və gələcək nəsillərə əsl vətənpərvərlik nümunəsidir”
20 Yanvar faciəsindən 28 il ötür. Ancaq həmin o məşəqqətli günlər hər birimizin yaddaşına əbədi həkk olunub. Həmin gün Azərbaycan tarixində qanla yazılmış bir səhifədir, ancaq təkcə faciə deyil. Bu tarix Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günüdür.
1990-cı ilin 20 yanvar günü uzun illər Sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.
1990-cı il yanvarın 19-dan 20-nə keçən gecə Bakıda sovet ordusu tərəfindən dinc əhaliyə qarşı dəhşətli kütləvi qırğın hadisəsi törədildi. Bu qanlı hadisənin törədilməsində əsas məqsədlərdən biri öz haqlı tələblərini irəli sürən, bu tələblərə demokratik yollarla nail olmaq istəyən, istiqlaliyyət, azadlıq, suverenlik istəyində olan Azərbaycan xalqının iradəsini qırmaq, insanların müstəqillik arzularını tankların tırtılları altında əzmək idi. Sovet imperiyası günahsız insanların qanını axıtsa da, xalqımıza qarşı misli görünməmiş qəddarlıq etsə də, istəyinə nail ola bilmədi, milli qürurumuzu qıra bilmədi.
1990-cı ilin yanvarında sovet qoşunlarının Bakıda həyata keçirdikləri qırğınlarda 131 nəfər öldürülüb, 600-dən çox adam yaralanıb. Həlak olanlar arasında yetkinlik yaşına çatmayanlar, qadınlar, qocalar, şikəstlər də var idi.
Bakının ən möhtəşəm məkanında Vətən uğrunda canlarını qurban vermiş mərd, igid oğul və qızlarımızın uyuduğu Şəhidlər Xiyabanı xalqımız üçün müqəddəs bir and yerinə, milli iradəmizin şanlı-şərəfli bir salnaməsinə çevrilib. Şəhidlərimiz və Şəhidlər Xiyabanı azadlığımızın, müstəqilliyimizin, milli iradəmizin simvolu kimi bundan sonrakı nəsillərə də bir qürur mənbəyidir.
Hər il istənilən sahədə çalışan, yaşından asılı olmayaraq, hər bir kəs 20 Yanvar şəhidlərini anmaq üçün Şəhidlər Xiyabanına yollanır. 20 Yanvar şəhidlərini ziyarət edənlər arasında məktəblilər də var. Onlar Qanlı Yanvar faciəsinin iyirmi səkkizinci ildönümü ərəfəsində Şəhidlər Xiyabanını ziyarət edirlər. Şagirdlərin özləri 20 Yanvar şəhidlərinin məzarlarını ziyarət etmək üçün təşəbbüs göstərirlər. Şagirdlər Vətən övladlarının xatirəsini yad edərək məzarları üzərinə tər qərənfillər düzürlər.
“Vəfa Sosial” İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, 20 Yanvar faciəsi xalqımızın şərəf salnaməsidir. Bu şanlı tarixi gələcək nəslə çatdırmaq lazımdır: “Vətənimizin azadlığı, müstəqilliyi uğrunda canlarını qurban verən 20 Yanvar şəhidləri ölümləri ilə ölməzliyə qovuşaraq tariximizin şərəfli səhifəsini yazıblar. Onların qəhrəmanlığı bugünkü və gələcək nəsillərə əsl vətənpərvərlik nümunəsidir. 20 Yanvar faciəsi xalqımızın qan yaddaşından heç vaxt silinməyəcək. Vətənimizin müstəqilliyi, suverenliyi və azadlığı uğrunda şəhid olanların əziz xatirəsi qəlblərdə əbədi yaşayacaq”
F.Hacıbəylinin sözlərinə görə, hər il olduğu kimi, bu il də Şəhidlər Xiyabanını 100 minlərlə insan ziyarət edir və edəcək. O şərəf gününü hər kəs qürurla anır: “Məktəblilərin Şəhidlər Xiyabanına gəlib şəhidlərimizin məzarına tər qərənfillər düzməsi qürurvericidir. Vətənə azadlığı canları bahasına bəxş edən 20 Yanvar şəhidlərinin dəfn olunduğu xiyaban bu illər ərzində milyonlarla ziyarətçinin gəldiyi müqəddəs məkana çevrilib. Hər il hər bir kəs Şəhidlər Xiyabanına gələrək şəhidlərimizi ziyarət edir. Şagirdlərin böyük həvəslə xiyabana getmək istəməsi müəllimləri, valideynləri qürurlandırır. Hətta elə şagirdlər var ki, onlar fərdi şəkildə xiyabana gedib şəhid məzarlarını ziyarət edirlər. Bu hal, demək olar ki, hər il təkrarlanır”.
Günel CƏLİLOVA
