Könül Vaqifqızı: “Psixologiyada xanımların özlərindən böyük kişilərə, kişilərin isə özlərindən böyük xanımlara meyl etməsi normaldır”
İlhamə Quliyevanın "İncitmə qəlbimi" mahnısının sözləri yəqin ki, çoxlarına yaxşı tanışdır: "Yaşın nə fərqi var, sevirəm səni...". Hər birimizin sevə-sevə dinlədiyimiz, yeri gəldikcə zümzümə etdiyimiz bu mahnının sözləri artıq reallığa çevrilir. Kişilər özlərindən bir neçə yaş böyük xanımla ailə həyatı qururlar.
18 yaşlı bir şəxsin azad qərar vermək hüququ, dünyanın bir çox ölkələrində olduğu kimi, bizdə də qorunur. İstənilən şəxs sərbəst şəkildə, yaşından asılı olmayaraq, seçdiyi xanımla ailə həyatı qura bilər. Qeyd edək ki, bu hal xarici ölkələrdə də yaşanır. Bəylər özündən yaşca böyük xanımla müstəqil şəkildə ailə həyatı qura bilərlər. Yaşından asılı olmayaraq, iki nəfər bir-birini sevirsə, bir yerdə xoşbəxt olacaqlarını düşünürlərsə, buna mane olmaq düzgün olmaz. Evlənən cütlüklər arasındakı yaş fərqinin ictimai müzakirəyə bu formada çıxarılması düzgün deyil.
Psixoloq Könül Vaqifqızı “Bakı-Xəbər”ə açıqlamasında qeyd etdi ki, psixologiyada xanımların özlərindən böyük kişilərə, kişilərin isə özlərindən böyük xanımlara meyl etməsi normaldır.
Sevgidə və evlilikdə ən vacib, mühüm amil münasibətin, hisslərin qarşılıqlı olması, tərəflərin bir-birini anlayışlı şəkildə, ciddi qəbul etməsidir: “Ümumiyyətlə, evlilikdə şəxslərin bioloji yaşı yox, psixoloji yaşı əsas rol oynayır. Məsələn, eyni yaşda olan cütlüklərin birinin uşaq xarakterli, digərinin daha yetkin şəxsiyyətə sahib olduğunu tez-tez görürük. Bu da, əlbəttə, münasibətin, evliliyin hüzurlu davam etməsinə mane ola biləcək özəlliklərdəndir. Cəmiyyətimizin gəldiyi bir qənaət var ki, insan yaşa dolduqca, bu yaşlılıq onun yetkinliyinin göstəricisidir. Amma bu yanaşma heç də doğru hesab olunmur. Çünki "böyümək" heç də psixoloji yetkinliyi öz bərabərində gətirmir.
Cütlüklərin intellekt yaşları üst-üstə düşərsə, kişinin özündən yaşca böyük qadını sevməsində heç bir problem yoxdur. Məsələn, görürsən ki, oğlanın pasport yaşı 25-dir, ancaq intellekt yaşı 32-33 dür. Təbii ki, o, 25 yaşlı qızla münasibət qura bilməyəcək, çünki qız onun fikirlərini başa düşmür”.
Həmsöhbətimizin fikrincə, oğlanların özlərindən yaşca böyük qadınla evlənmək istəmələri şüuraltı olaraq oğlanın anasının göstərdiyi qayğını həmin qadında axtarması ilə bağlıdır: "Bəzən analar fəxrlə deyirlər ki, oğul anasından asılıdır, anasız qərar vermir. Amma bu heç də fəxr olunası bir durum deyil. 15 yaşlı yeniyetmə oğlanın anasından hədsiz dərəcədə asılı olması yaxşı hal kimi dəyərləndirilməməlidir. Bu, ana üçün qürur, fəxr, xoşbəxtlik sayılmamalıdır. Çünki həmin oğul 20-30 yaşa çatanda 40 yaşlı qadını sevməyə maraq göstərə bilər. Son zamanlar özlərindən yaşca böyük qadınlarla evlənən oğlanların sayı az deyil və əvvəlki illərə nisbətən artır. Bu hal, dediyim kimi, daha çox analarla bağlıdır. Bu tip oğlanların ürəyində ana sevgisi hədsiz olur. O sevgi nə qədər güclüdürsə, özündən böyük qadınlara da meyl o qədər artır. Bir ana oğlunu həddindən artıq özündən asılı edirsə, o, anasına düşkün olur. Həmin oğlan sevdiyi insana da bu cür bağlanmağa başlayır. Adətən də yaşı yuxarı qadınlara maraq göstərməyə başlayırlar".
Psixoloq onu da bildirdi ki, bəzi şəxslər kişilərin yaşca özlərindən böyük xanımla ailə qurmasını düzgün qarşılamır. Ancaq bu, düzgün yanaşma deyil: “Qeyd etdiyim kimi, evlilikdə bioloji deyil, psixoloji yaş nəzərə alınmalıdır. Ailə qurmaq istəyən cütlüklərin həyata baxışları üst-üstə düşürsə, burada qınanılası heç nə yoxdur. Onu da nəzərə almaq lazımdır ki, biz müstəqil ölkənin vətəndaşlarıyıq. Hər kəsin qərarına hörmətlə yanaşmaq lazımdır. İstənilən yaş dövründə olan bir xanımla cavan bəyin ailə qurmasında heç bir qəbahət yoxdur. Ən azı, düşünmək lazımdır ki, yeni ailə həyatı qurulur”.
Günel CƏLİLOVA
