Davud Rəhimli: “Bu hal, bir növ, onların sosial müdafiəsini gücləndirir”
Məlum olduğu kimi, Əmək və Əhalinin Sosial Müdafiəsi Nazirliyinin müvafiq əmri ilə “2018-ci ildə əlilliyi olan şəxslərin və sağlamlıq imkanları məhdud uşaqların sosial müdafiəsi və reabilitasiyası Proqramı” təsdiq edilib.
Nazirliyin yaydığı məlumata əsasən, proqram əlilliyi olan şəxslərin və sağlamlıq imkanları məhdud uşaqların cəmiyyətə inteqrasiyası, tibbi bərpası, bədən tərbiyəsi və idmana cəlb edilməsi, asudə vaxtlarının səmərəli təşkili üçün kompleks tədbirlərin həyata keçirilməsi, onların sosial müdafiəsinin gücləndirilməsi məqsədinə xidmət edir.
Sənəddə Əmək və Əhalinin Sosial Müdafiəsi Nazirliyinin 2018-ci il ərzində bu sahədə görəcəyi tədbirlər öz əksini tapır. Belə ki, proqramda əlilliyi olan şəxslərin və sağlamlıq imkanları məhdud uşaqların reabilitasiyasına şərait yaradılması, onların ölkə daxilində müalicə olunmalarına kömək, sosial-məişət problemlərinin həlli ilə bağlı maddi və sosial xidmət müəssisələrinə texniki yardım göstərilməsi, əlillik problemi ilə bağlı informasiya təminatının, həmin təbəqələrdən olanlara diqqət və qayğının artırılması üçün təbliğat kampaniyasının təşkil olunması tədbirləri yer alır.
Azərbaycan Əlil Təşkilatları İttifaqının rəhbəri Davud Rəhimli bizimlə söhbətində qeyd etdi ki, hər bir qurumun özünün fəaliyyət sahələri olur. Bu baxımdan Əmək və Əhalinin Sosial Müdafiəsi Nazirliyi də istisna deyil: “Həmin sahələr üzrə müvafiq qanunvericiliyə uyğun olaraq proqramlar hazırlanaraq təsdiq olunur. Bu proqram tək əlil uşaqlar üçün deyil, əlilliyi olan bütün şəxslər, o cümlədən sağlamlıq imkanı məhdud olan uşaqları da əhatə edir”.
Həmsöhbətimiz onu da bildirdi ki, 2018-ci il üçün təsdiq olunan proqramda əlilliyi olan, sağlamlıq imkanı məhdud şəxslərə reabilitasiya mərkəzinin yaradılmasına da toxunulub.
Ölkə daxilində müalicə, sosial-məişət problemlərinin həlli ilə bağlı mütəmadi olaraq yardım göstərilir. D.Rəhimlinin sözlərinə görə, əlilliyi və sağlamlıq imkanı məhdud olan insanlar üçün xüsusi proqramların qəbul olunması düzgün haldır. Bu proqram sayəsində qayğıya ehtiyacı olan uşaqların asudə vaxtı səmərəli şəkildə təşkil olunur. Bir növ, onların sosial müdafiəsi güclənir.
Günel CƏLİLOVA
