Şəmsəddin Əliyev: “Əksər parametrlərə görə Azərbaycan polisi dünyada öndədir”
Xəbər verildiyi kimi, Daxili İşlər Nazirliyində 2017-ci ildə cinayətkarlıqla mübarizənin, ictimai qaydanın qorunmasının və ictimai təhlükəsizliyin təmin edilməsinin yekunlarına və qarşıda duran vəzifələrə həsr olunmuş geniş Kollegiya iclası keçirilib.
Sözügedən iclası giriş sözü ilə açan nazir, general-polkovnik Ramil Usubov bildirib ki, Prezident İlham Əliyev tərəfindən uğurla həyata keçirilən hüquq-mühafizə siyasəti sayəsində daxili işlər orqanlarında da fəaliyyətin təkmilləşdirilməsi, əldə olunmuş müsbət nəticələrin inkişaf etdirilməsi istiqamətində əhəmiyyətli işlər görülüb, asayişin, təhlükəsizliyin, insan hüquq və azadlıqlarının qorunması və digər sahələrdə qarşıda duran vəzifələrin, dövlət plan və proqramlarının icrası təmin edilib.
Kollegiya iclasında o da qeyd olunub ki, ölkəmiz cinayətkarlıqla mübarizənin nəticələrinə görə ötən il də MDB və Avropa məkanında öncül mövqeyini saxlayıb, əhalinin hər 100 min nəfərinə düşən cinayətlərin sayı 271-dən 264-ə qədər azalıb. Dünya İqtisadi Forumunun “2017-2018-ci illər üzrə qlobal rəqabətlilik” hesabatına əsasən, “Polis xidmətlərinin etibarlılığı” indikatoru üzrə respublikamızın 21 pillə irəliləyərək 137 ölkə arasında 54-cü yerdə qərarlaşması da diqqətəlayiq fakt kimi vurğulanıb.
Görünən odur ki, Azərbaycan polisi fəaliyyətinə görə bütün parametrlər üzrə ön mövqedə dayanır və bu proses davamlı hal alıb. Bu baxımdan, “Polis xidmətlərinin etibarlılığı” indikatoru üzrə Azərbaycanın 21 pillə irəliləyərək 54-cü yerdə qərarlaşmasını ekspertlər necə dəyərləndirirlər?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, bu, Azərbaycan polisinin gərgin əməyinin nəticəsidir: “Ölkənin polis sistemində uzun illərdir demokratik islahatlar davam edir. Polis Azərbaycan dövlətinin cinayətkarlıqla mübarizə siyasətinin bütün parametrlərinə uyğun şəkildə öz fəaliyyətini qurur. Həm cinayətkarlığın qarşısının alınmasında, həm də keçmiş illərdə bağlı qalan cinayətlərin açılmasında polisin xidmətləri böyükdür. Həmçinin, Azərbaycan polisinin ölkə daxilində davranış kodeksinə əməl etməsi və bütün bunların fonunda beynəlxalq arenada yüksək göstərici ortaya qoyması uğurlu nəticədir. Bütövlükdə bu, Azərbaycan polisinin həm ölkənin Konstitusiyasına uyğun şəkildə öz fəaliyyətini qurmasının, həm də insan hüquq və azadlıqlarına humanist yanaşmasının təzahürüdür. Hesab edirəm ki, sözügedən amillərin nəticəsi olaraq dünyada Azərbaycan polisini davranışı, cinayətkarlıqla mübarizə baxımından heç biri ilə müqayisə etmək olmaz. Əksər parametrlərə görə Azərbaycan polisi dünyada öndədir. Bununla bağlı hər şey göz qabağındadır. Əhalinin 100 min nəfərinə düşən cinayətlərin sayı, cinayətlərin müəyyən ağır növlərinin azaldılması, bağlı qalmış keçmiş cinayətlərin açılma faizinin yüksək olması deyilənlərə əyani sübutdur. Onu da qeyd edim ki, əldə edilən sözügedən müsbət nəticələr cinayətkarlıqla mübarizə işinin düzgün təşkil olunmasından irəli gəlir. Bir də yerlərdə polis əməkdaşlarına verilən dürüst, dolğun və əhatəli təlimatların nəticəsidir. Yəni polis əməkdaşları xidmətə buraxılmazdan əvvəl onlara təlimat verilir. Deməyim odur ki, cinayətkarlıqla mübarizədə bu təlimatların da böyük rolu var. Bir sözlə, Kollegiya qərarlarının icra olunması, cinayətkarlıqla mübarizə işinin düzgün təşkili və yerlərdə verilən təlimatların səmərəli şəkildə icra olunması bu sahədə ciddi nəticələrin əldə olunmasına gətirib çıxarıb”.
Vidadi ORDAHALLI
