Şamaxının Quşçu kəndində püskürən palçıq vulkanının əhaliyə və əkin sahələrinə heç bir təhlükəsi yoxdur. Bu barədə Trend-ə açıqlamasında Şamaxı İcra Hakimiyyətinin baş memarı Rüstəm Əliyev deyib.
Qurum sözçüsü bildirib ki, əraziyə baxış keçirilib və proses nəzarətdə saxlanılır: "Həcminə görə çox kiçik vulkandır. Həmin ərazidə ildə bir dəfə belə püskürmə olur və heç bir təhlükəsi yoxdur. Bir neçə gün əvvəl də belə bir hadisə olub, palçıq vulkanı püskürüb. Hadisə barədə Ekologiya və Təbii Sərvətlər Nazirliyinə məlumat verilib. Nazirlik də, Şamaxı rayon İcra Hakimiyyətinin başçısı da məsələni nəzarətdə saxlayır. Hazırda vulkanda hər hansı bir aktivlik, təhlükə hiss olunmur".
R.Əliyev bildirib ki, püskürən vulkan kəndin yaşayış sahəsindən təxminən 300-400 metr kənardadır.
Şamaxı Quşçu kənd icra nümayəndəsi Bəşir Bəhramov isə Trend-ə bildirib ki, hazırda vulkanın ətrafındakı 1 hektar ərazidə təsərrüfat işləri görülmür: "Vulkan püskürməsi zamanı palçıq təxminən 60 kvadratmetr sahəyə yayılıb. Hazırda vəziyyət sabitdir".
APA-nın xəbərinə görə, vulkan gecə saat 1:00 radələrində rayonun Quşçu kəndində püskürməyə başlayıb və proses hazırda davam edir. Kənd sakini Adəm Yusifov bildirib ki, insanlar gecə vulkanın gurultu səsinə oyanıb: “Vulkan püskürməsi zamanı yerin altından xaric olan məhsullar təxminən 10 metr hündürlüyə qalxaraq 1.5 hektara yaxın əraziyə yayılıb. Hazırda vulkanın qaynamaları və palçıq axını davam edir. Ərazidən qaz iyi gəlir. Bu vulkan sonuncu dəfə 2005-ci ildə püskürmüşdü”.
Qeyd edək ki, vulkanın püskürdüyü ərazidən 20-30 mert aralıda Quşçu kəndinin sakinlərinə məxsus 15-ə yaxın ev var. Təbiət hadisəsi zamanı evlərə ziyan dəyməyib.
