Ərşad Hüseynov: “Hazırda sahibkar yalnız obyektində “tütün çəkmək qadağandır” yazısının və ya işarəsinin olmamasına görə İnzibati Xətalar Məcəlləsinin 212.2-ci maddəsi üzrə cərimə (fərdi sahibkar 400 manat, hüquqi şəxs 1000 manat) oluna bilər”
Məlum olduğu kimi, bir neçə gündür qapalı və ictimai yerlərdə siqaretdən istifadəyə qadağa qoyulub. “Tütün və tütün məmulatı haqqında” Qanuna əsasən ictimai yerlərdə siqaretin istifadəsi məhdudlaşdırılmalıdır.
“İnzibati Xətalar Məcəlləsində nəzərdə tutulan cərimələr “Tütün və tütün məmulatı haqqında” Qanuna istinad edərək, “siqaret çəkmək qadağandır” xəbərdarlıq yazısının və ya işarəsinin olmasının təmin edilməməsinə görə məsuliyyət tədbirləri tətbiq edilə bilər. Bunu Milli Məclisin Hüquq siyasəti və dövlət quruculuğu komitəsinin üzvü Vüsal Hüseynov media nümayəndələrinə açıqlamasında deyib. O qeyd edib ki, bu, cərimələri tətbiq etməni müəyyən edir. Yeni qəbul edilmiş və bu qadağaları ətraflı müəyyən edən “Tütün məmulatlarının istifadəsinin məhdudlaşdırılması haqqında” Qanun isə mövcud İnzibati Xətalar Məcəlləsinin istinad etdiyi qanunda müvafiq maddələri (qadağan edilmiş yerləri) ləğv edir və bununla da müəyyən hüquqi boşluq yaradır. Belə ki, Məcəllədə istinad olunan qanunun hansı yerlərdə siqaret çəkilməsinin məhdudlaşdırılmasını tənzimləyən maddəsinin artıq hüquqi qüvvəsi yoxdur”.
O bildirib ki, mövcud vəziyyət hazırda yalnız Məcəlləyə əsasən qadağan edilmiş yerlərdə siqaret çəkilməsinə görə şəxslərin məsuliyyətə cəlb edilməsini təmin etmir. Həmçinin Məcəllənin 212.2 maddəsi sadəcə siqaret çəkməklə bağlı məsələni tənzimləyir, ancaq digər tütün məmulatları barədə hər hansı norma nəzərdə tutmur (məsələn, qəlyan): “Digər hallarda isə müəssisələr, idarə və təşkilatlar barəsində (ancaq siqaret çəkmək üçün xüsusi yerlərin ayrılmasının və görünən yerlərdə “siqaret çəkmək qadağandır” xəbərdarlıq yazısının və ya işarəsinin olmasının təmin edilməməsinə görə) isə məsuliyyət tədbirləri tətbiq edilə bilər. Təbii ki, bu, qısamüddətli bir vəziyyətdir və qanunyaratma praktikasına əsasən, Milli Məclis yeni qanunun tələblərini digər qanunlara uyğunlaşdırmaq üçün yaz sessiyasında bu dəyişiklikləri nəzərdən keçirəcək və Məcəlləyə yeni qanuna istinad və müvafiq cərimələrin tətbiqi üçün hüquqi imkanları təmin edəcək”.
Qeyd edək ki, İnzibati Xətalar Məcəlləsinin 212-ci (Tütün məmulatının istehlakına dair məhdudiyyətlərə riayət edilməməsi) maddəsinin 2-ci bəndinə əsasən isə müəssisələrdə, idarələrdə, təşkilatlarda siqaret çəkmək üçün xüsusi yerlərin ayrılmasının və görünən yerlərdə “siqaret çəkmək qadağandır” xəbərdarlıq yazısının və ya işarəsinin olmasının təmin edilməməsinə görə vəzifəli şəxslər 400 manat məbləğində, hüquqi şəxslər 1000 manat məbləğində cərimə edilir.
İaşə obyektlərində “siqaret çəkmək qadağandır” işarəsinin olmamasına görə sahibkarların cərimələnməsinə münasibət bildirən sosial sahə üzrə ekspert Ərşad Hüseynov qeyd etdi ki, yeni qanuna əsasən, sahibkarların belə bir xüsusi yer yaratmaq vəzifəsi yoxdur, onlar bu vəzifəni icra etməməyə görə cərimə oluna bilməzlər: “Bu yanlış məlumatı yayanlar İnzibati Xətalar Məcəlləsinin 212.2-ci maddəsindən çıxış edirlər. Lakin 30.12. 2017-ci il tarixdən qüvvəyə minmiş "Tütün məmulatlarının istifadəsinin məhdudlaşdırılması haqqında" Qanun bundan əvvəl həmin məsələləri tənzimləyən "Tütün və tütün məmulatı haqqında" Qanunun 20-ci və 21-ci maddələrini ləğv edib. Sahibkarın iş yerində (ofisdə, istehsalat sahəsində, obyektdə, restoranda, mehmanxanada və s.) siqaret çəkmək üçün xüsusi yer ayırmaq vəzifəsi köhnə qanunun həmin ləğv olunan 21-ci maddəsində yer alırdı. Bu maddə ləğv edildi.
Yeni qanun isə sahibkar üçün analoji vəzifə müəyyən etmir. Hətta yeni qanunun əsas ideyası budur ki, imkan daxilində qapalı ictimai yerlərdə siqaret çəkmə istisnasız qadağan edilsin. Beləliklə, yeni qanun sahibkarların, yəni hüquqi və fiziki şəxslərin siqaret çəkmək üçün xüsusi yer ayırmaq vəzifəsini ləğv etdiyindən, İnzibati Xətalar Məcəlləsinin 212.2-ci maddəsində bu vəzifənin icra edilməməsinə görə cərimə müəyyən edən müddəa da avtomatik olaraq 30.12.2017-ci il tarixindən hüquqi qüvvəsini itirmiş sayılır. Hazırda sahibkar yalnız obyektində “tütün çəkmək qadağandır” yazısının və ya işarəsinin olmamasına görə İnzibati Xətalar Məcəlləsinin 212.2-ci maddəsi üzrə cərimə (fərdi sahibkar 400 manat, hüquqi şəxs 1000 manat) oluna bilər”.
Günel CƏLİLOVA
