Xəyal Məmmədxanlı: “İşsiz qalan şəxsin himayəsində 18 yaşı tamam olmayan uşaq varsa, ona sığorta ödəniləcək” Ruslan Atakişiyev: “Onların sosial durumunun yaxşılaşması istiqamətində sığorta ödənişinin verilməsi müsbət haldır”
Himayəsində 18 yaşa çatmamış uşaq olan şəxslərin sığorta ödənişinin məbləği hər uşağa görə sığorta ödənişinin 5 faizi qədər artırılacaq. Məlum olduğu kimi, Nazirlər Kabineti “Sığorta ödənişinin verilməsi Qaydası”nı təsdiqləyib.
Bu qayda Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin (Xidmət) yerli orqanları tərəfindən sığorta ödənişi almaq hüququ olan şəxslərə sığorta ödənişinin hesablanması və ödənilməsi qaydasını müəyyən edir. Sığorta ödənişini almaq hüququna yalnız dövlət orqanının və ya hüquqi şəxsin ləğv edilməsi və ya işçilərin sayının və ya ştatların ixtisar edilməsi nəticəsində əmək münasibətlərinə xitam verilmiş və Xidmətdə işsiz kimi qeydiyyata alınmış sığortaolunanlar malikdirlər. Həm əsas, həm də əlavə iş yerləri olan işçinin əmək münasibətlərinə müxtəlif zamanlarda xitam verildiyi halda, onun sığorta ödənişini almaq hüququ sonuncu iş yeri üzrə, eyni gündə xitam verildiyi halda isə əsas iş yeri üzrə dövlət orqanının və ya hüquqi şəxsin ləğv edilməsi və ya işçilərin sayının və ya ştatların ixtisar edilməsi nəticəsində əmək münasibətlərinə xitam verildiyi halda yaranır. Sığorta ödənişinin verilməsinə və ya verilməsinin dayandırılmasına, ödənişin məbləğinin dəyişdirilməsinə səbəb ola biləcək hallardan biri baş verdikdə, sığorta ödənişi təyin edilən şəxs bu barədə 10 iş günündən gec olmayaraq Xidmətə məlumat verməlidir. İşsiz kimi qeydiyyata alınmaq hüququ olmayan şəxslərə sığorta ödənişi təyin edilmir. Sığorta ödənişini almaq hüququna malik olan və işsizliyin başlanmasından əvvəlki 24 təqvim ayı ərzində 12 təqvim ayından çox, lakin ən azı 3 il sığorta stajına malik əmək qabiliyyətli şəxslər üçün sığorta ödənişi sığorta stajından asılı olaraq onun itirilmiş orta aylıq əməkhaqqının məbləğinə müvafiq faiz dərəcələri tətbiq olunmaqla hesablanır.
Himayəsində 18 yaşı tamam olmamış şəxslərə sığorta ödənişinin 5 faiz artırılması işləməyən və sosial durumu ağır olan ailələrin büdcəsinə müsbət təsir göstərəcək.
Sığorta sahəsi üzrə ekspert Xəyal Məmmədxanlı bizimlə söhbətində bildirdi ki, işsiz qalan şəxsin himayəsində 18 yaşı tamam olmayan uşaq varsa, ona sığorta ödəniləcək: “İşsiz qalan şəxsə əməkhaqqının müəyyən məbləğində sığorta ödəniləcək”.
X.Məmmədxanlı hesab edir ki, işsizlik sığortasının verilməsi proseduru dar çərçivədə götürülüb. İşsizlik sığortası əsasən ixtisara düşənlərə və bağlanan şirkətlərin işçilərinə aid olacaq: “Kimsə öz istəyi ilə işdən çıxıb işsiz qalarsa, ona şamil olunmayacaq. Bu səbəbdən də düşünürəm bunu genişləndirmək daha yaxşı olardı”.
İqtisadçı Ruslan Atakişiyev bizimlə söhbətində qeyd etdi ki, işsiz ailələrin himayəsində 18 yaşa çatmamış uşaq varsa, hər uşağa görə sığorta ödənişinin verilməsi müsbət haldır: “Nəzərə almaq lazımdır ki, bu gün elə gənc ailələr var ki, onlar müxtəlif səbəblərdən işsizdirlər. Onların sosial durumunun yaxşılaşması istiqamətində sığorta ödənişinin verilməsi müsbət haldır. Hər uşağa görə 5 faiz sosial ödənişi bir neçə dəfə artırmaq daha yaxşı olardı”.
Günel CƏLİLOVA
