Mehdi Mehdiyev: “Ona görə də iki qurumun bu işləri birgə həyata keçirməsi ordu üçün çox zəruridir”
Məlum olduğu kimi, Müdafiə Nazirliyi ilə Dini Qurumlarla İş üzrə Dövlət Komitəsi arasında 2018-ci il üçün birgə fəaliyyət planı imzalanıb. Sənədə əsasən, keçiriləcək tədbirlərin yeri, icra vaxtı, icraya məsul qurumlar və şəxslər müəyyən edilib.
Bu barədə Müdafiə Nazirliyinin yaydığı məlumatda o da bildirilir ki, il ərzində Müdafiə Nazirliyinin tabeliyində olan idarələrdə, birlik, birləşmə, hərbi hissə və xüsusi təyinatlı təhsil müəssisələrində təşkil ediləcək görüşlərdə azərbaycançılıq ideyası, milli-mənəvi, mədəni dəyərlərin qorunub saxlanması, inkişaf etdirilməsi, radikal dini cərəyanlar və ekstremizmlə mübarizə, mədəniyyətlər, sivilizasiyalar və konfessiyalar arasında əməkdaşlıq və digər mövzularda tədbirlər keçiriləcək.
O da məlumdur ki, dövlətin mühüm atributlarından biri də ordudur. Çünki hər bir dövlətin müstəqilliyinin, dövlət olaraq var olmasının qarantı rolunda ordu çıxış edir. O üzdən, ordunun gücləndirilməsi hərtərəfli olmalıdır. Burada təkcə fiziki hazırlıq və silah amili başlıca rol oynamır. Həmçinin, əsgərin ovqatı, psixoloji hazırlıq səviyyəsi də həlledici əhəmiyyətə malikdir. Əsgərin psixoloji hazırlıq səviyyəsinin kökündə isə milli ideologiyaya bağlılıq, sədaqət dayanır. Ordudakı əsgər milli ideologiyanı nə qədər dərindən bilsə, hərtərəfli hazırlıq səviyyəsi bir o qədər yüksək olar. Xüsusən də döyüş hazırlığı səviyyəsi.
Bütün bu deyilənlərin fonunda, belə bir işin görülməsi ordu üçün nə qədər vacibdir?
Məsələyə münasibət bildirən hərbi ekspert Mehdi Mehdiyevin sözlərinə görə, orduda bu kimi tədbirlərin keçirilməsi vacib əhəmiyyət kəsb edir: “Hesab edirəm ki, belə bir qərarın qəbul olunması məqsədyönlü addımdır. Orduda milli-mənəvi, mədəni dəyərlərin təbliğ olunması və qorunması vacib əhəmiyyət kəsb edir. O cümlədən, dini maarifləndirməyə də xüsusi önəm verilməlidir. Əvvəlki dövrdə də dini icmaların nümayəndələri var idi və şəxsi heyətlə o barədə maarifləndirmə işi aparırdılar. Yəqin ki, bu iş o zaman düzgün qurulmadığına görə sözügedən məsələ təxirə salındı. Ancaq bu gün elə bir dövr gəlib çatıb ki, istər orduda, istərsə də cəmiyyətdə dini maarifləndirmə işi aparılmalıdır. Xüsusən də məktəblərdən başlayaraq dinin əsaslarını təbliğ etmək vacibdir. Düzgün maarifləndirmə işi aparmaq lazımdır ki, insanlar dinin əsaslarını bilsinlər və bunun nəticəsində digər təriqətlərin təsiri altına düşməsinlər. Təəssüflər olsun ki, orduda xidmət edənlərin arasında da dinin əsaslarını bilməyən şəxslər var. Belələri görürsən ki, hansısa təriqətin təsiri altına düşür və bu da müəyyən fəsadlara yol açır. Ona görə də iki qurumun bu işləri birgə həyata keçirməsi ordu üçün çox zəruridir. Orduda ibadətlə məşğul olan şəxslərin də nəyə ibadət etdiklərini nəzarət altında saxlamaq lazımdır. Bununla yanaşı, dinə bağlılığı olan və olmayan insanların da düzgün maarifləndirilməsinə ehtiyac var. Nəzərə almaq lazımdır ki, bütün bunlar bir-birilə bu və ya digər dərəcədə bağlıdır. Orduda milli-mənəvi dəyərlərin təbliğ olunmasının düzgün qurulması bu və ya digər dərəcədə ordunun psixoloji durumuna müsbət təsir göstərir. Ona görə də bu yöndə birgə fəaliyyətin qurulmasına müsbət yanaşıram. Düşünürəm ki, zamanla bu, öz müsbət təsirini göstərəcək”.
Vidadi ORDAHALLI
